1 Tuɣa ufus n SIDI xafi uca SIDI issuffeɣ ayi-dd di Arruḥ u issars ayi di řwest n ict n řewḍa nni tuɣa yeccuren s ixsan. 2 Netta indeh ayi deg wenneḍ nnes, u xzar, aqa din aṭṭas s waṭṭas n ixsan x wudem n řewḍa, u xzar, aqa aten uẓɣen aṭṭas. 3 Netta inna ayi: “A mmis n bnadem, ma ad ddaren ixsan-a?” Nniɣ necc: “A Sidi inu, SIDI, Cek tessned t!” 4 Xenni inna ayi: “Nabb x yexsan-a, ini asen: A ixsan uẓɣen, sřem i wawař n SIDI. 5 Ammu i iqqar Sidi inu, SIDI i ixsan-a: Xzar, Necc ad daywem ssidfeɣ buḥbeř uca ad teddarem ɛawed. 6 A xawem ggeɣ iẓewran u ad xawem ssgeɛɛdeɣ aysum uca ad kenniw dřeɣ s iřem uca ad daywem ggeɣ buḥbeř, ad teddarem. Xenni ad tessnem belli Necc d SIDI.”

7 Xenni nabbeɣ am mammec d ayi ittwaweṣṣa u řami tuɣa ttnabbeɣ, tuɣa din ijj n řḥess, u xzar, aqa da ict n tarjijit uca ixsan munen, kuř iɣes ak-d iɣes nnes. 8 Ẓřiɣ, u xzar, aqa dewřen xasen-dd iẓewran u yuři xasen weysum u Netta idřa i-ten s yiřem sennej nsen, maca war daysen tuɣi ɛad buḥbeř. 9 Netta inna ayi: “Nabb i Arruḥ, nabb, a mmis n bnadem, uca ini i Arruḥ: ‘Ammu i iqqar Sidi inu, SIDI: A Arruḥ, as-dd zi arebɛa n jjihat n usemmiḍ u ṣuḍ deg ina inni ittwanɣen, ḥima ad ddaren.’ ”

10 Xenni nabbeɣ am mammec i d ayi ittwaweṣṣa. Uca yudef Arruḥ daysen uca ddaren ɛawed uca kkaren bedden x iḍaren nsen, aqa d ijj n řɛeskar d ameqqran aṭṭas s waṭṭas.

11 Xenni inna ayi: “A mmis n bnadem, ixsan-a aqa aten marra taddart n Israil. Xzar, nitni qqaren: ‘Ixsan nneɣ uẓɣen uca asitem nneɣ iweddar u neccin nettwaɣarṣ!’

12 S uya, nabb, ini asen: ‘Ammu i iqqar Sidi inu, SIDI: Xzar, Necc ad arzmeɣ imeḍřan nwem, ad kenniw ssgeɛɛdeɣ zeg imeḍřan nwem, a řgens inu, u Necc ad kenniw awyeɣ x wudem n temmurt n Israil.

13 Kenniw ad tessnem, belli Necc d SIDI, umi arzmeɣ imeḍřan nwem uca ssuffɣeɣ-dd kenniw zeg imeḍřan nwem, a řgens inu.

14 Necc ad ggeɣ Arruḥ inu daywem u kenniw ad teddarem ɛawed u Necc ad kenniw ssarseɣ x wudem n temmurt nwem u kenniw ad tessnem belli Necc, SIDI, ssiwřeɣ uca ggiɣ t!, iqqar SIDI.’ ”

15 Yusa-dd ɣari wawař n SIDI, inna:

16 “Cek, a mmis n bnadem, ksi ijj n uzeǧaḍ n ukeccuḍ uca ari dayes: ‘I Yahuda u i arraw n Israil, imɛacaren nnes!’ Ksi awarni as azeǧaḍ nneɣni uca ari dayes: ‘I Yusuf, azeǧad n Ifrayim, u i marra taddart n Israil, imeddukkař nnes!’

17 Smun ten xenni ijj ak-d wenneɣni, egg zzaysen ijj n uzeǧaḍ i cek. Ad dewřen d ijj deg ufus nnek.

18 Xmi kik i ɣa issiwřen tarwa n řgens nnek, ad inin: ‘Ma war texsed ad aneɣ tessecned min ixs ad inint tmesřayin-a i cek?’,

19 ina asen: ‘Ammu i iqqar Sidi inu, SIDI: Xzar, Necc ad ksiɣ azeǧaḍ n Yusuf, wenni iǧan deg ufus n Ifrayim, azeǧaḍ n tqebbař n Israil, imɛacaren nnes, uca ad ten ssmuneɣ ak-d uzeǧaḍ n Yahuda uca ad ten ggeɣ d ijj n uzeǧaḍ uca ad dewřen d ijj deg ufus inu.’ 20 Izeǧaḍen zeg ukeccuḍ i x turid, ad iřin deg ufus nnek zzat i tiṭṭawin nsen. 21 Xenni ini asen: ‘Ammu i iqqar Sidi inu, SIDI: Xzar, Necc ad ṭṭfeɣ ayt n Israil zi řwest n řegnus mani ɣar uyuren, uca ad ten ssmuneɣ zeg wenneḍ uca ad ten awyeɣ ɣar wudem n temmurt nsen. 22 Necc ad ten ggeɣ d ijj n řgens di temmurt, x idurar n Israil, d ijj n Ujeǧid ad yiři i marra idsen d Ajeǧid uca ɛemmarṣ ɛad ad iřin i tnayen n řegnus u ɛemmarṣ ɛad ad ttwabḍan di tnayen n tgeldiwin. ^■   23 War ssxemmajen ɛad ixef nsen s imeyḍa nsen n ṣṣanam, s nnɛawat nsen n ṣṣanam u s řmuɛṣiyyat nsen. Necc ad ten ssnejmeɣ zi marra tineddam nsen i di xḍin nitni u Necc ad ten ssizedgeɣ. Xenni nitni ad ayi iřin d řgens u Necc ad asen iřiɣ d AREBBI. 24 Amsexxar inu Dawud ad xasen yiři d ajeǧid uca ad din yiři ijj n Umeksa i marra nitni. Nitni ad ḍfaren lfarayiḍ inu uca ad ḥḍan tiweṣṣa inu, ad zzaysent ggen. ^□  ■   25 Ad zedɣen di temmurt nni wciɣ i umsexxar inu Yaɛqub, i di tuɣa zeddɣen řejdud nsen, wah nitni ad dayes zedɣen i řebda, nitni d iḥenjiren nsen d iḥenjiren n iḥenjiren nsen, uca Amsexxar inu Dawud ad yiři d Řḥakem nsen i řebda. 26 Necc ad kidsen qeḍɛeɣ ijj n Řɛahd n řehna, ad yiři d Řɛahd i řebda. Necc ad ten wceɣ amcan mani i ɣa zedɣen u ad daysen arniɣ aṭṭas u Necc ad ggeɣ Zzawect inu Iqeddsen di řwest nsen i řebda. ^■   27 Ad ɣarsen tiři Tzeddiɣt inu u Necc ad iřiɣ d AREBBI nsen u nitni ad iřin d řgens inu, ^■   28 uca ad ssnen řegnus, belli Necc d SIDI nni issqeddsen Israil xmi i ɣa tiři Zzawect inu Iqeddsen di řwest nsen i řebda.’ ”