1 Yusa-dd ɣari wawař n SIDI, inna:

2 “A mmis n bnadem, arr udem nnek ɣar wedrar n Saɛir u nabb xas. 3 Ini as: Ammu i iqqar Sidi inu, SIDI! Xzar, Necc ad ɣarek dd-aseɣ, a, adrar n Saɛir uca ad sswiẓẓḍeɣ afus inu ḍidd nnek uca ad cek arreɣ d tareddeǧt d řxarbet. 4 Necc ad arreɣ tineddam nnek d řxarbet u cek ad tdewřed d tareddeǧt u cek ad tessned belli Necc d SIDI, 5 minzi ɣarek řeɛdawat ittduman u minzi tsellmed ayt n Israil i tzemmar n ssif, di řweqt n uḍeyyeɛ nsen, di řweqt n řmuɛṣiyyet iqesḥen ař ṭṭarf.” ^■  

6 “S uya, s tidett am ddareɣ Necc, iqqar Sidi inu, SIDI: Necc ad cek arreɣ d idammen qaɛ u idammen ad cek ḍfaren. Wah umi war tcarhed ca asizzeř n idammen, ad cek ḍfaren idammen. 7 Necc ad arreɣ adrar n Saɛir d tareddeǧt d řxarbet u Necc ad zzayes qesseɣ wi iɛeddun d wi dd-idekkwařen. 8 Necc ad ccureɣ idurar nnes s yenni ittwanɣen, tiwririn nnek d teɣzurtin nnek, u inni ittwanɣen s ssif ad wḍan di marra tiɣezratin nnek. 9 Necc ad cek ggeɣ d tireddeǧin i řebda u tineddam nnek ɛemmarṣ war daysent ttwifen ɛad imezdaɣ, u kenniw ad tessnem belli Necc d SIDI,

10 minzi tennid: ‘Tnayen n řegnus nni d tnayen n temmura nni ad iřint inu u neccin ad tent ṭṭfen d řwart!’, am SIDI aqa-t din.” ^■  

11 “S uya, s tidett am ddareɣ Necc, iqqar Sidi inu, SIDI: Necc ad ac ggeɣ anect n weɣḍab nnek u anect n tusmi nnek nni tuɣa ɣarek deg wecrah nnek zzaysen, maca nitni ad ayi ssnen xmi xak ɣa ḥekmeɣ.

12 Ad tessned, belli Necc, SIDI, sřiɣ i marra aceqqaf nnek nni tessiwřed ḍidd i idurar n Israil, tennid: Aqa areddǧen, mmewcen aneɣ d macca.

13 Ammu i xafi tqeřbem s uqemmum nwem iccur s ukebbar uca tarnim tfarrɣem awařen nwem xafi aṭṭas. Necc sřiɣ t.

14 Ammu i iqqar Sidi inu, SIDI: Am tfarreḥ marra tammurt, Necc ad cek arreɣ d ict n řeɣrubiyyet.

15 Am mammec tfarḥed s tesɣart n taddart n Israil, minzi aqa tᵉttwareddeǧ, Necc ad kik ggeɣ ammu, a cek, adrar n Saɛir, cem marra tammurt n Idum, ad tiřid d tareddeǧt! Uca xenni nitni ad ssnen, belli Necc d SIDI.”