1 Yusa-dd ɣari wawař n SIDI deg useggʷas wiss tesɛa, deg uyur wiss ɛecra, x wass wiss ɛecra n uyur, inna:

2 “A mmis n bnadem, ari i yixef nnek isem n ass-a, isem n ass n yiḍa. Deg wass-a nnit ad iḥṣar ujeǧid n Babil Urcalim. 3 Siweř ijj n umedya i taddart iɣewwɣen nni, uca ini asen: ‘Ammu i iqqar Sidi inu, SIDI:

Egg ijj n teydurt, egg i-tt uca kebb dayes aman. ^■   4 Egg dayes tifettutin n weysum, marra tifettutin icnan, tameṣṣaḍt d teɣruḍt, ɛemmar i-tt s yexsan d lemliḥ qaɛ. 5 Ksi lemliḥ n wuǧi uca arr uřa d akeccuḍ sadu nsen. Ejj ad sehden marra mliḥ ařami ɛad ixsan nnes ad dayes ttwanennan.’ ”

6 “S uya, ammu i iqqar Sidi inu, SIDI:

‘Uct x tandint n idammen, taydurt tenni zi řexmej nnes ɛad dayes, tenni zi war yekkis řexmej nnes! Kkes zzayes tafettut awarni i tfettut nneɣni břa ad xas teggid taqedduḥt. ^■   7 Minzi idammen nnes aqa di řwest nnes, tessizeř i-ten x ict n teṣḍart taqeccart. War ten tessizziř x temmurt maḥend ad ten teddiř s ucař. 8 Ḥima ad ittwassekkar wesɛar, ḥima ad yiři wenqam, ggiɣ idammen nnes x teṣḍart taqeccart ḥima war ttwasduřyen idammen nnes.’ ”

9 “S uya, ammu i iqqar Sidi inu, SIDI: Uct x tendint n idammen! Uřa d Necc ad ggeɣ aqellij n ukeccuḍ i uceɛɛař n tmessi imɣar! ^■  

10 Arni akeccuḍ, ejj timessi ad tareɣ aṭṭas, cennef aysum mliḥ uca ejj kuffu isstextixen ad iḥaj uca ejj ixsan ad cemḍen.

11 Arr xenni taydurt ixwan ɛawed x řefḥem nnes ḥima ad isehed u ad icmeḍ ddra nnes n nnḥas uca ad tefsi zzayes texmuji i dayes iǧan, u xenni ad ittwaqḍi řexmej.

12 Marra amarret aqa-t di baṭeř. Řexmej nnes ifeyyḍen war dd-iffiɣ zzayes. Arr řexmej nni di tmessi!

13 Di texmuji nnem teǧi řefḍiḥet nnem minzi Necc tuɣa xseɣ ad cem ssizedgeɣ uca xenni war tᵉttwasizdiged. S uya war tᵉttwasizdiged ař xam i ɣa ssiwḍeɣ aɣḍab inu itteḥduduqen.

14 Necc, SIDI, ssiwřeɣ. Ad iffeɣ u Necc ad t ggeɣ. War semḥeɣ deg imerwusa u war zziǧzeɣ u war ndimeɣ. Ad xam ḥekmen ibriden nnem d tmegga nnem, ammu i iqqar Sidi inu, SIDI.” ^■  

15 Yusa-dd ɣari wawař n SIDI, inna:

16 “A mmis n bnadem, xzar, s ict n tecti Necc ad kesseɣ meẓri nnek zzat i tiṭṭawin nnek. Cek maca war tᵉttrud u war ttejji ad uzzřen imeṭṭawen nnek.

17 Sɣuyy deg uhedden, war ceṭṭen x umettin. Qqen areẓẓet nnek xak uca egg tisiřa nnek deg iḍaren nnek, u war ttřeḥḥaf acřaɣem nnek d tmart nnek niɣ ad tecced aɣrum nni dd ɣa yawyen iwdan i wecḍan.”

18 Ɣar tuffut ssiwřeɣ i řgens u ɣar tmeddit temmut tmeṭṭut inu u di twecca ggiɣ am mammec i d ayi ittwaweṣṣa.

19 Inna ayi řgens: “Ma war texsed ad aneɣ tessecned min ɛnant tmesřayin-a, mayemmi i tegged ammu?” 20 Necc nniɣ asen: “Yusa-dd ɣari wawař n SIDI, inna:

21 Ini i taddart n Israil: ‘Ammu i iqqar Sidi inu, SIDI! Xzar, Necc ad ssɛiǧteɣ Zzawect inu Iqeddsen tenni d aɛuǧi n jjehd nwem d umeẓri n tiṭṭawin nwem d řehzuṭ i řeɛmar nwem, uřa d iḥenjiren nwem d yessitwem nni tejjim din ad wḍan s ssif. 22 Xenni ad teggem am mammec ggiɣ Necc. War tᵉttřeḥḥafem acřaɣem d tmart, uca aɣrum i dd-yiwyen iryazen, war t tᵉttettem. 23 Areẓẓat nwem ad iřint x izeǧifen nwem u tisiřa nwem deg iḍaren nwem. War tceṭṭnem u war tᵉttrum. Ad teḥḥam di řmuɛṣiyyet nwem uca ad teqdidsem ijjen ak-d wenneɣni. ^■   24 Ammu i ɣa yiři Ḥizqiyal d řeɛřamet n řeɛjeb i kenniw. Ad teggem nican am mammec igga netta. Xmi dd ɣa yas ddegga, ad tessnem, belli Necc Sidi, d SIDI.’ ” ^■  

25 “Uca cek, a mmis n bnadem, deg wass i zzaysen i ɣa kesseɣ lburj nsen, řefraḥet x telwizt nsen, uřa d meẓri n tiṭṭawin nsen d iḥenjiren d tḥenjirin nsen nni yarebbun nitni deg wuř, 26 aqa deg wass nni simant nnes ad ɣarek dd-yas ijjen wenni yarewřen maḥend ad yegg tnayen n imezzuɣen nnek ad sřen uya. 27 Deg wass nni ad yarzem uqemmum nnek ak-d uqemmum n wenni yarewřen uca ad tessiwřed, war tᵉttiřid ɛad d aynaw. Cek ad asen tiřid d řeɛřamet n řeɛjeb uca nitni ad ssnen belli Necc d SIDI.”