1 Yusa-dd ɣari wawař n SIDI, inna:

2 “A mmis n bnadem, siweř ak-d tarwa n řgens nnek, ini asen: Xmi i ɣa yawyeɣ ssif x temmurt uca řgens n temmurt ad iksi ijj n weryaz zi ṭṭrufa nnes uca ad t ggen d aɛessas i yixef nsen, 3 uca wanita itwařa yusa-dd ssif x temmurt, xenni ittṣuḍ deg uyicc n icarri uca iɛeǧem i řgens 4 uca aqa din ijjen isřa i uṣuḍi deg uyicc n icarri, maca war ijji ixef nnes ad zzayes ittwaɛřem uca yusa-dd ssif, ikkes i-t, xenni idammen nnes ad iřin x uzeǧif nnes. 5 Netta isřa i řḥess n uṣuḍi deg uyicc n icarri, maca war ijji ixef nnes ad ittwaɛřem, idammen nnes aqa aten xas, maca řeɛmar n wenni ijjin ixef nnes ad ittwaɛřem, ad injem.

6 Maca mařa aɛessas itwařa ssif yusa-dd uca war iṣuḍ deg uyicc n icarri, ařami war ittwaɛřem řgens uca ssif yusa-dd, ikkes ijj n řeɛmar jar asen, xenni aqa netta immeksi zi ssibbet n řmuɛṣiyyet n yixef nnes, maca Necc ad ttareɣ idammen nnes zeg ufus n uɛessas.”

7 “Cek, a mmis n bnadem, Necc ggiɣ cek d aɛessas x taddart n Israil. Ad tesřed ijj n wawař zeg uqemmum inu uca ad asen tɛeřmed zzayi. ^■   8 Umi Necc nniɣ i uɛeffan: ‘A aɛeffan, cek ad temmted řmewt!’, u cek war tessiwiřed maḥend ad tɛeřmed i uɛeffan x webrid nnes iweddaren, xenni ad immet uɛeffan nni s řmuɛṣiyyet nnes, maca Necc ad ttareɣ idammen nnes zeg ufus nnek. 9 Maca mařa cek tɛeřmed i uɛeffan x webrid nnes, maḥend ad as iḥeyyed uca netta war iḥeyyed x webrid nnes, xenni netta ad immet s řmuɛṣiyyet nnes, maca cek tessnejmed řeɛmar nnek.”

10 “Cek, a mmis n bnadem, ini i taddart n Israil: Ammu i tessawařem, teqqarem: ‘Iɛeddiyyen nneɣ d ddnub nneɣ aqa aten xaneɣ uca nhellek daysen, xenni mammec i ɣa neqqim neddar?’ ^■  

11 Ini asen: S tidett am ddareɣ Necc, iqqar Sidi inu, SIDI, ɛemmarṣ war areṭṭiɣ x řmewt n uɛeffan, maca ad arḍeɣ aɛeffan xmi i ɣa itub zeg webrid nnes uca ad iddar. Tubem, tubem zeg webriden nwem iɛeffnen, maɣar mayemmi i ɣa temmted, a taddart n Israil?” ^■  

12 “Cek, a mmis n bnadem, ini i tarwa n řgens nnek: Tasegda n umsegged war t issnejjim deg wass nni di ɣa ixḍa, uca tuɛeffna n uɛeffan war zzayes i ɣa inqareḍ deg wass nni di ɣa itub zi tuɛeffna nnes. Amsegged war izemmar ad iqqim iddar s tsegda nnes deg wass nni di ɣa ixḍa. ^■  

13 Umi nniɣ Necc i umsegged, aqa netta ad iddar s tidett, maca netta ittiqq di tsegda nnes uca igga řmuɛṣiyyet, xenni war tᵉttiři ɛad řidaret di tsegda nnes, maca di řɣecc nnes nni igga, aqa ad dayes immet.

14 Mařa Necc nniɣ i uɛeffan: Řmewt i ɣa temmted, uca netta itub x ddenb nnes uca ad igg řḥeqq d tsegda,

15 - aqa aɛeffan ad isseɛqeb ddiyyet nnes, ad ixeǧeṣ min ittwacaren, ad yuyur di tweṣṣa n tudart břa ma ad igg řɣecc -, xenni ad iddar s tidett, war ittmetti ca.

