1 Deg useggʷas wiss sebɛa, deg uyur wiss xemsa, deg wass wiss ɛecra n uyur, imsar aqa usin-dd iryazen zeg imɣaren n Israil, maḥend ad sseqsan SIDI, uca qqimen zzati. 2 Yusa-dd ɣari wawař n SIDI, inna:

3 “A mmis n bnadem, siweř ak-d imɣaren n Israil, uca ini asen: ‘Ammu i iqqar Sidi inu, SIDI: Ma tusim-dd maḥend ad ayi tesseqsam? S tidett am ddareɣ Necc, war kenniw ttejjiɣ ad kidi temcawaren, ammu i iqqar Sidi inu, SIDI.’ 4 Ma texsed ad xasen tḥekmed, ma texsed ad xasen tḥekmed, a mmis n bnadem? Scen asen jjɛayef n řejdud nsen ^■   5 uca ini asen: ‘Ammu i iqqar Sidi inu, SIDI: Deg wass nni di ixḍareɣ Israil, ssgeɛɛdeɣ Necc afus inu, jjuǧeɣ i zzariɛet n taddart n Yaɛqub uca ssecneɣ ixef nnes ɣarsen di temmurt n Miṣra. Necc ssgeɛɛdeɣ afus inu di ṭṭweɛ nsen, nniɣ: Necc d SIDI, AREBBI nwem. ^■   6 Deg wass nni ssgeɛɛdeɣ asen afus inu jjuǧeɣ, maḥend ad ten ssuffɣeɣ zi temmurt n Miṣra ɣar temmurt nni ixḍareɣ Necc i nitni, tammurt ifeyyḍen s uɣi d tamment, aqa-tt d talwizt jar marra timmura. 7 Nniɣ asen: Ejj kuř ijj ad immenḍar nnɛawat nnes n ṣṣanam zzat i tiṭṭawin nnes, ittxeṣṣa war ssxemmijem nitni ixef nwem s imeyḍa n l’aṣnam n Miṣra, Necc d SIDI, AREBBI nwem.’ ”

8 “Maca nitni ɣewwɣen xafi uca war xisen ad ɣari dd-sřen. War nḍaren nnɛawat nsen n ṣṣanam zzat i tiṭṭawin nsen u war jjin imeyḍa nsen n ṣṣanam nni dd-iwyen zi Miṣra. Xenni nniɣ ad xasen zeǧɛeɣ asɛar inu maḥend ad xasen kemmřeɣ lɣaḍab inu di řwest n temmurt n Miṣra. 9 Necc ggiɣ t di ṭṭweɛ n Yisem inu ařami wanita war ittwasfed zzat i tiṭṭawin n řegnus nni tuɣa zeddɣen jar asen, i umi secneɣ ixef inu zzat i tiṭṭawin nsen xmi ten ssuffɣeɣ zi temmurt n Miṣra.

10 Ssuffɣeɣ ten-dd zi temmurt n Miṣra uca nedheɣ ten ɣar řexřa. ^■  

11 Wciɣ asen tiweṣṣa inu uca ssargbeɣ ten x lfarayiḍ inu, i zi ɣa iddar bnadem nni zzaysent i ɣa yeggen. ^■  

12 Wciɣ asen ɛawed ussan inu n ssebt maḥend ad iřin d řeɛřamet jar ayi d nitni, ḥima ad ssnen, aqa Necc d SIDI wenni ten issqeddsen. ^■  

13 Maca taddart n Israil tɣewweɣ xafi di řexřa. Nitni war uyuren ca ɛlaḥsab tiweṣṣa inu uca mmenḍaren lfarayiḍ inu i zi ɣa iddar bnaden nni tent iggin, uca nitni ssɛiǧten ussan n ssebt inu ařami tuɣa xseɣ ad xasen farrɣeɣ asɛar inu di řexřa ḥima ad xasen qḍiɣ. ^■  

14 Maca Necc ggiɣ t di ṭṭweɛ n Yisem inu, ḥima wanita war ittwasɛiǧit ca zzat i tiṭṭawin n řegnus nni tuɣa ittwařin umi ssuffɣeɣ taddart n Israil zi Miṣra.

