1 Yusa-dd ɣari wawař n SIDI, inna:

2 “A mmis n bnadem, tuɣa din tnayen n temɣarin, yessis n ict n temɣart. 3 Nitenti ssfesdent ixef nsen di Miṣra, di temẓi nsent ssfesdent ixef nsent. Din tuɣa ɛebzent deg idmaren nsent uca din ḥadan ibbac nsent iɛuzryen. ^■   4 Ismawen nsent tuɣa Uhula, tameqqrant nsent, d učmas Uhuliba. Nitenti dewřent inu uca urwent iḥenjiren d tḥenjirin. Ina d ismawen nsent: Samarya d Uhula, u Urcalim d Uhuliba.

5 Uhula tessefsed ixef nnes ɣari u teɛceq inni tt ittexsen, ayt n Accur, jjiran nnes. 6 Nitni arḍen arruḍ adeḥmi, řḥukkam d imḍebbaren, marra iḥudriyyen icenɛen, imnayen nni yenyin s uyis. 7 S farq-ccɣeř nnes tewca ixef nnes i nitni, ɣar řemxeyyar n ayt n Accur, ɣar marra nitni uca nettat tᵉttwasexmej s marra wi tᵉttexs, s marra imeyḍa nsen n ṣṣanam. 8 Nettat war tejji farq-ccɣeř nnes ak-d Imiṣriyyen, minzi di temẓi nnes ṭṭsen akides uca ḥadan ibbac nnes iɛuzryen uca ssfarrɣen xas farq-ccɣeř nsen. 9 S uya wciɣ tt deg ufus n yinni tuɣa tt ittexsen, deg ufus n ayt n Accur i tuɣa teɛceq. ^■  

10 Nitni ssɛarran řɛar nnes uca kksen iḥenjiren nnes d tḥenjirin nnes uca nɣin tt s ssif. Tedweř as ijj n yisem war icniɛ jar temɣarin uca nitni ssiwḍen xas řeḥkamat.”

11 “Umi teẓra man aya učmas, Uhuliba, aqa tarni ɛad deg weɛceq nnes uca tarni uřa di farq-ccɣeř nnes ktar x farq-ccɣeř n učmas.

12 Nettat teɛceq ayt n Accur, řḥukkam d imḍebbaren, jjiran nni yarḍen arruḍ d lemliḥ qaɛ, imnayen nni yenyin x yeysan, marra iḥudriyyen icenɛen. ^■  

13 Ẓriɣ aqa nettat tessexmej ixef nnes. Nitenti s tnayen idsent uyurent abrid d ijjen.

14 Nettat tarni ɛad di farq-ccɣeř nnes. Umi teẓra iryazen, ḥenncen ten x řḥiḍ, tṣawar n yeryazen, arcamen di tintat tizeggʷaɣin,

15 beysen s webyas ɣar tejɛinnatin nsen, s ireẓẓat s tintat ifarqen x izeǧifen nsen, marra ɣarsen ccuf am ineɣrafen n řɛeskar. Nitni arewsen di ayt n Babil, zi temmurt n Ikaldaniyyen, tammurt mani xeřqen.

16 Ammu i tedweř nettat tᵉttexs i-ten umi tiṭṭawin nnes ẓrint ten uca nettat tessekk ɣarsen ireqqasen, ɣar temmurt n Ikaldaniyyen.

17 Usin-dd ɣares ayt n Babil maḥend ad ṭṭsen akides uca ssxemjen tt s farq-ccɣeř nsen uca nettat tessexmej ixef nnes zzaysen. Xenni iggʷej xasen řeɛmar nnes.

18 Tessefsed nettat ixef nnes s bṭayṭay uca tessɛarra řɛar nnes. Xenni iggʷej xas řeɛmar inu am mammec tuɣa iggʷej řeɛmar inu uřa x učmas.

19 Tessefsed ixef nnes aṭṭas umi teɛqeř x wussan n temẓi nnes řami tuɣa tessefsed ixef nnes di temmurt n Miṣra. 20 Nettat teɛceq inni tt ittexsen, inni aysum nsen am weysum n iɣyař u inni adɛaq nsen am wedɛaq n iysan. 21 Aqa teɛqeb-dd ɣar řefḍihet n temẓi nnem, ařami Imiṣriyyen ḥadan idmaren nnem n temẓi.”

22 “S uya, Uhuliba, ammu i iqqar Sidi inu, SIDI: Xzar, Necc ad xam ssekkareɣ inni cem ittexsen uca ad ggeɣ ad xam dd-asen zeg wenneḍ nnem. 23 Tarwa n Babil d marra Ikaldaniyyen, imeḥḍayen d imcenɛen d tarwa n taṣiřet, u marra ayt n Accur akidsen, iḥudriyyen icenɛen, lwulat, marra imḍebbaren, ineɣrafen n řɛeskar d yeryazen s yisem, marra imnayen inni yenyin x yeysan. 24 Nitni ad xam dd-usin s ikarruten i umenɣi ak-d tjarrarin iqarqben, u s ijj n wegraw n řegnus, s tseddariyin n uɛeskari timeqqranin d tseddariyin timeẓyanin, uřa s lkask x uzeǧif. Nitni ad ssbedden ixef nsen deg wenneḍ nnem u Necc ad asen wceɣ ddeɛwet u nitni ad cem ḥekmen ɛlaḥsab ccariɛa nsen. 25 Necc ad ggeɣ tusmi inu ḍidd i cem uca nitni ad zzayem ggen s wesɛar. Nitni ad qqsen tinzarin nnem d tiṭṭawin nnem uca min iqqimen ad iwḍa s ssif. Nitni ad kksen iḥenjiren nnem d yessim nnem, uca min iqqimen ad ittwacc s tmessi. 26 Ad kksen arruḍ nnem uca ad kksen řehzuṭ nnem. ^■   27 Ammu i ɣa ssbeddeɣ řefḍiḥet nnem uřa d farq-ccɣeř nnem zi temmurt n Miṣra, uca war ɣarsen tessgiɛɛded ɛad tiṭṭawin nnem u war tidared ɛad Miṣra.”

