1 Yusa-dd ɣari wawař n SIDI, inna:

2 “Min kenniw yuɣin ařami ad dd-tiwyem awař-a ɣar wudem n temmurt n Israil uca teqqarem:

‘Ibabaten ccin aḍiř asemmaɣ uca tiɣmas n warraw dewřent ḥarecwent’? ^■  

3 S tidett am ddareɣ Necc, ammu i iqqar Sidi inu, SIDI: ‘Uct xawem mařa ɛemmarṣ ɛad ad tawyem awař-a di Israil! 4 Xzar, marra řeɛmur inu. Am řeɛmar n tbabat, uřa d řeɛmar n tmemmit inu. Řeɛmar nni ixḍan, ad immet.

5 Mařa ca n yijjen d amsegged i yeǧa, ittegg řḥeqq d min iseggden, 6 - war ittett ddbayeḥ x idurar, war issgiɛɛid tiṭṭawin nnes ɣar imeyḍa n l’aṣnam n taddart n Israil, war issefsid tamɣart n umqarreb nnes u war dd-ittqarrib ɣar temɣart nni iɛezzřen umi xas idammen, ^■   7 war iḥeṣṣar uřa d ijj, ittarra-dd ddiyyet i bu-amarwas, war ittkeccaḍ, wenni iǧuẓen ittic as weɣrum nnes u wenni d aɛaryan issdduri i-t s warruḍ, ^■   8 netta war yareṭṭeř s arriba niɣ ad iksi arbeḥ, afus nnes itteggʷej x min war iseggden, netta iḥekkem nican jar weryaz d ijj n weryaz nneɣni, ^■   9 iggur di tweṣṣa inu uca iḥeṭṭa lfarayiḍ inu umi ɣa yegg s řaman - , xenni aqa netta d amsegged, ad iddar s tidett, ammu i iqqar Sidi inu, SIDI.”

10 “Mařa yejj-dd mmis d aceffar, wenni issizzařen idammen d wenni itteggen icten zi tmesřayin-a,

11 waxxa netta s yixef nnes am tbabat war ittegg timesřayin-a, - maca wanita ittett tiwhibin x idurar, issefsad tamɣart n umqarreb nnes,

12 iḥeṣṣar řmeskin d umezřuḍ, ittkeccaḍ, war dd-yarri ddiyyet, issgeɛɛad tiṭṭawin nnes ɣar imeyḍa n l’aṣnam, ittegg ict n jjɛifect,

13 yareṭṭeř s arriba, ittᵉṭṭef arbeḥ -, ma xenni ad iqqim mmis wanita iddar? War ittɣimi iddar, umi igga marra jjɛayef nni. Ad ittwaneɣ nican, idammen nnes ad xas iřin!”

14 “Xzar, mařa ijj-dd ijj n mmis nni ittwařa marra ddnub nni ittegg babas, uca ixezzar waha am netta s yixef nnes war ittegg timesřayin nni,

15 - ixs ad yini war ittett x idurar, war issgiɛɛid tiṭṭawin nnes ɣar imeyḍa n l’aṣnam n taddart n Israil, war issefsad tamɣart n umqarreb nnes,

16 war iḥeṣṣar uřa d ijj, war imenneɛ ddiyyet, war ittkeccaḍ, ittic aɣrum nnes i wenni iǧuẓen, issduřuy i uɛaryan s warruḍ,

17 ittaggʷej s ufus nnes x umezřuḍ, war ikessi arriba d warbeḥ, ittegg s tsegda uca iḥeṭṭa tiweṣṣa inu -, aqa mmis wanita war ittmetti zi ssibbet n řmuɛṣiyyet n babas. Ad iddar s tidett.

18 Babas ad immet di řmuɛṣiyyet nnes, x umi igga bezzez x iwdan s řexcunect, ikecceḍ agřa uca igga min war iḥřin di řwest n řgens nnes.”

19 “Maca kenniw teqqarem: ‘Mayemmi mmis war ikessi řmuɛṣiyyet n babas?’ Minzi mmis tuɣa ittegg řḥeqq d tsegda uca iḥḍa marra tiweṣṣa inu uca igga i-tent, s uya ad iqqim iddar s tidett. ^■   20 Řeɛmar nni ixḍan, ad immet. Mmis war ikessi ca řmuɛṣiyyet n babas uca babas war ikessi ca řmuɛṣiyyet n mmis. Tasegda n umsegged ad tiři x yixef nnes u tuɛeffna n uɛeffan ad tiři x yixef nnes.

21 Maca mařa aɛeffan idweř-dd zi ddnub nni igga, ad iḥḍa marra tiweṣṣa inu uca ad yegg řḥeqq d tsegda, xenni ad iqqim iddar s tidett, war ittmetti ca. 22 Marra iɛeddiyen nnes nni igga, war d as ttwaḥessben ca. S tsegda nnes nni igga, ad iddar. 23 Ma ad arḍiɣ s tidett řmewt n iɛeffanen, iqqar Sidi inu, SIDI? Ma netta war ittɣimi iddar xmi dd ɣa idweř?” ^■  

24 “Maca mařa amsegged iḥeyyed x tsegda nnes uca ad igg ddeǧ ɛlaḥsab marra jjɛayef nni ittegg uɛeffan, ad igg amenni uřa d netta, ma xenni ad iqqim iddar? War tᵉttwaɛqař ɛad marra tasegda nni igga. S řeɣdaret nnes i zi iɣdar u s ddnub nnes i zi iddenb, s yina ad immet.”

25 “Teqqarem ɛawed: ‘Abrid n SIDI war iǧi ca nican!’. Sřem , a taddart n Israil, ma abrid inu war iǧi nican? Ma war ǧin s tidett aqa ibriden nwem war seggmen? ^■   26 Mařa iḥeyyed umsegged x tsegda nnes uca ittegg ddeǧ u s man aya ad immet, xenni ad immet di ddeǧ nnes nni igga. 27 Maca mařa uɛeffan idweř-dd zi tmegga nnes tiɛeffanin nni igga, uca ad igg řḥeqq d tsegda, xenni ad yarr řeɛmar nnes ad iqqim iddar. 28 Idweř ittwařa uca idweř-dd zi marra iɛeddiyen nnes nni igga. Ad iddar s tidett, war ittmetti ca. 29 Inni zi taddart n Israil qqaren: ‘Abrid n SIDI war iseggem!’ Ma ibriden inu war seggmen, a taddart n Israil? D tidett ma war ǧin ibriden nwem war seggmen? 30 S uya Necc ad xawem carrɛeɣ, a taddart n Israil, kuř ijj anect ibriden nnes, iqqar Sidi inu, SIDI. Ɛeqbem, dewřem-dd zi marra iɛeddiyen nwem, xenni war tᵉttiři řmuɛṣiyyet nwem d ssibbet ɛad i dd-yiwyen řmuɛṣiyyet i kenniw. ^■   31 Nḍarem řmuɛṣiyyet nwem i zi tɛeddam uca ggem uř nwem d amaynu u buḥbeř nwem d amaynu. Maɣar i ɣa temmtem, a taddart n Israil? ^■   32 Minzi Necc war arḍiɣ di řmewt n wi i ɣa yemmten, ammu i iqqar Sidi inu, SIDI, dewřem-dd uca ddarem.” ^■