15 Necc ssgeɛɛdeɣ afus inu ḍidd nsen di řexřa uca jjuǧeɣ aqa war ten ttawyeɣ ɣar temmurt nni d asen wciɣ, tammurt ifeyyḍen s uɣi d tamment, tenni yeǧan d talwizt n marra timmura,

16 minzi nitni nḍaren lfarayiḍ inu, war uyuren di tweṣṣa inu u ssɛiǧten ussan inu n ssebt, maɣar uř nsen iḍfar imeyḍa nsen n ṣṣanam.

17 Maca semḥeɣ asen di tiṭṭawin inu ařami Necc war ten areddǧeɣ u war xasen qḍiɣ di řexřa.”

18 “Necc nniɣ i iḥenjiren nsen di řexřa: War tteggurem di tweṣṣa n ibabaten nwem uca war ttᵉṭṭfem di lfarayiḍ nsen uca war tessxemmajem ixef nwem s imeyḍa nsen n ṣṣanam.

19 Necc d SIDI, AREBBI nwem! Uyurem di tweṣṣa inu u ḥḍam lfarayiḍ inu uca ggem zzaysent. 20 Sqeddsem ussan inu n ssebt, maḥend ad iřin d řeɛřamet jar ayi d kenniw ḥima ad tessnem belli Necc d SIDI, AREBBI nwem. 21 Maca ɛad arraw ɣewwɣen xafi, war gguren di tweṣṣa inu u war ḥḍin lfarayiḍ inu maḥend ad daysent uyuren, min zi bnadem nni tent itteggen ad zzaysent iddar. Nitni ssɛiǧten ussan inu n ssebt ařami nniɣ, ad xasen farrɣeɣ asɛar inu maḥend ad asen kemmřeɣ ammu aɣḍab inu di řexřa. 22 Necc arriɣ-dd afus inu i tuɣa isswiẓẓaḍen ḍidd nsen. Ggiɣ t di ṭṭweɛ n Yisem inu, ḥima war ittwasexmij Isem inu zzat i tiṭṭawin n řegnus, maɣar zzat i tiṭṭawin nsen ssuffɣeɣ ten-dd zi Miṣra.”

23 “Ɛawed ssgeɛɛdeɣ afus inu di řexřa, jjuǧeɣ ad ten bezzɛeɣ jar řegnus u ad ten zuzzareɣ di temmura, 24 minzi war gguren di lfarayiḍ inu, maca nḍaren tiweṣṣa inu uca ssɛiǧten ussan inu n ssebt, u minzi tiṭṭawin nsen ḍeffarent awarni i imeyḍa n ṣṣanam n ibabaten nsen. 25 Xenni Necc wciɣ asen tiweṣṣa war iḥřin d lfarayiḍ i zi war zemmaren nitni ad ddaren. 26 Necc ssxemjeɣ ten s tewhibin nsen umi nitni arrin marra min yarezmen řemřawet d amezwaru ad yekk timessi, ḥima Necc ad ten teḥḥiɣ ařami i ɣa ssnen aqa Necc d SIDI.” ^■  

27 “S uya, a mmis n bnadem, siweř ak-d taddart n Israil, uca ini asen: ‘Ammu i iqqar Sidi inu, SIDI: Uřa s man aya tuɣa řejdud nnek ttceqqafen dayi umi tuɣa dayi ɣeddaren aṭṭas. 28 Řami ten ssidfeɣ di temmurt tenni x ssgeɛɛdeɣ afus inu maḥend ad ten tt wceɣ, xezzaren nitni ɣar kuř tawrirt yuɛřan u ɣar wezɣar imcubbcen uca iwyen din tiɣarṣa nsen u qeddmen din tiwhibin nsen i d ayi sɛaren, u qqedmen din arriḥet nsen ittfuḥen u seyyben din tiwhibin nsen n useyyeb.’ 29 Xenni nniɣ asen: ‘Man řgeɛɛdet nni ɣar i ɣa traḥem?’ Isem nnes ‘Bamah’, ixs ad yini ‘Řgeɛɛdet’, ař ass-a.”

