1 Yusa-dd ɣari wawař n SIDI, inna:

2 “A mmis n bnadem, ini i řḥakem n Ṣur: ‘Ammu i iqqar Sidi inu, SIDI: Minzi tessgeɛɛded uř nnek, tennid: Necc d arebbi, necc ttɣimiɣ x řkursi n arebbi di řwest n řebḥur!, waxxa cek d bnadem, war teǧid d arebbi, aqa teggid uř nnek xenni amecnaw uř n ijj n arebbi. ^■   3 Xzar, cek d amiɣis x Daniyil, war din iǧi ca uřa d ijj n ssirr xak innuffaren. 4 S tiɣit nnek d řefhamet nnek aqa tessmuned i yixef nnek igeřwan mɣaren u teggid ureɣ d nnuqart deg ixxamen nnek n txubay. 5 S tiɣit nnek imɣaren ɣar tsebbabt nnek, tarnid deg igeřwan nnek uca di ssibbet n igeřwan nnek mɣaren, issgeɛɛed wuř nnek ixef nnes. 6 S uya, ammu i iqqar Sidi inu, SIDI: Umi teggid uř nnek amecnaw uř n ijj n arebbi, 7 x uya, xzar, Necc ad xak dd-awyeɣ ibarraniyyen, řegnus iqesḥen aṭṭas. Nitni ad dd-jebden řesyuf nsen ḍidd i weẓri n tiɣit nnek uca ad ssfesden tissiqt nnek. ^■   8 Nitni ad cek ssehwan deg weḥfur n wenḍeř uca ad temmted řmewt n yinni ittwasnuqqben deg wuř n řebḥur. 9 Ma tzeɛmed s tidett ad tinid zzat i wudem n yinni cek i ɣa inɣen: ‘Necc d ijj n arebbi!’. Aqa cek d bnadem, war iǧi d arebbi deg ufus n yinni i cek i ɣa ideǧen.

10 Ad temmted s ufus n ibarraniyyen am yenni war ittwaxetnen, maɣar Necc nniɣ t!, ammu i iqqar Sidi inu, SIDI.’ ”

11 Yusa-dd ɣari wawař n SIDI, inna:

12 “A mmis n bnadem, sgeɛɛed ijj n yezři n wecḍan, x ujeǧid n Ṣur uca ini as: ‘Ammu i iqqar Sidi inu, SIDI:

A cek, d wenni d řxatem n řebni ifarzen,

teccured s tiɣit u tkemmřed deg weẓri! ^■  

13 Tuɣa cek di Ɛadn, di jjennet n AREBBI.

Tuɣa dřin cek s ɛřam kuř iẓra iɣřan,

s řeɛqaq, tyaqut d dyamanti,

s tkrisulit, biril d yaspis,

s ṣaffir aziza, karbunkel, smaraxt d wureɣ.

Řxedmet n ibendiren nnek d ubarru n temɣarin nnek tuɣa-tt dayek,

deg wass nni di dd-tᵉttwaxeřqed tuɣa wejdent.

14 Tuɣa cek d ijj n ukirub d amedhun issduřuyen,

ammu i ggiɣ cek din.

Tuɣa cek x wedrar iqeddsen n arebbi,

teggured di řwest n iẓra itteḥduduqen. ^□  

15 Tuɣa cek tkemmřed deg ibriden nnek,

zeg wass nni di dd-tᵉttwaxeřqed,

ař dayek tᵉttwaf řmuɛṣiyyet.

16 S řemɣaret n tsebbabt nnek,

iccur daxeř nnek s řexcunect uca xenni texḍiḍ.

S uya ad cek ssiggʷejeɣ x wedrar n arebbi,

ad cek mḥiɣ zi řwest n iẓra itteḥduduqen,

a cek akirub issduřuyen!

17 Uř nnek issgeɛɛed ixef nnes s waẓri nnek,

aqa tessɛiǧted tiɣit nnek s tissiqt nnek iɛeffaren.

Necc nḍareɣ cek x temmurt,

uca arriɣ cek zzat i wudem n ijeǧiden,

ařami zemmaren ad ɣarek dd-xzaren s řḥegra.

18 Zi ssibbet n waṭṭas n řmuɛṣiyyet nnek

d řɣecc n tsebbabt nnek,

aqa tɣesbed tizawiyyin nnek iqeddsen.

S uyenni arriɣ timessi teffeɣ-dd zi řwest nnek,

tenni cek iccin,

uca arriɣ cek d iɣɣeḍ x temmurt

zzat i tiṭṭawin n marra inni cek ittwařan.

19 Marra inni cek issnen jar řegnus,

arejfen zzayek.

Tdewřed d ijj n umedya n warjef

u war tᵉttiřid ɛad i řebda.’ ”

20 Yusa-dd ɣari wawař n SIDI, inna:

21 “A mmis n bnadem, arr udem nnek ɣar Ṣidun uca nabb ḍidd nnes, 22 uca ini: ‘Ammu i iqqar Sidi inu, SIDI: Xzar, Necc aqa ayi ḍidd nnem, a tandint n Ṣidun! Necc ad ttwasɛuǧeɣ di řwest nnek uca nitni ad ssnen belli Necc d SIDI xmi dayes i ɣa ggeɣ řeḥkamat uca ad zzayes ttwaqeddseɣ. 23 Ad ssekkeɣ ṭṭaɛun di řwest nnes uřa d idammen deg ibriden nnes u wenni ittwanɣen ad iwḍa di řwest nnes s ssif nni xas i ɣa yiřin zeg wenneḍ nnes. Xenni ad ssnen, belli Necc d SIDI, 24 uca ɛemmarṣ ɛad ad yiři i taddart n Israil asennan iqebcen niɣ tazeggʷart itteqqsen zeg inni d asen dd-innḍen, inni ten isseḥqarran. Nitni ad ssnen belli Necc d Sidi, d SIDI i ǧiɣ.’ ”

25 “Ammu i iqqar SIDI inu, SIDI: Xmi i ɣa ssmuneɣ taddart n Israil zi řegnus nni mani ttwabezzɛen nitni, uca Necc ssecneɣ-dd ixef inu d Amqeddes daysen zzat i tiṭṭawin n řegnus, xenni ad zedɣen di temmurt nni wciɣ i umsexxar inu Yaɛqub. 26 Nitni ad zedɣen di řaman uca ad bnan tudrin, ad ggen imarjaɛen n uḍiř u ad daysen ẓẓun tizayarin, wah nitni ad din zedɣen di řaman awarni řami ggiɣ řeḥkamat x marra inni ten ikeccḍen zi temmura i d asen dd-innḍen. Xenni ad ssnen belli Necc d SIDI, AREBBI nsen.” ^■