1 Imsar deg useggʷas wiss tenɛac, deg uyur wiss tenɛac, deg wass amezwaru n uyur, aqa yusa-dd ɣari wawař n SIDI, inna: 2 “A mmis n bnadem, sgeɛɛed ijj n yezři n wecḍan x Firɛun, ajeǧid n Miṣra, uca ini as:

Tuɣa cek amecnaw ayrad d ameẓyan jar řegnus,

u tuɣa cek am řhaycet di řebḥur.

Tɣeḍřed ixef nnek deg iɣezran,

tessenhezzed aman s iḍaren nnek,

uca tessefsad iɣezran nsen. ^■  

3 Ammu i iqqar Sidi inu, SIDI:

Necc ad xak sswiẓẓḍeɣ tracca inu,

s yijj n wegraw n řegnus aṭṭas.

Nitni ad cek ssiřyen ak-d tracca inu. ^■  

4 Necc ad cek jjeɣ di temmurt,

ad cek nḍareɣ x wudem n yeyyar.

Ad xak sszedɣeɣ marra ijḍaḍ n ujenna,

uca ad zzayek ssjiwneɣ imuddaren zi marra tammurt.

5 Ad ggeɣ weysum nnek x idurar,

uca ad ccureɣ tiɣzurin s řegɛudi n warrayem nnek.

6 Necc ad ssesweɣ tammurt,

ad tedweř d řebḥar n idammen nnek ɣares ař tiqiccatin n idurar,

uca tiɣezratin ad ccurent zzayek

7 Necc ad ssduřyeɣ ajenna xmi cek ɣa ssxesyeɣ,

uca ad ssbarrecneɣ itran.

Necc ad ssduřyeɣ tafuct s iseynuten,

uca taziri war ttejji ɛad tafawt nnes ad tarɣa. ^■  

8 Marra tifawin yareqqen deg ujenna

ad tent ssbarrecneɣ di ṭṭweɛ nnek,

uca ad ssekkeɣ taǧest x temmurt nnek!,

ammu i iqqar Sidi inu, SIDI.

9 Necc ad ɣezziɣ uř n waṭṭas n řegnus,

umi i ɣa yawyeɣ řexbar n treẓẓit nnek ɣar řegnus,

ɣar temmura i war tent tessined ca.

10 Necc ad ssnexřɛeɣ aṭṭas n řegnus di ssibbet nnek,

u acewwaf n ijeǧiden nsen ad geɛɛden zeg warjef di ṭṭweɛ nnek,

xmi i ɣa ssenhezzeɣ ssif inu ssa d ssa zzat i wudmawen nsen.

Nitni ad arjijen řebda,

kuř ijj di ssibbet n tudart nnes,

deg wass n uweṭṭu nnek. ^□  

11 Minzi ammu i iqqar Sidi inu, SIDI:

Ssif n ujeǧid n Babil ad xak yemmars.

12 S řesyuf n ayt n bu-teɣruḍt ad ɣeḍřeɣ řɣaci nnek inhewřen,

řegnus iqesḥen aṭṭas marra.

Nitni ad qḍan x nnfaxet n Miṣra,

uca marra řɣaci nnes inhewřen ad t teḥḥan. ^■  

13 Necc ad qḍiɣ x imuddaren nnes inni iǧan ɣar waṭṭas n waman,

uřa d ijj n uḍar n bnadem izemmar ad ten issarwi ɛawed,

uca uřa d ict n tecḍect n řmař tzemmar ad ten tessarwi ɛad.

14 Xenni ad ssehwiɣ aman nsen ařami i ɣa ṣfan

u Necc ad ggeɣ iɣezran nsen ad ssizzřen am zzect!’,

ammu i iqqar Sidi inu, SIDI.

15 Ařami ggiɣ tammurt n Miṣra d areddeǧ,

uca ad tiři temmurt tᵉttwareddeǧ, teḥfa zi marra min dayes,

ařami wteɣ marra inni dayes izeddɣen,

xenni ad ssnen belli Necc d SIDI.

16 Wa d izři n wecḍan uca ad t ɣennjen am yezři n wecḍan, yessitsent n temmura ad t ɣennjent am yezři n wecḍan, ad t ɣennjent am yezři n wecḍan x Miṣra u x marra řɣaci nnes inhewřen!, ammu i iqqar Sidi inu, SIDI.”

17 Deg useggʷas wiss tenɛac, deg wass wiss xemmesṭac n uyur, imsar belli yusa-dd ɣari wawař n SIDI, inna:

18 “A mmis n bnadem, wwet agejdur x řɣaci inhewřen n Miṣra. Ejj i-t ad ihwa, Miṣra d yessis n řegnus ijehden, di řaǧaɣ n temmurt, ak-d yenni ihwan deg weḥfur n wenḍeř.

