1 Imsar deg useggʷas wiss ḥiṭɛac, deg wass amezwaru n uyur, aqa yusa-dd ɣari wawař n SIDI, inna:

2 “A mmis n bnadem, umi tenna tendint n Ṣur x Urcalim: ‘Iya ayuz, aqa tᵉttwareẓẓa, tawwart n řegnus tᵉttwarzem ayi. Necc ad ɣari yiři wagřa aṭṭas, umi nettat tᵉttwareddeǧ řexxu!’ 3 S uya, ammu i iqqar Sidi inu, SIDI: Xzar, Necc ǧiɣ ḍidd nnek, a Ṣur! Ad xam ssekkareɣ aṭṭas n řegnus, amecnaw řmedd n řebḥar ak-d řemwaj nnes. 4 Nitni ad areddǧen řehyuḍ n tendint n Ṣur uca ad arẓen ṣṣumɛat nnes u Necc ad xas kkseɣ acař nnes uca ad tt arreɣ d taṣḍart taqeccart. 5 Ad din tiři di řwest n řebḥar maḥend ad xas bezzɛen tiracciwin, minzi Necc nniɣ t, ammu i iqqar Sidi inu, SIDI, u nettat ad tiři d takeccaḍt i řegnus. 6 Yessis nni iǧan deg iyyar, ad ttwanɣent s ssif u nitni ad ssnen belli Necc d SIDI.”

7 “Minzi ammu i iqqar Sidi inu, SIDI: Xzar, zi ccamal ad ssiwḍeɣ Nabuxadraṣṣar, ajeǧid n Babil, x Ṣur, ajeǧid n ijeǧiden, ak-d iysan d ikarruten, ak-d imnayen, u ak-d ijj n wegraw d ijj n řgens ameqqran. ^□   8 Ad ineɣ s ssif yessim nni yeǧan deg iyyar, ad issbedd řqammat ḍidd nnem, ad ibna ijj n wecbar ḍidd nnem u ad issbedd ḍidd nnem ict n tesqift ttwaggen tt s tseddariyin timeqqranin. 9 Netta ad igg icarriyyen n wedham ḍidd i řeḥyuḍ nnem uca ad issḥeyyed ssumɛat nnem s řesyuf nnes.

10 Ad ac ideř řeɛjaj n ubarru n yeysan nnes, s zzhir n imnayen d uqarqeb n tjarrarin d ddriz n ikarruten ad arjijen řeḥyuḍ nnem xmi i ɣa yadef x tewwura nnem am dd-udfen x ict n tendint tᵉttwahdem.

11 S icucca n yeysan nnes ad iɛfes x ibriden nnem marra, ad ineɣ řgens nnem s ssif uca ipilaren nnem ijehden iqeddsen ad wḍan ɣar temmurt. ^□  ■  

12 Nitni ad acaren agřa nnem ad keccḍen tasebbabt nnem, ad areddǧen řeḥyuḍ nnem, ad ɣeḍřen tudrin nnem iɛizzen. Iẓra nnem d tḥenya n ukeccud nnem d řeɛjaj nnem ad ten mmenḍaren deg waman.

13 Ammu i ɣa ssesqareɣ ddriz n iẓřan nnem, uca řḥess n řgambriyat nnem war ittwaseř ɛad. ^■  

14 Ad cem arreɣ d taṣḍart taqeccart i wefsar n tracciwin i tneymart n iseřman. Ɛemmarṣ ad tᵉttwabnid ɛawed, minzi Necc, SIDI, nniɣ t!, ammu i iqqar Sidi inu, SIDI.”

15 “Ammu i iqqar Sidi inu, SIDI i tegzirt n Ṣur: Ma war ttarjijint temmura x tma n řebḥar s řḥess n uweṭṭu nnem, xmi ssbuɛruren inni ittwayezzmen i řmewt, xmi i ɣa temsar ict n tecti ineqqen di řwest nnem?

16 Marra řḥukkam n řebḥar ad dd-hwan zi řekrasi nsen igellden uca ad ɣeḍřen iḥacen nsen, ad kksen arruḍ nsen iburḍaren s tintat ifarzen. Ad řeḥḥfen s arjef, ad qqimen x temmurt uca ad arjijen di kuř řweqt uca ad xam nxeřɛen.

17 Ad xam ssiřyen ijj n wezři n wecḍan, ad am inin:

Mammec tᵉttwateḥḥid,

a cem, tenni i di zedɣen inni dd-iffɣen zi řebḥar,

a cem tandint icenɛen,

tenni ijehden aṭṭas di řebḥar,

cem a Ṣur d imezdaɣ nnes,

tenni itteggen arjef jar asen,

di marra inni dayes izedɣen. ^□  ■  

18 Řexxu ad arjijent temmura x tma n řebḥar

deg wass n uweṭṭu nnem,

wah timmura x tma n řebḥar

ad nnxeřɛent s uneggar nnek.”

19 “Minzi ammu i iqqar Sidi inu, SIDI: Xmi Necc cem ɣa yarreɣ d tandint ittwaredǧen amecnaw tineddam nni war izdiɣen, xmi xam i ɣa ssiwḍeɣ aman yuǧɣen uca xmi aṭṭas n waman ad cem dřen, 20 xenni ad cem dd-ssehwiɣ ak-d yenni dd-ihwan deg weḥfur n wenḍeř, ɣar řgens n řweqt n zic. Ad cek ssarseɣ di řaǧaɣ n temmurt, di řxirbat n řweqt n zic, ɣar inni dd-ihwan deg weḥfur n wenḍeř, ḥima war dayem ttiřin imezdaɣ ɛad. Maca di temmurt n yinni iddaren ad wceɣ řɛezz. 21 Ad cem arreɣ d ijj n umedya n warjef uca war tᵉttiřid ɛad. Ad xam arzun uca war tᵉttwifid ɛemmarṣ i řebda, ammu i iqqar SIDI inu SIDI.”