1 Yusa-dd ɣari wawař n SIDI, inna:

2 “A mmis n bnadem, ɛawed ict n ṭḥajit n twafit u ewc ijj n umedya i taddart n Israil, 3 uca ini: Ammu i iqqar Sidi inu, SIDI!

Agider d ameqqran s wafriwen arezmen,

daysen řewtad iziraren ccuren s warric d tintat ifarzen,

yusa-dd ɣar idurar n Lubnan

uca ikkes tuccent n tcejjart n tengelt,

4 aqa azeǧif n řefruɛ nnes issendayen ikkes i-t,

uca yiwi t ɣar ict n temmurt n ttijara

uca issars i-t deg ict n tendint n isebbaben.

5 Iksi zi zzariɛet n temmurt

uca igga i-tt deg ijj n yeyyar icna i wezraɛ.

Iksi tt, iẓẓu tt

am tcejjart n uṣefṣaf ɣar waman aṭṭas.

6 Teɣmi-dd zzariɛet uca tedweř d tazayart s řefruɛ wessɛen

ak-d trunku d aquḍaḍ

nni zi dewřent tseḍwin ɣar ugider,

am tuɣa iẓewran nnes qqimen sadu nnes.

Ammu i tedweř d tzayart nni issuffɣen tiseḍwin

uca tegga ad ssendyen ifetwan.

7 Tuɣa ɛawed ijj n ugider ameqqran nneɣni,

s wafriwen imɣaren d waṭṭas n arric,

uca xzar, tazayart tarra iẓewran nnes ɣares

uca tesswiẓẓeḍ tiseḍwin nnes ɣares

zeg iyyar mani tᵉttwaẓẓu

ḥima agider ad as issessu.

8 Tuɣa tᵉttwaẓẓu deg ijj n yeyyar isbeḥ zzat i waman aṭṭas

ḥima ad tessuffeɣ tiseḍwin uca ad tewc řɣiǧet

ḥima ad tedweř d tazayart ccuren.

9 Ini: Ammu i iqqar Sidi inu, SIDI!

Ma ad iffeɣ man aya mliḥ?

Ma war ittekkes ugider ameqqran iẓewran nnes

uca ad iqḍeɛ řɣiǧet nnes

ařami i ɣa taẓeɣ?

Wah ad taẓeɣ s marra tifray nni ɣares iɣemmyen,

war ittwaḥdij ɛad uɣiř ijehden niɣ řɣaci aṭṭas

ḥima ad tt ssgeɛɛden zeg iẓewran nnes.

10 Xzar, waxxa ẓẓun tt, ma xenni ad tefřeḥ?

Ma war tᵉttiẓeɣ xmi tt ɣa iřqef usemmiḍ n řɣarb?

Wah, ad taẓeɣ x iɛurar n řeɛraṣi mani dd-tɣemmi.”

11 Yusa-dd ɣari wawař n SIDI, inna:

12 “Ini řexxu i taddart iɣewwɣen: ‘Ma war tessinem min ɛnant tmesřayin-a?’ Ini: ‘Xzar, ajeǧid n Babil yusa-dd ɣar Urcalim uca iṭṭef ajeǧid nnes d řḥukkam nnes uca yiwyi ten ɣares di Babil.

13 Iṭṭef ɛawed ijjen zi zzariɛet igellden uca igga akides ijj n řɛahd uca yarra i-t ad iwc tajaǧit u ayt n jjehd di temmurt, aqa ikkes i-ten,

14 ḥima ad tiři tgeldit twaḍeɛ u war tessgiɛɛid ixef nnes, u ḥima ad teḥḍa řɛahd nnes, ad teqqim tᵉttbedda.

15 Maca netta iɣewweɣ xas, issekk ireqqasen nnes ɣar Miṣra maḥend ad as wcen iysan d ijj n ubarru n řgens. Ma ad iffeɣ aya mliḥ? Ma izemmar ad yarweř wenni iggin aya? Ma izemmar wenni yarẓin řɛahd ad yarweř?’ ” ^■  

16 “S tidett am ddareɣ Necc, iqqar Sidi inu, SIDI: Deg wemcan mani izeddeɣ ujeǧid nni t iggin d ajeǧid, wenni zi isseḥqar netta tajaǧit i d as ijjuǧ, d wenni zi yarẓ řɛahd i kides igga, aqa din ɣares, di řwest n Babil, ad immet!

17 War izemmar Firɛun s ijj n řɛeskar ameqqran d ijj n wegraw imɣar ad yegg uřa d ict n řḥajjet di ṭṭweɛ nnes deg umenɣi, xmi i ɣa ssgeɛɛden ijj n řḥiḍ uca xmi i ɣa bnan ijj n wecbar maḥend ad nɣen aṭṭas n iwdan. ^□  ■  

18 Aqa isseḥqar tajaǧit umi yarẓa řɛahd i x iwca afus nnes. Minzi netta igga marra man aya, war ittrakkwař.”

19 “S uya, ammu i iqqar Sidi inu, SIDI: S tidett am ddareɣ Necc, tajaǧit i d ayi ijjuǧ uca xenni isseḥqar i-tt, uřa d řɛahd i kidi igga uca xenni yarẓa i-t, ad ten-i-dd arreɣ x uzeǧif nnes! 20 Ad xas bezzɛeɣ tracca inu maḥend ad yiři icarf di texceft inu. Ad t awyeɣ ɣar Babil uca ad xas carrɛeɣ din zi ssibbet n řeɣdaret nnes i zi d ayi iɣdar. ^■   21 Marra inni zzayes yarewřen jmiɛ ak-d marra řɛeskar nnes, ad wḍan s ssif, uca inni iqqimen ad ttwazeǧɛen ɣar marra isemmaḍ. Xenni kenniw ad tessnem belli Necc, SIDI, ssiwřeɣ.” ^■  

22 “Ammu i iqqar Sidi inu, SIDI: Necc ad kkseɣ ijj n ufetwi n tuccent n tcejjart n tengelt yuɛřan uca ad t ẓẓuɣ. Zeg uzeǧif ak-d tseḍwin nnes ad qeřɛeɣ ict n tseṭṭa tarhef uca ad tt ẓẓuɣ x ijj n wedrar yuɛřan. 23 Ad tt ẓẓuɣ x wedrar yuɛřan qaɛ di Israil. Tanita ad tawi tiseḍwin uca ad tarr řɣiǧet, ad tedweř d tacejjart n tengelt ijehden. Ɛřam kuř ijḍaḍ s ɛřam kuř afriwen ad zedɣen sadu nnes, wah di tiři nnes ad zedɣen nitni, 24 uca ad ssnen marra ticejjura n yeyyar, aqa Necc, SIDI, ssehwiɣ tacejjart yuɛřan uca ssgeɛɛdeɣ tacejjart taquḍaḍt, u ssiẓɣeɣ tacejjart tazeyzat uca arriɣ tacejjart yuẓɣen ad tnewwar. Necc, SIDI, ssiwřeɣ uca ad t ggeɣ.” ^□