1 Yusa-dd ɣari wawař n SIDI, inna:

2 “A mmis n bnadem, arr udem nnek ɣar Hajuj zi temmurt n Majuj, řḥakem n Ruc d Macik d Tubal, uca nabb ḍidd nnes, ^□  ■   3 ini: ‘Ammu i iqqar Sidi inu, SIDI: Xzar, Necc aqa ayi ḍidd nnek, a Hajuj, řḥakem n Ruc d Macik d Tubal. ^□   4 Necc ad cek arreɣ ad tɛeqbed u ad ggeɣ tisennarin deg iqabsiwen nnek uca ad cek ssuffɣeɣ, cek d marra řɛeskar nnek, iysan d imnayen, marra arḍen arruḍ mliḥ aṭṭas, ijj n wegraw d ameqqran aṭṭas, s tseddart tameqqrant d tseddart tameẓyant n uɛeskari, marra nitni ɣarsen tizemmar deg umenɣi s ssif. ^■   5 Ayt n Lfurs, n Kuc u zi temmurt n Fuṭ akidsen, marra idsen s tseddart n uɛeskari d lkask n n uɛeskari, 6 Jumar d marra řɛeskar nnes, d taddart n Tujarma zi ṭṭrufa n ccamal qaɛ ak-d marra řɛeskar nnes, aṭṭas n řegnus aqa aten akidek. 7 Iři twejded u sewjed ixef nnek, cek d marra agraw nnek nni tessmuned ɣarek, u iři d ameḥday nsen. 8 Awarni i waṭṭas n wussan ad tᵉttwařaɣid, awarni řami ɛdun aṭṭas n iseggʷusa ad dd-tased ɣar temmurt nni ittwaɛedřen zi ssif, ɣar ijj n řgens i ittwasmunen zi řegnus x idurar n Israil nni tuɣa d řxirbet i yijj n řweqt d azirar, ɣar ijj n řgens nni ittwassuffɣen zi řegnus, u marra nitni zeddɣen dinni di řaman. 9 Xenni ad tgeɛɛded amecnaw taḥaryaḍt, amecnaw aseynu maḥend ad tedřed tammurt, cek d marra řɛeskar nnek uřa d aṭṭas n řegnus nni kik iǧan.’ ” ^■  

10 “Ammu i iqqar Sidi inu, SIDI: ‘Deg wass nni ad imsar, aqa ad adfen ixarriṣen deg wuř nnek u cek ad txarrṣed di tmeɛmuč taɛeffant.

11 Ad tinid: Ad geɛɛdeɣ ɣar ict n temmurt tennurzem, ad dd-aseɣ ɣar yenni din iddaren di řehna u ɣar yenni din izeddɣen di řaman, inni din izeddɣen marra břa řḥiḍ u břa zzekrunat niɣ tiwwura,

12 maḥend ad keccḍeɣ u ad acareɣ agřa! Wah, maḥend ad tarred afus nnek x řxirbat nni di zeddɣen řexxu iwdan, x yijj n řgens nni ittwasmunen zi řegnus, wenni ikesben řmař d wagřa, wenni izeddɣen x tɛebbuḍt n temmurt.

13 Caba d Dadan d ttujar n Tarcic d marra ayraden imeẓyanin nsen ad ac inin: Ma tusid maḥend ad tᵉṭṭfed takeccaḍt? Ma tessmuned agraw nnek maḥend ad tkeccḍed, ḥima ad teksid nnuqart d wureɣ, ḥima ad tᵉṭṭfed řmař d wagřa, ḥima ad tacared takeccaḍt tameqqrant?’ ”

14 “S uya, nabb, a mmis n bnadem, uca ini i Hajuj: ‘Ammu i iqqar Sidi inu, SIDI: Deg wass nni, xmi i ɣa izdeɣ řgens inu Israil di řaman, ma cek war tessined min ittxeṣṣa ad t tegged? ^□  

15 Ad dd-tased zeg wemcan nnek, zi ṭṭrufa n ccamal qaɛ, cek d waṭṭas n řegnus akidek. Marra nitni d imnayen s iysan, ijj n wegraw d ameqqran d yijj n řɛeskar ijehden.

16 Ad tgeɛɛded ḍidd i řgens inu Israil, am ijj n useynu, maḥend ad tedřed tammurt. Ad yiři deg uneggar n wussan. Necc ad cek ssiwḍeɣ x temmurt inu, ḥima řegnus ad ayi ssnen, xmi zzayek i ɣa ttwaqeddseɣ zzat i tiṭṭawin nsen, a Hajuj!’ ” ^□  

17 “Ammu i iqqar Sidi inu, SIDI: ‘Ma aqa cek d wenni x ssiwřeɣ deg wussan n zic, s ufus n imsexxaren inu, inabiyyen n Israil nni tuɣa ittnabben deg wussan nni, řmijař n waṭṭas n iseggʷusa, belli Necc ad cek ssiwḍeɣ ḍidd nsen?’ ”

18 “Deg wass nni, deg wass i di dd ɣa yas Hajuj ḍidd i temmurt n Israil, ammu i iqqar Sidi inu, SIDI, aqa ad yaři wesɛar inu deg wenzaren inu. ^□  

19 Di tusmi inu, di tmessi n uduqqez inu n ufugem nniɣ: S tidett, am ddareɣ Necc, mařa deg wass nni war ittiři ijj n wenhezzi n temmurt ameqqran di temmurt n Israil, ^■   20 ařami iseřman n řebḥar d ijḍaḍ n ujenna d řmař n yeyyar d marra řmař nni ittbuɛen x temmurt d marra iwdan nni iǧan x wudem n temmurt ad arjijen, u idurar ad ttwamenḍaren u řejruf iɛuǧen ad hruran d marra řeḥyuḍ ad wḍan. ^□   21 Necc ad dd-řaɣiɣ x ssif ḍidd nnes x marra idurar inu, ammu i iqqar Sidi inu, SIDI. Ssif n kuř ijj ad yiři x umas. 22 Necc ad xas ḥekmeɣ s ṭṭaɛun u s idammen uca ad xas ggeɣ u x řɛeskar nnes u x waṭṭas n řegnus nni kides i ɣa yiřin, anẓar ijehden d ibquqen n tebruri, timessi d řecbariyyet. 23 Necc ad ssecneɣ ixef inu d ameqqran d amqeddas u ad ttwassneɣ zzat i tiṭṭawin n řegnus. Nitni ad ssnen belli Necc d SIDI.”