1 Yusa-dd ɣari wawař n SIDI, inna:

2 “A mmis n bnadem, egg udem nnek ɣar ljanub. Ejj awařen nnek ad udumen jjihet n ljanub. Nabb ḍidd i wezɣar n yeyyar di Temmurt n Ljanub. ^□   3 Ini i wezɣar n Temmurt n Ljanub:

‘Seř i wawař n SIDI: Ammu i iqqar Sidi inu, SIDI: Xzar, Necc ad ssarɣeɣ dayem ict n tmessi, tenni i ɣa iccen kuř tacejjart tazizawt u kuř tacejjart yuẓɣen. Aceɛɛař n řɛabuq war ittwaxessi u s uya ad ttwacemḍen marra iɣembab zi ljanub ař ccamal, ^■   4 uca marra iwdan d řmař ad ẓaren aqa Necc, SIDI, d wenni issarɣen timessi. War tᵉttwaxessi ca.’ ” ^□  

5 Nniɣ necc: “A, Sidi inu, SIDI, ɛad nitni qqaren xafi: ‘Ma war issiweř netta s tḥuja n twafit waha?’ ”

6 Yusa-dd ɣari wawař n SIDI, inna:

7 “A mmis n bnadem, egg udem nnek ɣar Urcalim uca ejj awařen nnek ad udumen ḍidd i Tzawiyyin Iqeddsen uca nabb ḍidd i temmurt n Israil 8 uca ini i temmurt n Israil ‘Ammu i iqqar Sidi inu, SIDI:

Xzar, aqa ɣarek, uca Necc ad dd-jebdeɣ ssif inu zeg ufurru n weɣřaf nnes uca ad qeḍɛeɣ am umsegged am uɛeffan. 9 Minzi ad qeḍɛeɣ am umsegged am uɛeffan, s uya ad dd-iffeɣ ssif inu zeg ufurru n weɣřaf nnes, ḍidd i marra inni ɣarsen arrimet n weysum, zi ljanub ař ccamal,

10 uca marra inni ɣarsen arrimet n weysum ad ssnen, belli Necc, SIDI, jebdeɣ ssif inu zeg ufurru n weɣřaf. Ɛemmarṣ war ɣares dd-iddikkwiř.’ ”

11 “Maca cek, a mmis n bnadem, sɣunfa, sɣunfa zzat i tiṭṭawin nsen s tejɛinnatin ttwarẓent d tarzugi.

12 Ad imsar xmi d ac i ɣa inin: ‘Maɣar tessɣunfid ammu?’, aqa cek ad tinid: ‘Zi ssibbet n min sřiɣ, maɣar ad dd-yas uca kuř uř ad ifsi u marra ifassen ad heyyfen u marra buḥbeř ad yarxu u marra ifadden ad ardben am waman. Xzar, ad dd-yas uca ad yiři, ammu i iqqar Sidi inu, SIDI.’ ” ^■  

13 Yusa-dd ɣari wawař n SIDI, inna:

14 “A mmis n bnadem, nabb uca ini: ‘Ammu i iqqar Sidi inu, SIDI!’ Ini:

‘Ssif, ssif, aqa ittwaseqḍeɛ

u ittwasuyda.

15 Ittwasseqḍeɛ maḥend ad iɣarṣ tiɣarṣa,

ittwasuyda maḥend ad ilellec.

Niɣ ittxeṣṣa i neccin ad nfarreḥ, ad nini:

azeǧaḍ n mmi isseḥqar kuř akeccuḍ nneɣni. ^□  

16 Immewc maḥend ad ittwasuyda,

maḥend ad t ṭṭfen deg ufus.

Ssif ittwaqḍeɛ u ittwasuyda

maḥend ad ittwagg deg ufus n umenɣiw.

17 Sɣuyy uca trud, a mmis n bnadem,

maɣar ad yiři x řgens inu,

ad yiři x marra řḥukkam n Israil.

Aqa mmewcen i ssif munen ak-d řgens.

Xenni wwet x tmeṣṣaḍt nnek. ^■  

18 Minzi ssif ittwaqeǧeb.

Uca mana, mařa ssif nni isseḥqaren marra akeccuḍ,

war dd-ittis ca?’,

ammu i iqqar Sidi inu, SIDI.” ^■  

19 “Cek, a mmis n bnadem, nabb, uca wwet ifassen ijj deg wenneɣni, maɣar ssif ad iwwet tnayen, wah, třata n imuren. Aqa-t d ssif n yinni ittwanɣen, ssif n umeqqran nni ittwaneɣ, wenni ɣarsen ittadfen, 20 ḥima xenni uř ad ifsi uca ad mmarenyent tɛenkrifin. Řeqḍeɛ n ssif ggiɣ t x marra tiwwura nsen. Ay, aqa iwjed maḥend ad ilellec, aqa ittwajebb-dd zeg ufurru n weɣřaf maḥend ad iɣarṣ. ^■   21 Smun jjehd nnek, qess ɣar yeffusi, bedd, qess ɣar uzeřmaḍ, arr řeqḍeɛ nnek mani ma texsed. 22 Uřa d Necc ad wteɣ ifassen inu ijj deg wenneɣni, uca ad ssareyyḥeɣ asɛar inu. Necc, SIDI, aqa ssiwřeɣ.”