19 Ma cek iɛizzen x man mma?

Hwa, ejj ad cek ssarsen ak-d yenni war ittwaxetnen.

20 Ad wḍan di řwest n yinni ittwanɣen s ssif.

Aqa immewc ssif.

Jarr Miṣra zeg webrid ak-d marra řɣaci nnes inhewřen.

21 Inni ɣar teǧa ṣṣulṭa aṭṭas zeg ayt n bu-teɣruḍt ad kis ssiwřen

zi řwest n řaxart.

Hwan nitni, aqa zzřen dinni,

inni war ittwaxetnen,

inni ittwanɣen s ssif.

22 Diha iǧa Accur ak-d marra agraw nnes,

nnḍen as-dd imeḍřan nnes.

Marra nitni ttwanɣen, wḍan s ssif.

23 Imeḍřan nnes aqa aten di tɣemmar n weḥfur n wenḍeř

u agraw nnes aqa-t deg wenneḍ n wenḍeř nnes.

Marra nitni ttwasnuqqben, wḍan s ssif,

inni tuɣa issaggʷaden di temmurt n yinni iddaren.

24 Diha Ɛilam d marra řɣaci nnes inhewřen deg wenneḍ n wenḍeř nnes.

Marra nitni ttwasnuqqben, wḍan s ssif,

hwan břa axtan di řaǧaɣ n temmurt,

inni tuɣa issaggʷaden di temmurt n yinni iddaren.

Nitni iwyen řefḍiḥet nsen akidsen,

ak-d yenni ihekkwan deg weḥfur n wenḍeř.

25 Ggin as ijj n arruf di řwest n yinni ittwanɣen,

ɣar marra řɣaci nnes inhewřen.

Imeḍřan nnes nnḍen as-dd.

Marra nitni war ittwaxetnen, wḍan s ssif,

minzi tuɣa ssaggʷaden iwdan zeg yixef nsen

di temmurt n yinni iddaren.

Nitni iwyen řefḍiḥet nsen akidsen,

jmiɛ ak-d yenni ihekkwan deg weḥfur n wenḍeř.

Aqa netta ittwassars di řwest n yinni ittwanɣen.

26 Diha Macix-Tubal d marra řɣaci nnes innhewřen.

Nnḍen as-dd imeḍřan nnes.

Marra nitni war ttwaxetnen,

ttwasnuqqben s ssif,

maɣar nitni tuɣa ssaggʷaden iwdan zeg yixef nsen

di temmurt n yinni iddaren.

27 War zziřen ak-d ayt n bu-teɣruḍt,

inni iwḍan zeg yenni war ittwaxetnen,

inni ihwan ɣar řaxart ak-d řesnaḥ nsen n umenɣi.

Mmarsen řesyuf nsen sadu izeǧifen nsen

uca řmuɛṣiyyet nsen aqa-tt x yeysan nsen,

waxxa tuɣa nitni d tiggʷudi i ayt n bu-teɣruḍt di temmurt n yinni iddaren.

28 Uřa d cek ad tiřid tarẓed di řwest n yinni war ittwaxetnen

uca ad tezzřed ak-d yenni ittwasnuqben s ssif.

29 Diha Idum, ijeǧiden nnes d marra řḥukkam nnes,

inni i din izzřen s marra ṣṣulta nsen

ak-d yenni ittwasnuqqben s ssif.

Zzřen dinni ak-d yenni war ittwaxetnen

u ak-d yenni ihwan deg weḥfur n wenḍeř.

30 Diha ayt n bu-ṣṣulṭa zi Ccmal, marra nitni,

u marra ayt n Ṣidun, inni ihwan ak-d yenni ittwanɣen.

Aqa ttseḍḥan dinni, waxxa tuɣa ssaggʷaden iwdan

s teryast nsen n ayt n bu-teɣruḍt.

Aqa zzřen dinni ak-d yenni ittwanɣen s ssif

uca arebbun řefḍiḥet nsen

ak-d yenni ihwan deg weḥfur n wenḍeř.

31 Firɛun ad ten iẓar uca ad ittwasfewwej

zi marra řɣaci nnes inhewřen, inni ittwasnuqqben s ssif,

Firɛun d marra řɛeskar nnes!’,

ammu i iqqar Sidi inu, SIDI.

32 Minzi Necc jjiɣ t ad issiggʷed inni di temmurt n yinni iddaren.

Netta ad immars di řwest n yinni war ittwaxetnen,

ɣar yenni ittwasnuqqben s ssif,

Firɛun d marra řɣaci nnes inhewřen!,

ammu i iqqar Sidi inu, SIDI.”