Ddnub n Urcalim
22
1 Yusa-dd ɣari wawař n SIDI, inna: 2 “Cek, a mmis n bnadem, ma texsed ad tḥekmed, ma texsed ad tḥekmed x Tendint n idammen? Scen as xenni jjɛayef nnes, ■ 3 ini: ‘Ammu i iqqar Sidi inu, SIDI:
Cem, a tandint, tenni issizzřen idammen di řwest nnes, ařami dd-tiweḍ řweqt nnes, nni iggin imeyḍa n ṣṣanam x yixef nnes maḥend ad zzaysen tessexmej ixef nnes! 4 S idammen nni tessizzřed, tdewřed s umarwas, u s imeyḍa n ṣṣanam nnem nni teggid, aqa tessxemjed ixef nnem, tessiwḍed ussan nnem uca trehhged ař iseggʷusa nnem. S uya wciɣ cem i řegnus i useḥqar, u i temmura i ustehzi. ■ 5 Inni yudsen d yenni iggʷejen ad zzayem stehzan, cem, a tamexmujt n yisem d tenni iccuren s uxarweḍ!
6 Xzar, řḥukkam n Israil tuɣa aten dayem, kuř ijj ak-d jjehd nnes, maḥend ad ssizzřen idammen. 7 Sseḥqaren babatsen d yemmatsen dayem, ggin s uɣiř ak-d ubarrani di řwest nnem, ḥṣaren ayujiř d tajjač i dayem. 8 Min iǧan iqeddsen i Necc, aqa tesseḥqared t, uca ussan n ssebt inu tessɛiǧted i-ten.
9 Imceqqafen tuɣa aten dayem maḥend ad ssizzřen idammen, uca qqimen ccin x idurar nni dinni ɣarem. Aqa ggin řefḍiḥet di řwest nnem. ■
10 Nitni ssɛarran řɛar n babam nni din ɣarem, u tenni tuɣa texmej umi xas idammen, aqa ɣeṣben tt dayem. ■
11 Ijjen igga nnɛi ak-d tmeṭṭut n wajjar nnes, uca ijjen nneɣni issexmej tamɣart n mmis, ittegg řefḍiḥet akides, uca ɛawed ijjen nneɣni iɣṣeb učmas, yeǧis n babas, din ɣarem. ■
12 Aqa ṭṭfen zzayem arrecwet, maḥend ad ssizzřen idammen, teksid arriba d arbeḥ, uca tbeɛɛjed ajjar nnek s uɣiř, maca tᵉttud ayi, ammu i iqqar Sidi inu, SIDI.
13 Xzar, wtiɣ ifassen inu ijj deg wenneɣni zi ssibbet n ubeɛɛej i teggid u zi ssibbet n idammen nni issizzřen di řwest nnem. □ ■
14 Ma ad iqqim uř nnem imten? Ma ad iřin ifassen nnem jehden deg wussan nni di ɣa ggeɣ min iǧan ḍidd nnem. Necc, SIDI, aqa ssiwřeɣ uca ad t ggeɣ. ■
15 Ad cem zuzzareɣ jar řegnus uca ad cem bezzɛeɣ x temmura, u ad ssbeddeɣ taxmuji nni zzayem dd-iffɣen. ■
16 Ammu i ɣa tᵉttwasɛiǧted zeg yixef nnem zzat i tiṭṭawin n řegnus u cem ad tessned belli Necc d SIDI.’ ”
17 Yusa-dd ɣari wawař n SIDI, inna:
18 “A mmis n bnadem, inni n taddart n Israil dewřen ayi am kuffu. Marra nitni dewřen d nnḥas d istanyu d wuzzař d řexfif di řwest n tefqunt, aqa aten dewřen kuffu n nnuqart. ■
19 S uya, ammu i iqqar Sidi inu, SIDI: ‘Minzi marra kenniw tdewřem am kuffu, s uya, xzar, Necc ad kenniw ssmuneɣ di Urcalim. 20 Axmi yarwen nnḥas d istanyu d wuzzař d řexfif di tefqunt ḥima ad xasen ceɛɛřen timessi maḥend ad ssfesyen man aya marra, ammu i kenniw ɣa ssmuneɣ deg weɣḍab inu u deg wesɛar inu. Ad kenniw ssarseɣ dinni uca ad kenniw ssfesyeɣ. 21 Necc ad kenniw ssmuneɣ uca ad xawem ṣuḍeɣ s tmessi n uduqqez inu n ufugem ařami kenniw ad tᵉttwafesyem di řwest nnes. 22 Axmi ssfesyen nnuqart di tefqunt, ammu i ɣa tᵉttwasfesyem kenniw dayes uca ad tessnem aqa Necc, SIDI, ssfarɣeɣ xawem asɛar inu.’ ”
23 Yusa-dd ɣari wawař n SIDI, inna:
24 “A mmis n bnadem, ini as: ‘Cem d tammurt nni war ittwasizdigen, tammurt břa anẓar ijehden deg wass n wesxeḍ. 25 Aqa din ict n tmeɛmuč n inabiyyen nnes di řwest nnes. Amecnaw ayrad izehharen iṣarḍ taymart nnes, ammu i ccin nitni řeɛmur. Kksen min iǧan d taxabect d min iɣřan. Nitni arnin tijjař nnes di řwest nnes. ■ 26 Ikehhanen nsen ssɛiǧiten Ccariɛa inu uca ssxemmajen timesřayin inu iqeddsen. Nitni war farrzen ca jar min iqeddsen d min ittwasɛiǧten, war sscanan ca lfarq jar min ixemjen d min izdigen uca bellɛen uřa d tiṭṭawin nsen i wussan inu n ssebt, uca ammu ttwasɛiǧeɣ di řwest nsen. ■ 27 Řḥukkam di řwest nnes aqa amecnaw uccanen nni icarrgen taymart maḥend ad ssizzřen idammen u maḥend ad areddǧen řeɛmur ḥima ad beɛɛjen ař meẓri. ■ 28 Inabiyyen nnes dřin ten s jjiř yuẓɣen. Nitni ttwařin řɣecc uca ggin xasen s uɛezzem issxarriqen, qqaren: Ammu i iqqar Sidi inu, SIDI!, am SIDI tuɣa war ini walu. ■ 29 Řgens n temmurt igga bezzez x iwdan s řexcunect, keccḍen takeccaḍt, ḥeṣṣaren řmeskin d umezřuḍ, uca deǧen abarrani břa ma ɣarsen yiři řḥeqq. 30 Arzuɣ jar asen ijj n weryaz nni i ɣa issbedden ijj n řḥiḍ uca ad ibedd di tazzit di ṭṭweɛ n temmurt ařami war tt ttaredǧeɣ, maca war t ufiɣ. ■ 31 S uya ssfarɣeɣ xasen asxeḍ inu. S tmessi n uduqqez inu n weɣḍab inu qḍiɣ xasen, abrid nsen arriɣ t x uzeǧif nsen!’, ammu i iqqar Sidi inu, SIDI.” ■