30 “S uya, ini i taddart n Israil: ‘Ammu i iqqar Sidi inu, SIDI: Ma tessxemjen kenniw ixef nwem x simant n webrid n řejdud nwem uca tessfessadem ixef nwem uřa d kenniw am tḍeffaram nnɛawat nsen n ṣṣanam, 31 am ɣarsen tessgeɛɛdem tiwhibin nwem, u am tessekkem iḥenjiren nwem x tmessi, tessxemmajem ixef nwem s imeyḍa nwem n ṣṣanam ař ass-a? Ma Necc xenni ad kenniw jjeɣ ad ayi tesseqsam, a taddart n Israil? S tidett am ddareɣ Necc, iqqar Sidi inu, SIDI, Necc war ttijjiɣ kenniw ad ayi tesseqsam! 32 Min dd-igeɛɛden di buḥbeř nwem, war ittiři, min teqqarem kenniw: Neccin ad niři am řegnus u am tqebbař n temmura umi ɣa neɛbed ṣṣanam n ukeccuḍ d weẓru.’ ”

33 “S tidett am ddareɣ Necc, iqqar Sidi inu, SIDI: Necc ad xawem ṣellṭeɣ s ufus ijehden u s uɣiř isswiẓẓaḍen u s ufarreɣ n wesɛar inu! 34 Maɣar Necc ad kenniw ssuffɣeɣ zi řegnus uca ad kenniw dd-ssmuneɣ zi temmura mani di tᵉttwabezzɛem kenniw, s ufus ijehden d uɣiř isswiẓẓaḍen u s ufarreɣ n wesɛar inu. 35 Ad kenniw awyeɣ ɣar řexřa n řegnus, uca din ad xawem ḥekmeɣ, udem d udem. 36 Amecnaw mammec ḥekmeɣ x řejdud nwem di řexřa n temmurt n Miṣra, ammu i xawem ɣa ḥekmeɣ, iqqar Sidi inu, SIDI. 37 Ad kenniw ssekkeɣ sadu uzeǧad n umeksaw uca ad kenniw ssidfeɣ di ttarbiyyet n Řɛahd. 38 Necc ad zzaywem zuzzareɣ̮ imɣewwaɣen d yenni xafi ittɛeddan. Necc ad ten ssuffɣeɣ zi temmurt n řɣubbiyet nsen mani zeddɣen am ibarraniyyen, maca war dd-ttikkwiḍen ca ɣar temmurt n Israil. Ammu i ɣa tessnem belli Necc d SIDI.”

39 “Uca kenniw, a taddart n Israil, ammu i iqqar Sidi inu, SIDI, ejj kuř ijj ad yuyur ɣar imeyḍa nnes n ṣṣanam. Maca awarni as, ad ɣari tesřem s tidett. War tessɛiǧitem ɛad Isem inu s tewhibin nwem d imeyḍa nwem n ṣṣanam. 40 Minzi x wedrar inu iqeddsen, x wedrar yuɛřan n Israil, ammu i iqqar Sidi inu, SIDI, din ad ayi tsexxar qaɛ taddart n Israil, marra nitni. Din ad xasen arḍiɣ uca din ad ttareɣ tiwhibin nwem n usgeɛɛed uřa d tmenzut n min ɣa tessgeɛɛdem zi marra tiwhibin nwem iqeddsen. 41 Necc ad xawem arḍiɣ zi ssibbet n arriḥet ittfuḥen xmi kenniw ɣa ssuffɣeɣ zi řegnus u ad kenniw ssmuneɣ zi temmura mani kenniw zuzzareɣ uca ad ttwaqeddseɣ zzaywem zzat i-t tiṭṭawin n řegnus 42 uca ad tessnem belli Necc d SIDI, řami kenniw dd-iwyeɣ ɛawed ɣar temmurt n Israil, ɣar temmurt x tenni umi sswiẓẓḍeɣ afus inu, jjuǧeɣ ad tt wceɣ i řejdud nwem. 43 Din ad tidarem ibriden nwem d marra timegga nwem nni zi tessxemjen ixef nwem uca kenniw ad tcarhem ixef nwem zi ssibbet n marra timegga nwem iɛeffnen i teggim. 44 Kenniw ad tessnem belli Necc d SIDI, řami ggiɣ akidwem di ṭṭweɛ n Yisem inu, uca war iǧi ɛlaḥsab ibriden nwem iɛeffnen, u war iǧi ɛlaḥsab timegga nwem iɣeccen, a taddart n Israil, ammu i iqqar Sidi inu, SIDI.”