39
1 “Xenni řexxu, a mmis n bnadem, nabb ḍidd i Hajuj uca ini: ‘Ammu i iqqar Sidi inu, SIDI: Xzar, aqa ayi xak, a, cek Hajuj, řḥakem n Ruc, Macik d Tubal. □ 2 Necc ad cek ssɛeqbeɣ u ad cek nedheɣ u ad cek ssgeɛɛdeɣ zi ṭṭrufa n ccamal uca ad cek gewwdeɣ x idurar n Israil. ■ 3 Ad wteɣ řqews zeg ufus nnek azeřmaḍ uca ad ɣeḍřeɣ fřitcat nnek zeg ufus nnek afusi. 4 Ad tewḍid x idurar n Israil, cek d marra řɛeskar nnek, d řegnus nni iǧan akidek. Necc wciɣ cek d macca i ɛřam kuř ijḍaḍ ittkeccaḍen u i řmař n řexřa. ■ 5 X wudem n yeyyar ad tewḍid, minzi Necc nniɣ t!, ammu i iqqar Sidi inu, SIDI. 6 Necc ad ssekkeɣ timessi x Majuj u x inni izeddɣen s řeḥna di temmura ɣar tma n řebḥar u nitni ad ssnen belli Necc d SIDI. □ 7 Necc ad ssbaneɣ Isem inu iqeddsen di řwest n řgens Israil u Necc war ttejjiɣ ɛad ad ssxemjen Isem inu iqeddsen. Řegnus ad ssnen belli Necc d SIDI, Amqeddas di Israil. 8 Xzar, ad dd-yas u ad imsar!, ammu i iqqar Sidi inu, SIDI. Wa d ass nni x ssiwřeɣ.’ ” 9 “Imezdaɣ n tneddam n Israil ad ffɣen uca ad ssarɣen timessi ad sscemḍen marra řesnaḥ: am tseddariyin timeẓyanin am tseddariyin timeqqranin uřa d řqews d fřitcat d iɛumad d iḥricen. Sebɛa n iseggʷusa ad zzaysen ssarɣen timessi.
10 War d ttiwyen akeccuḍ zeg iyyar u war ttqessan tafrawt zeg izeɣran, minzi ssarɣen timessi s řesnah uca ad keccḍen inni ten ikeccḍen uca ad acaren i yenni d asen yucaren!, ammu i iqqar Sidi inu, SIDI. □
11 Deg wass nni ad imsar, aqa Necc ad sswejdeɣ din amcan i Hajuj, ijj n wenḍeř di Israil, Řewḍa n yinni iẓekkwan, ɣar ccarq n řebḥar, u tanita ad tqemmeɛ anzaren n yinni iẓekkwan. Din i ɣa neḍřen Hajuj d marra řɣaci nnes inhewřen u ad xas řaɣan: Řewḍa n Řɣaci Inhewřen n Hajuj. □
12 Taddart n Israil ad ten tenḍeř, maḥend ad ssizdegen temmurt, řmijař n sebɛa n iyuren.
13 Marra řgens n temmurt ad ten neḍřen uca aya ad asen yiři i ccan, deg wass i di i ɣa ttwasɛuǧeɣ, ammu i iqqar Sidi inu, SIDI. □
14 Ad farzen ɛawed iryazen maḥend ad ẓwan nitni tammurt břa qeṭṭu maḥend ad neḍřen inni xas ikkin, inni tuɣa iqqimen buzzřen x wudem n temmurt, ḥima ad ssizedgen tammurt. Awarni i sebɛa n iyuren ad qeǧben nitni.
15 Inni i d asen ittxeṣṣa ad ẓwan tammurt ad tt ẓwan, u xmi ittwařa ḥed ijj n yiɣes n bnadem, ad yegg ɣares ict n řmarka, ař t ɣa neḍřen inni ineṭṭařen di Řewḍa n Řɣaci Ihewřen n Hajuj.
16 Ɛawed ad yiři isem n tendint ‘Řɣaci Ihewřen’. Nitni ad sizedgen tammurt.”
17 “Cek, a mmis n bnadem, ammu i iqqar Sidi inu, SIDI: Ini i marra řmarkat n ijḍaḍ u i marra řmař n yeyyar: Munem-dd da, asem-dd, seddem ixef nwem deg wenneḍ n tɣarṣt inu nni ɣarṣeɣ i kenniw, taɣarṣt tameqqrant x idurar n Israil, uca ad teccem aysum, ad teswem idammen.
18 Ad teccem aysum n ayt n bu-řexcunet, u ad teswem idammen n řḥukkam n ddunect, n icarriyyen d izmaren d iɣayḍen d iyenduzen, aqa aten marra dewsen di Basan.
19 Ad teccem tadunt ař ɣa tejjiwnem uca ad teswem idammen ař ɣa tescarem, n tɣarṣt inu i ɣarṣeɣ i kenniw. 20 Kenniw ad tejjiwnem ɣar ṭṭabřa inu s iysan d imnayen, s ayt n bu-teɣruḍt u s marra iɛeskariyyen, ammu i iqqar Sidi inu, SIDI. 21 Ad ggeɣ aɛuǧi inu jar řegnus uca marra řegnus ad ẓaren řḥukm inu nni ggiɣ, uřa d afus nni jar asen ssarseɣ. 22 Taddart n Israil ad tessen, aqa Necc, SIDI, d AREBBI nsen, zeg wass nni u zi ssa tsawent. 23 Ad ssnen řegnus aqa inni n taddart n Israil ttwanedhen di lmenfa zi ssibbet n řmuɛṣiyyet nsen, minzi ɣeddaren ayi, uca Necc ffareɣ xasen udem inu uca wciɣ ten deg ufus n iɣrimen nsen u xenni wḍan marra s ssif. 24 Necc ggiɣ asen am mammec taxmuji nsen u am mammec řmuɛṣiyyet nsen u Necc ffareɣ zzaysen udem inu.”
25 “S uya, ammu i iqqar Sidi inu, SIDI: Řexxu ad ssɛeqbeɣ imeḥbas n Yaɛqub u ad ḥinneɣ x marra taddart n Israil u ad cḍareɣ di ṭṭweɛ n Yisem inu iqeddsen. 26 Nitni ad arbun řefḍiḥet nsen d marra řmuɛṣiyyet nsen i zi d ayi ɣḍaren xmi nitni ɛad zedɣen di řaman di temmurt nsen u war iǧi wi ten i ɣa issiggʷeden. 27 Xmi ten i ɣa ssɛeqbeɣ zi řegnus u ad ten ssmuneɣ zi temmura n řɛedyan nsen u Necc ad ttwaqeddseɣ zzaysen zzat i tiṭṭawin n waṭṭas n řegnus, 28 ad ssnen belli Necc d SIDI, AREBBI nsen, minzi Necc nedheɣ ten d imeḥbas jar řegnus u Necc ssmuneɣ ten ɛawed di temmurt nsen, war din jjiɣ uřa d ijjen zzaysen. 29 Necc war xasen tteffareɣ ɛad udem inu, xmi aqa ssfarrɣeɣ Arruḥ inu x taddart n Israil!, ammu i iqqar Sidi inu, SIDI.” ■