1 Yusa-dd ɣari wawař n SIDI, inna:

2 “A mmis n bnadem, arr udem nnek ɣar ayt n Ɛammun uca nabb xasen. ^■   3 Ini i ayt n Ɛammun: ‘Sřem i wawař n Sidi inu, SIDI! Ammu i iqqar Sidi inu, SIDI: Umi tennid ‘Ya, ayuz!’ x Zzawect inu Iqeddsen umi tt ssɛiǧten, u x temmurt n Israil umi tt areddǧen, uřa x taddart n Yahuda řami ten iwyen ɣar lmenfa, 4 s uya, xzar, Necc ad wceɣ cem a, tammurt n Ɛammun d tasɣart i yenni dd-yusin zi ccarq uca nitni ad ggen řemrageḥ nsen dayem uca ad arren tizeddiɣin nsen dayem. Nitni ad ccen řɣiǧet nnem uca ad swen aceffay nnem. ^□   5 Necc ad ggeɣ Rabba d amcan n arraḥet i iřeɣman uca tammurt n ayt n Ɛammun d ddmani n ureyyeḥ i wuǧi uca kenniw ad tessnem belli Necc d SIDI.’ ”

6 “Minzi ammu i iqqar Sidi inu, SIDI: Umi tewtid ifassen nnek ijj deg wenneɣni s řefraḥet, tedzed s uḍar u tfarḥed s marra nnfaxet nnek di řeɛmar x temmurt n Israil, 7 s uya, xzar, Necc ad sswiẓẓḍeɣ afus inu ḍḍid nnek uca ad cek arreɣ d takeccaḍt i řegnus u ad cek qeḍɛeɣ zi jar řegnus uca ad kenniw teḥḥiɣ zi temmura. Ad cek areddǧeɣ uca ad tessned aqa Necc d SIDI.”

8 “Ammu i iqqar Sidi inu, SIDI: Umi Mu’ab d Saɛir qqaren: Xzar, taddart n Yahuda teǧa amecnaw marra řegnus!, ^■   9 s uya, xzar, Necc ad arzmeɣ aɣezdis n zzat n Mu’ab, zi tneddam, zi tneddam nnes nni iǧan ɣar ṭṭarf qaɛ, talwizt n temmurt: Bayt-Yacimut, Baɛl-Maɛun d Qiryatayim.

10 Necc ad tent wceɣ d tasɣart i ayt n ccarq jmiɛ ak-d temmurt n ayt n Ɛammun, ḥima war tᵉttiři ɛad řidaret deg ayt n Ɛammun jar řegnus. ^■  

11 Ad ssiwḍeɣ řeḥkamat x Mu’ab u nitni ad ssnen, belli Necc d SIDI.”

12 “Ammu i iqqar Sidi inu, SIDI: Umi Idum igga s nneqmet waha ḍidd i taddart n Yahuda uca umi idweř daysen řɛib aṭṭas umi zzaysen neqmen,

13 s uya, ammu i iqqar Sidi inu, SIDI, ad sswiẓẓḍeɣ afus inu ḍidd i Idum uca ad zzayes qeḍɛeɣ bnadem d řmař uca ad t ggeɣ d řxirbet zi Tayman, uca ad wḍan s ssif ař Dadan.

14 Necc ad ssiwḍeɣ nneqmet inu x Idum s ufus n řgens inu Israil u nitni ad ggen ak-d Idum ɛlaḥsab aɣḍab inu u ɛlaḥsab asɛar inu. Ammu i ɣa ssnen nneqmet inu!, iqqar Sidi inu, SIDI.”

15 “Ammu i iqqar Sidi inu, SIDI: Umi Ifilisṭiniyyen ggin s nneqmet u neqmen s nnfaxet n wuř umi areddǧen nitni zi řeɛdawet ittduman,

16 s uya, ammu i iqqar SIDI inu, SIDI: Xzar, Necc ad sswiẓẓḍeɣ afus inu ḍidd i Ifilisṭiniyyen uca ad qeḍɛeɣ Ikritiyyen uca ad areddǧeɣ min iqqimen x tma n řebḥar. ^□  

17 Nneqmat timeqqranin s leɛqayeb iqesḥen ad daysen ggeɣ u nitni ad ssnen belli Necc d SIDI, xmi i ɣa kemmřeɣ nneqmet inu daysen.”