28 “Minzi ammu i iqqar Sidi inu, SIDI: Xzar, Necc ad cem ggeɣ deg ufus n yinni cem icarrhen, deg ufus n yinni i x iggʷej řeɛmar nnem. 29 Ad zzayem ggen am wecrah nsen u ad kksen marra i umi tarbred uca ad cem jjen awarni asen tᵉttwaɛarrid d tuɛaryant ařami ittwaɛarra řɛar n farq-ccɣeř nnem uřa d řefḍihet nnem d farq-ccɣeř nnem. ^■   30 Ad zzayem ggen aya minzi teḍfared řegnus am iggur bnadem awarni i temɣart n farq-ccɣeř, u minzi tessxemjed ixef nnem s imeyḍa n ṣṣanam nsen. 31 Tuyured deg webrid n učmam, x uya ad am wceɣ řkas nnes deg ufus nnem.”

32 “Ammu i iqqar Sidi inu, SIDI: Ad teswed řkas n učmam wenni yuǧɣen u iwesɛen, ařami řqedd nnes ad yarr řɛedyan ad zzayem dehcen s řḥegra u ad zzayem stehzan. 33 Ad teccured s wescar d wecḍan. Řkas n učmam Samarya d ijj n řkas n ureddeǧ d twaḥdanect. 34 Ad t teswed uca ad t tẓemmed, ad tɣezzed cquf nnes uca ad tqebced zzayes idmaren nnem, minzi Necc nniɣ t, ammu i iqqar Sidi inu, SIDI.”

35 “S uya, ammu i iqqar Sidi inu, SIDI: Umi dayi tᵉttud uca temmenḍared ayi awarni i weɛrur nnem, s uya tarebbud cem s yixef nnem uřa d řefḍiḥet nnem d farq-ccɣeř nnem.” ^■  

36 Inna ayi SIDI: “A mmis n bnadem, ma texsed ad tcarrɛed Uhula d Uhuliba? Ini asent xenni jjɛayef nsent. ^■   37 Minzi zennant uca idammen řeṣqen ɣar ifassen nsent u zennant ak-d imeyḍa n ṣṣanam nsent. Sennej i uya arrint iḥenjiren nsent, inni urwent i Necc, ad ẓwan timessi d macca i nitni. ^■   38 Marra aya ggint dayi: nitenti ssxemjent Zzawect inu Iqeddsen uca ssɛiǧtent ussan inu n ssebt. ^■   39 Minzi umi ɣarṣen i tarwa nsent i imeyḍa nsent n ṣṣanam, usint-i-dd deg wass nni simant nnes di Zzawect inu Iqeddsen maḥend ad tt ssɛiǧtent. Xzar, ammu i ggint di řwest n Taddart inu. ^■   40 Ɛad ssekkent x yeryazen i dd-yusin zi řaggʷaj. Ssekken areqqas ɣarsen, u xzar, usin-dd nitni, inni i x tessirded ixef nnem, i x tkulared tiṭṭawin nnem uca thezṭed s telwizt. 41 Teqqimed x ijj n rectu yecna, tuɣa zzates ṭṭabřa isswejden i x tessarsed řebxur inu d zzect inu. ^■   42 Řami issusem řḥess n řɣaci inhewřen nni din ɣares, ttwanedhen iskarjiyyen zi řexřa ɣar yeryazen nni iǧan zi řɣaci n iwdan. Ina ggin timeqyasin ɣar ifassen nsent uřa d ijj n tajj izewwqen x izeǧifen nsent. 43 Xenni nniɣ Necc: Aqa aten zennan ak-d ict n temɣart n ffarq-ccɣeř dduysaren. Řexxu farq-ccɣeř nnes simant nnes ad issefsed ixef nnes uca ammu uřa d nettat. 44 Nitni udfen ɣares am udfen ɣar ict n temɣart d farq-ccɣeř. Ammu udfen ɣar Uhula u ɣar Uhuliba, timɣarin nni ittwafeḍḥen. 45 Iryazen iseggden ad tent ḥekmen ɛlaḥsab řḥeqq n tinni izennan u ɛlaḥsab řḥeqq n tinni issizzařen idammen, minzi nitenti d timɣarin izennan uca idammen řeṣqen ɣar ifassen nsent.” ^■  

46 “Minzi ammu i iqqar Sidi inu, SIDI: Necc ad xasen ssekkareɣ ijj n wegraw uca ad ten arreɣ d taymart d takeccaḍt. 47 Agraw n řgens ad tent yarjem uca ad tent qeḍɛen s řesyuf. Iḥenjiren nsen d tḥenjirin nsen ad ten nɣen uca ad sscemḍen tudrin nsent s tmessi. ^■   48 Ammu i ɣa ssbeddeɣ řefḍayeḥ nsent di temmurt ařami i ɣa ttwaɛeřment marra timɣarin uca war tteggent ɛad amecnaw řefḍayeḥ nsent. 49 Ammu i xakent ɣa ggen řefḍiḥet nkent uca ad tarbunt ddnub n imeyḍa nkent n ṣṣanam uca ad tessnent, aqa Necc Sidi d SIDI!”