16 Marra ddnub nni igga, war dd as ttwaḥesseb ca. Igga řḥeqq d tsegda, ad iddar s tidett.”

17 “Tarwa n řgens nnek qqaren: ‘Abrid n SIDI war iǧi ca nican!’, umi abrid n simant nsen war iǧi ca nican. ^■  

18 Mařa amsegged iheyyeḍ x tsegda nnes uca ittegg řɣecc, xenni ad dayes immet,

19 uca xmi i ɣa itub uɛeffan x tuɛeffna nnes uca ad igg řḥeqq d tsegda, xenni ad zzayes iddar. 20 Ɛad teqqarem: ‘Abrid n Sidi war iǧi ca nican!’ Necc ad xawem ḥekmeɣ, a taddart n Israil, kuř ijj amecnaw ibriden nnes.”

21 Deg useggʷas wiss tenɛac n lmenfa nneɣ, deg uyur wiss ɛecra, deg wass wiss xemsa n uyur, imsar aqa yusa-dd ɣari ijj n umarwař zi Urcalim, inna: “Tandint tᵉttwaɣelleb!”^■   22 Ɣar ǧiřet tuɣa ufus n SIDI xafi, qbeř dd ɣa yas umarwař, u Netta yarzem ayi aqemmum umi dd-yusa umarwař ɣari di ṣṣbeḥ. Tuɣa aqemmum inu ittwarzem uca war ttiřiɣ ɛad d aynaw. 23 Yusa-dd ɣari wawař n SIDI, inna:

24 “A mmis n bnadem, imezdaɣ n řxirbat-a di temmurt n Israil ssawařen, qqaren: ‘Ibrahim tuɣa-t d ijj uca iwart tammurt-a. Neccin řexxu deg waṭṭas, temmewc aneɣ temmurt d tasɣart!’ 25 S uya, ini asen: Ammu i iqqar Sidi inu, SIDI: Kenniw tᵉttetem aysum ak-d idammen uca tessgeɛɛadem tiṭṭawin nwem ɣar imeyḍa n laṣnam nwem uca tessazzařem idammen. Ma iɛeddeř ad tᵉṭṭfem kenniw tammurt d řwart? ^■   26 Tettbeddam x ssif nwem. Tetteggem jjɛifect u kuř aryaz issxemmaj tamɣart n umqarreb nnes. Ma iɛeddeř ad tᵉṭṭfem kenniw tammurt d řwart?’

27 Ammu i d asen ɣa tinid: Ammu i iqqar Sidi inu, SIDI: ‘S tidett am ddareɣ Necc, aqa inni iǧan x řxirbat ad wḍan s ssif, u wenni iǧan x wudem n yeyyar ad t wceɣ i řewḥuc n řexřa maḥend ad t ṣarḍen, uca inni iǧan di lqelɛat u deg ifran ad mmten s ṭṭaɛun! 28 Maɣar Necc ad arreɣ tammurt d areddeǧ d ijj n umedya n warjef, uca nnfaxet n ṣṣulṭa nnes ad tᵉttwasbedd. Idurar n Israil ad ttwareddǧen ařami war din wi xasen i ɣa iẓwan. 29 Xenni ad ssnen belli Necc d SIDI, xmi i ɣa arreɣ tammurt d areddeǧ d ijj n umedya n warjef zi ssibbet n jjɛayef nsen nni ggin.’ ”

30 “Cek, a mmis n bnadem, ayt n řgens nnek ssawařen xak ɣar řeḥyuḍ u ɣar wadaf n tudrin. Ijj issawař ak-d wenneɣni, kuř ijj ak-d umas, uca iqqar: ‘Asem-dd xenni uca sřem man awař i dd iffeɣ zeg uqemmum n SIDI!’ 31 Nitni ad ɣarek dd-asen am mammec i dd-yusa ijj n ubarru n řgens, uca nitni ad qqimen zzatek am řgens inu uca ad sřen i wawařen nnek, maca war zzaysen tteggen, maɣar s uqemmum nsen ssniɛmiřen tayri, maca uř nsen iggur awarni i řefḍeř n yixef nsen. ^■   32 Uca xzar, aqa cek ɣarsen amecnaw wenni ittɣennajen izřan s tmijja teṣbeḥ, amecnaw wenni izemmaren ad igga lmusiqa mliḥ. Nitni ad sřen ɣar wawařen nnek, maca war zzaysen tteggen. 33 Maca řami aya ad dd-yas - xzar, ad dd-yas! - xenni ad ssnen belli tuɣa ijj n unabi di řwest nsen.”