Izři n wecḍan x Ṣur
27
1 Yusa-dd ɣari wawař n SIDI, inna: 2 “Cek, a mmis n bnadem, sgeɛɛed ijj n weẓri n wecḍan, x Ṣur. 3 Ini i Ṣur, tandint i din izeddɣen ɣar tewwura n řebḥar, tandint nni ittsebbaben ak-d řegnus nni izeddɣen di temmura aṭṭas ɣar tma n řebḥar: Ammu i iqqar Sidi inu, SIDI:
A Ṣur, cem teqqared: ‘Necc aqa ayi nican deg waẓri!’■
4 Iymiren nnem aqa aten deg wuř n řebḥur,
inni cem ibnan aqa ggin aẓri nnem nican.
5 Marra tiřwiḥin n tfeřwin n tɣarruba nnem ggin tent i cem
di tnayen zi tcejjura n umerzi,
iwyen ticejjura n tengelt zi Lubnan,
maḥend ad am ggen tiḥenya i řbaccat. □
6 Zi tcejjura n řbeǧuḍ n Bacan ggin řemqadef nnem,
řbankuwat nnem i iqeddafen aqa atent zi řɛaj
ittwagg deg ukeccud n tengelt,
iwyen t zi temmura x tma n řebḥar n ayt n Kittim. □ ■
7 Řbacc nnem tuɣa-t s řeqṭen azdad zi Miṣra,
xeyyḍen t s waṭṭas n tintat.
Řbacc tuɣa i cem d taɛeǧant.
Tasqift n uqiḍun nnem tuɣa-tt zeg udehmani d arjuwani,
zi temmura x tma n řebḥar n Ilica.
8 Imezdaɣ n Ṣidun u n Arwad tuɣa aten d iqeddafen nnem,
imiɣisen nnem, a Ṣur, nni dayem iǧan,
tuɣa aten d ineddahen nnem.
9 Iwessura n Jubayl d imiɣisen nnes tuɣa aten dayem,
tuɣa ɛeddřen marra tizza nnem.
Marra tiɣarruba n řebḥar d ibeḥriyyen nsen usin-dd ɣarem ḥima ad kidem sebbeben.
10 Ayt n Lfurṣ, n Lud u n Fuṭ tuɣa aten di řɛeskar nnem, iryazen iɛeskariyyen. Uyřen dayem taseddart nsen d lkask nsen uca wcin am řɛezz.
11 Ayt n Arwad d řɛeskar nnem tuɣa aten x řeḥyuḍ nnem, uca Igammadiyyen, ayt n bu-teryast nnem, bedden x ssumɛat nnem. Tiseddariyyen nsen iqesḥen n useřqi tuɣa uyřent deg wenneḍ x řeḥyuḍ uca arnint deg waẓri nnem aṭṭas.
12 Tarcis tuɣa ittsebbab akidem i ssibbet n ufeyyeḍ n ɛřam kuř igeřwan. Nitni wcin am nnuqart, uzzař, astanyu d řexfif di ṭṭweɛ n sseřɛet nni d asen tezzenzed.
13 Yawan d Tubal d Macix tuɣa aten d isebbaben nnem. Nitni wcin am řeɛmur n iwdan d řeqcuɛ n nnḥas di ṭṭweɛ n sseřɛet nnem.
14 Zi taddart n ijeǧiden n Tujarma wcin am iysan d imnayen d iserdan di ṭṭweɛ n sseřɛet nni d asen tezzenzed.
15 Arraw n Dadan tuɣa aten d isebbaben di ṭṭweɛ nnem. Aṭṭas n temmura x tma n řebḥar tuɣa xsent ad ṭṭfent sseřɛet zeg ufus nnem. Tiɣmas timeqqranin n řfiř d ukeccuḍ n webnus arrint am tent-i-dd. □
16 Aram tuɣa ittsebbab akidem x waṭṭas n řeqcuɛ i tṣennɛed. Nitni wcin am karbunkel d ajurwani d lburḍa s tintat ifarzen d řeqṭen azdad d řmarjan d řeɛqaq izeggwaɣen di ṭṭweɛ n sseřɛet nni d asen tqeddmed.
17 Yahuda d temmurt n Israil tuɣa ttsebbaben akidem. Nitni wcin am imendi zi Minnit uřa d ḥalawit, tamment, zzect d balsam di ṭṭweɛ n sseřɛet nnem.
