1 Yusa-dd ɣari wawař n SIDI, inna:

2 “A mmis n bnadem, nabb ḍidd i imeksawen n Israil uca ini asen: Ammu i iqqar Sidi inu, SIDI! Uct x imeksawen n Israil nni yarekkwesen ixef nsen! Ma war ittxeṣṣi i imeksawen ad arewsen uǧi? ^□  ■   3 Kenniw tᵉttettem tadunt uca tarrḍem taḍuft, tɣarrṣem i min imessřen mliḥ, maca war tarwisem ca uǧi. 4 War tessmeɛzem min iheyyfen, war tessgenfim min iḥeřcen, min ittwarẓin war t tcefnem, min iweddaren war t tarrim u min ixsaren war xas tarezzum, maca s uqabu d ufus iqesḥen tḥekkmem xasen. ^■   5 Ammu i ttwazuzzaren, minzi war din tuɣi bu umeksaw, dewřen d teymart amecnaw imuddar nni iǧan di řexřa uca ammu i ttwabezzɛen. 6 Weddaren uǧi inu x marra idurar u x kuř tawrirt yuɛřan, uǧi inu ttwabezzɛen x marra tammurt. War din wi xasen i ɣa isseqsan uca war din wi xasen yarezzun.”

7 “S uya, a imeksawen, sřem i wawař n SIDI! 8 S tidett am ddareɣ Necc, ammu i iqqar Sidi inu, SIDI! Ma war ttiřiɣ Necc xasen, minzi uǧi inu dewřen d teymart u uǧi inu dewřen d macca i řewḥuc n řexřa, umi war din iǧi umeksaw u minzi imeksawen inu war ttseqsan ca x wuǧi inu u umi imeksawen inu arewsen ixef nsen, war iǧi uǧi!”

9 “S uya, a imeksawen, sřem i wawař n SIDI:

10 Ammu i iqqar Sidi inu, SIDI: Xzar, Necc aqa ayi ḍidd i imeksawen nni! Necc ad ttareɣ uǧi inu zeg ufus nsen uca ad ten ssbeddeɣ zeg warwas n wuǧi, ařami imeksawen war yarekkwesen ɛad ixef nsen. Necc ad ssnejmeɣ uǧi inu zeg uqemmum nsen, ařami war d asen ttiřin ɛad d macca.”

11 “Minzi ammu i iqqar Sidi inu, SIDI: Xzar, Necc ad sseqsiɣ x wuǧi inu u ad xasen arzuɣ.

12 Amecnaw ameksi ad issmun taḥimart nnes deg wass nni di yeǧa di řwest n wuǧi nnes ibezzɛen, amenni i ɣa yarzuɣ Necc x wuǧi inu. Necc ad ten ssnejmeɣ zi marra imucan mani ttwabezzɛen deg wass n iseynuten d yijj n useynu ibbumbes,

13 uca Necc ad ten ssuffɣeɣ zi řegnus, ad ten ssmuneɣ zi temmura uca ad ten awyeɣ ɣar temmurt nsen. Necc ad ten arewseɣ x idurar n Israil, ɣar tɣezratin u di marra imucan i ittřiqen i tzeddiɣt di temmurt. ^■  

14 Necc ad ten arewseɣ x ict n ddemnet n tarewsa d taṣebḥant. X idurar yuɛřan n Israil ad yiři řmedweř n tarewsa nsen. Dinni ad areyyḥen deg ict n ddemnet n ddemnet n tarewsa u ad arewsen deg ict n ddemnet n tarewsa d lemliḥ aṭṭas x idurar n Israil.

15 Necc ad arewseɣ uǧi inu uca ad ten ssareyyḥeɣ, ammu i iqqar Sidi inu, SIDI.

16 Necc ad arzuɣ min ixsaren uca min iweddaren ad t arreɣ u min ittwarẓin ad t cefneɣ u min iheřcen ad t ssjehdeɣ, maca min imessřen d min ijehden ad t areddǧeɣ. Necc ad ten arewseɣ s řḥeqq.”

17 “U kenniw, a uǧi inu, ammu i iqqar Sidi inu, SIDI: Necc ad ḥekmeɣ jar ijjen zeg wuǧi d wuǧi nneɣni, jar icarriyyen d iɣayḍen.

18 Ma drust awem umi teccim ddemnet n tarewsa inu d taṣebḥant? Ma texsem xenni ɛawed ad tɛefsem x min iqqimen i tarewsa s iḍaren nwem? Ma texsem ad teswem aman iṣfan uca xenni ad tessarwyen min iqqimen s iḍaren nwem?

19 Ma ittxeṣṣa xenni i wuǧi inu ad ccen min xef ɛefsen iḍaren nwem u ad swen min ssarwyen iḍaren nwem?”

20 “S uya ammu i d asen iqqar Sidi inu, SIDI: Xzar, Necc ad carrɛeɣ jar wuǧi imessřen d wuǧi ikkucḍen, 21 minzi marra uǧi iḍeɛfen tɛarnem i-ten s uɣezdis u s teɣruḍt u tessqarbem ten s waccawen nwem, ařami ten tbezzɛem di barra. 22 Necc ad ssnejmeɣ uǧi inu ařami war ttiřin ɛad i teymart, u Necc ad carrɛeɣ jar ijjen zeg wuǧi d wuǧi nneɣni. 23 Necc ad xasen ssekkareɣ ijj n Umeksaw nni ten i ɣa yarewsen: Amsexxar inu Dawud. Netta ad ten yarwes u Netta ad asen yiři d Ameksaw. ^■   24 Necc, SIDI, ad asen iřiɣ d AREBBI u Amsexxar inu Dawud ad yiři d Řḥakem di řwest nsen, Necc, SIDI, aqa nniɣ t. ^■   25 Necc ad ggeɣ ijj n Řɛahd n řehna akidsen uca ad kkseɣ řewḥuc iwɛaren zi temmurt. Nitni ad zedɣen di řexřa s řaman uca ad ṭṭsen deg izeɣran. ^□   26 Ad ggeɣ min innḍen i wedrar inu d lbaraka u Necc ad dd-ssehwiɣ anẓar di řweqt nnes. Ad din yiři wenẓar aṭṭas s lbaraka. 27 Ticejjura n yeyyar ad wcent řɣiǧet nsent uca tammurt ad tewc ṣṣabet nnes uca nitni ad zedɣen di řaman di temmurt nsen. Xenni ad ssnen belli Necc d SIDI, xmi i ɣa arẓeɣ imqeǧaden n zzayřet nsen uca ad ten qeřɛeɣ zeg ufus n yinni ten ijjin ad asen sexxaren. 28 War ttiřin ɛad d tkeccaḍt i řegnus uca řewḥuc n temmurt war ten ṣarrḍen ɛad, maca nitni ad zedɣen di řaman u war ten issnexřiɛ uřa d ijj. 29 Necc ad asen dd-sduqqzeɣ ijj n uɣemmuy s ijj n Yisem icennɛen. Xenni war ttmeksin ɛad s řaẓ di temmurt uca war arebbun ɛad řḥegra n řegnus. ^■   30 Xenni ad ssnen belli Necc, SIDI AREBBI nsen, aqa ayi kidsen, uca nitni d řgens inu, taddart n Israil!, ammu i iqqar Sidi inu, SIDI. 31 Kenniw, a uǧi inu, uǧi n řmedweř inu n tarewsa, kenniw d bnadem, maca Necc d AREBBI nwem!, ammu i iqqar Sidi inu, SIDI.” ^■