23 Yusa-dd ɣari wawař n SIDI, inna:

24 “Cek, a mmis n bnadem, egg tnayen n ibriden zi mani dd ɣa yas ssif n ujeǧid n Babil. Zeg ict n temmurt ad ffɣen nitni s tnayen idsen. Nqec ijj n uciyyar ɣar ubeṭṭu n webrid, nqec i-t ɣar ubeṭṭu n webrid ɣar tendint. 25 Ad tneyyced abrid s manis dd ɣa yas ssif ɣar Rabba n ayt n Ɛammun, u ɣar Yahuda ař daxeř di tendint ittwasjehden: Urcalim. 26 Minzi ajeǧid n Babil ad ibedd ɣar mani farqen ibriden, ɣar ubeddu n tnayen n ibriden nni maḥend ad iɛezzem. Ad izzerz fřitcat n řqewṣ, ad isseqsa řexyařat n ṣṣanam, ad ixzar tsa. 27 Deg ufus nnes yeffusi yusa-dd ugezzen ‘Urcalim!’, maḥend ad din yegg icarriyyen n wedham, maḥend ad yarzem aqemmum nnes s iɣuyyan n wenɣi, maḥend ad issgeɛɛed tmijja nnes s iɣuyyan n umenɣi, maḥend ad igg icarriyyen n wedham ḍidd i tewwura, maḥend ad yegg acbar, maḥend ad igg lbarajat. ^■   28 Man aya ad ɣarsen yiři am ugezzen iɣeccen, maɣar nitni aqa ɣarsen tijaǧatin imetnen, maca Netta ad iɛqeř x řmuɛṣiyyet nsen maḥend ad ttwaṭṭfen nitni.”

29 “S uya, ammu i iqqar Sidi inu SIDI: Minzi tesseɛqiřem x řmuɛṣiyyet nwem umi iɛeddiyen nwem ttbanen nican, xmi ttwaẓarren ddnub nwem s marra min tᵉtteggem, wah minzi tsseɛqiřem x řmuɛṣiyyet nwem, s uya ad kenniw ṭṭfen s ufus. 30 U cek, aɛeffan iyezzmen i řmewt, cek, a ajeǧid n Israil, wenni ass nnes ad dd-yas di řweqt n řeḥsab aneggaru n řmuɛṣiyyet, 31 ammu i iqqar Sidi inu, SIDI: Kkes areẓẓet nni, kkes ttaj nni. Ammu war ittiři ɛad. Min issehwan, ad ittwasuɛřa, u min issuɛřan, ad dd-ittwasehwa. 32 Ad arreɣ aya d řxarbet, d řxarbet, wah ad t arreɣ d řxarbet. Uca uřa d wa marra, war ittiři ɛad ař dd ɣa yas wenni ɣar iǧan řḥeqq uca Necc ad as t wceɣ.”

33 “U cek, a mmis n bnadem, nabb uca ini: ‘Ammu i iqqar Sidi inu, SIDI, x ayt n Ɛammun u x useḥqar nsen, ini: Ssif, ssif ittwajebd-dd, ittwasuyda maḥend ad yecc, maḥend ad ilellec, 34 - waxxa nitni ttwařan ict n tmeẓriwt war iǧin, waxxa nitni ttgezznen ijj n ugezzen issxarriqen - , aqa ssif ittwajebd-dd maḥend ad cek yarr ɣar irawen n iɛeffanen ittwasnuqqben nni zi dd-yusa wass nsen di řweqt n řeḥsab aneggaru n řmuɛṣiyyet. 35 Arr ssif ɣar ufurru n weɣřaf nnes. Deg wemcan mani dd-tᵉttwaxeřqed, di temmurt n ř’aṣeř nnek ad cem ḥekmeɣ. 36 Ad xam zeǧɛeɣ wesxeḍ inu, s tmessi n uduqqez n ufugem inu ad xam ṣuḍeɣ uca ad cem ggeɣ deg ufus n ayt n bu-ɣezzu nni issnen ad deǧen. 37 Ad tiřid d macca i tmessi, idammen nnek ad ten ssizzřen di řwest n temmurt. War tᵉttiři qaɛ řidaret dayek, maɣar Necc, SIDI, aqa ssiwřeɣ.’ ”