18 Dimacq tuɣa ittsebbab akidem deg waṭṭas n řeqcuɛ i tṣennɛed, x marra igeřwan nnem, s binu n Xilbun d tḍuft tacemřařt.
19 Di ṭṭweɛ n sseřɛet nni d asen tezzenzed, wcin am Wadan d Yawan uzzař n wemziř d qassiya d uɣanim uḥemmum ittfuḥen zi Uzal.
20 Dadan tuɣa ittsebbab akidem s werruḍ n tbardiwin i uneddah.
21 Iɛraben di řwaṭat d marra řḥukkam n Qidar tuɣa ttsebbaben akidem. Deg izemrawen d icarriyyen d iɣayḍen tuɣa ttsebbaben akidem.
22 Isebbaben n Caba d yenni n Raɛma tuɣa aten d isebbaben nnem. Nitni wcin řemxeyyer n řeɛṭur d ɛřam kuř iẓra iɣřan d wureɣ di ṭṭweɛ n sseřɛat nni d asen tqeddmed.
23 Ḥaran d Kinna d Ɛadan, isebbaben n Caba, Accur d Kilmad, tuɣa ttsebbaben akidem. 24 Nitni tuɣa ttsebbaben akidem deg řeɛbayat icenɛen d iseřhamen ideḥmiyyen d lburḍat tiqarqacin u di řkettan iɣřan s ifiřan n tintat ifarzen, inni iǧan jar sseřɛet nnem s tesɣunin ijehden ittwamuden.
25 Iɣarruba n Tarcic tuɣa aten d ikaravanen nnem.
“Tuɣa cem dinni, teccured u tdeqřed aṭṭas,
deg wuř n řebḥur,
26 Iqeddafen nnem iwyen cem ɣar waman yuɛřan,
asemmiḍ zi ccarq yarẓa cem deg wuř n řebḥur. ■
27 Igeřwan nnem d sseřɛet nni tezzenzed d tsebbabt nnem,
ibeḥriyyen nnem d ineddahen nnem d yenni iɛeddřen tireẓẓa nnem,
d isebbaben nni ittsebbaben akidem,
d marra iɛeskariyyen, inni akidem
u ak-d marra agraw di řwest nnem,
ad wḍan marra deg wuř n řebḥur,
deg wass n uweṭṭu nnem. ■
28 Zi řḥess n tɣuyyit n ineddahen nnem,
ad arjijen dcurat nnem. ■
29 Ad hwan zi tɣarruba,
marra inni iṭṭfen timeqdafin,
marra ibeḥriyyen d marra ineddahen nnem,
ad bedden x temmurt,
30 uca ad ssgeɛɛden tmijja nsen,
ad sɣuyyen s imeṭṭawen imarzagen,
ad nḍaren ucař x izeǧifen nsen,
ad marɣen deg iɣɣeḍ,
31 uca ad ḥeffen ixef nsen zi ssibbet nnem
uca ad beysen s txuncay n wecḍan,
uca ad xam run,
s řeɛmar iccur s tarzugi u s tɣuyyit tamerzagt. ■
32 Am ttweḥwiḥen ad xam ssgeɛɛden ijj n izři n wecḍan,
uca ad xam wten agejdur,
ad inin: ‘Man wen iǧan amecnaw Ṣur,
amecnaw tandint ittwahedmen di řwest n řebḥar?
33 Řami dd-iwyen sseřɛet nnem zeg ujemmaḍ n řebḥur,
tuɣa tessjiwned aṭṭas n řegnus.
S waṭṭas n igeřwan nnem d tsebbabt nnem,
tarrid ijeǧiden n temmurt d ttwajar.
34 Di tsaɛɛet nni di tᵉttwarẓed s řebḥur, di řmehmud n waman,
tuɣa tewḍa tsebbabt nnem marra u marra agraw i ɣarem.
35 Marra imezdaɣ n temmura
x tma n řebḥar ttbehten,
u ijeǧiden nsen ttarjifen,
ttnexřaɛen udmawen nsen.
36 Isebbaben jar řegnus ad xam ṣeffaren,
aqa tdewřed d ijj n umedya i warjef,
uca war tᵉttiřid ɛad i řebda.” ■