1 Yusa-dd ɣari wawař n SIDI, inna:

2 “A mmis n bnadem, scen i Urcalim jjɛayef nnes, 3 uca ini: ‘Ammu i iqqar Sidi inu, SIDI, i Urcalim: X ř’aṣeř nnem d wexřaq nnem aqa cem zi temmurt n Ikenɛaniyyen. Tuɣa babam d Amuri u yemmam d Taḥittit. 4 Uca x třařit nnem: deg wass nni di dd-tᵉttwaxeřqed, war d am qessen taɛebbut niɣ ssirden cem s waman ḥima ad cem ssizdegen. War cem meǧḥen s tmeǧaḥt niɣ cem ssennḍen s teḥřucin. 5 Tuɣa war txezzar i cem uřa d ict n tiṭṭ ḥima ad am yegg ca zi ddegga, ḥima ad am tezziǧez, maca temmenḍared x wudem n yeyyar, s řḥegra n řeɛmar nnem deg wass nni di dd-tᵉttwaxeřqed.

6 Umi ẓwiɣ zzatek, ẓriɣ cem tᵉttneqřabed deg idammen nnem. Necc nniɣ am umi cem tuɣa deg idammen nnem: ‘Ddar!’, wah Necc nniɣ am umi tuɣa cem deg idammen nnem: ‘Ddar!’ 7 Arniɣ dayek ařami tfeyyḍed amecnaw aɣemmuy n yeyyar. Cem teymid, temɣared uca tiwḍed ad tiřid tecnid aṭṭas. Idmaren nnem jemden u ucewwaf nnem imɣar, maca tuɣa cem d taɛaryant d taqeddidt. 8 Umi ẓwiɣ zzatem, ẓriɣ cem, uca xzar, ussan nnem tuɣa d ussan n tayri. Necc sswiẓẓḍeɣ afriwen inu xam uca dřiɣ tuɛɛaryent nnem. Jjuǧeɣ ict n tjaǧit di ṭṭweɛ nnem uca udfeɣ ɣar Řɛahd akidem, ammu i iqqar Sidi inu, SIDI, uca ammu i tdewřed inu. ^■   9 Ssirdeɣ cem s waman uca sřiřeɣ idammen nnem zzayem uca dehneɣ cem s zzect.

10 Necc ssyarḍeɣ cem s warruḍ n uburḍa s tintat ifarzen uca ssɣuneɣ cem s tsiřa n teřmect n ddenfiř uca ssbeyseɣ cem s řeqṭen azdad uca dřiɣ cem s řehrir.

11 Qqneɣ cem s řehzuṭ uca ggiɣ am tmeqyasin ɣar ifassen nnem d ict n tseddect deg yiri nnem.

12 Ggiɣ taxadent di tinzart nnem d texrazin deg imejjan nnem d ttaj icnan x uzeǧif nnem.

13 Ammu i tᵉttwazehhjed s wureɣ d nnuqart uca arruḍ nnem tuɣa-t s řeqten azdad d řehrir d uburḍar s tintat ifarzen. Cem tuɣa teccid aren n yirden d tamment d zzect. Tuɣa cem tecnid aṭṭas uca tfeřḥed ařami tdewřed tessdahejed tagelda.

14 Iffeɣ zzayek ijj n yisem jar řegnus zi ssibbet n waẓri nnem, minzi tuɣa-t nican zeg ucewwar inu i xam ssarseɣ, ammu i iqqar Sidi inu, SIDI.’

15 ‘Maca tᵉttiqqed deg weẓri n yixef nnem uca tessefsed ixef nem am tᵉttiqqed deg yisem nnem uca tfarrɣed farq-ccɣeř nnem x marra wi yeɛdun: i wanita tuɣa aẓri nnem.

16 Teksid ca zeg warruḍ nnem, teggid řegɛudi s tintat aṭṭas i yixef nnem uca tfesded din. Amecnaw man aya ɛemmarṣ war imsar u ɛemmarṣ war ittiři ɛad.

17 Teksid řehzuṭ n wureɣ inu d nnuqart inu nni d ac wciɣ, uca teggid zi man aya řexyařat n yeryazen i yixef nnem uca tessefsded ixef nnem zzaysen.

18 Teksid arruḍ n uburḍar s tintat ifarzen uca třeḥḥfed asen zzayes uca tessarsed zzect inu d řebxur inu zzatsen.

19 Aɣrum inu nni d am wciɣ, awren d zzect d tamment i zi cem ssecceɣ, aqa tessarsed aya d arriḥet ittfuḥen zzatsen, ammu i imsar, iqqar Sidi inu, SIDI.’

20 ‘Iḥenjiren nnem d yessim nni dd-turwed i Necc, aqa teksid ten uca tqeddmed ten d macca i nitni. Ma xenni farq-ccɣeř nnem d drust waha, 21 ařami tɣarṣed i iḥenjiren inu uca tezzenzed ten umi ten tessekked x tmessi? ^■   22 Ɣar marra jjɛayef nnem d farq-ccɣeř nnem war tidared deg wussan n temẓi nnem umi tuɣa cem d taɛaryant, tᵉttwaɛarrid, u tᵉttneqřabed deg idammen nnem.’

23 ‘Awarni marra řɣar i teggid, - ay, ayehhat xam, iqqar Sidi inu, SIDI - , imsar 24 aqa cek tebnid i yixef nnem ict n řgeɛɛdet uca teggid i yixef nnem di marra azzay ict n řgeɛɛdet ḥima ad din wehhben tiɣarṣa. 25 Di marra azeǧif n webrid tebnid řegɛudi i yixef nnem. Tjeyyḥed aẓri nnem s ijj n nnɛi n webrid uca tesswiẓẓḍed iḍaren nnem i kuř ijj wi yeɛdun uca tarnid aṭṭas di farq-ccɣeř nnem. 26 Tessfesded ixef nnem uřa s ayt n Miṣra, jjiran nnem nni iqqbubbuzen s weysum nsen. Tarnid ammu aṭṭas di farq-ccɣeř nnem maḥend ad ayi tesɛared. 27 S uya, xzar, Necc sswiẓẓḍeɣ afus inu ḍidd nnem uca ssneqṣeɣ tasɣart nnem i d am dd-ittasen uca sellmeɣ cem ɣar meẓri n yinni cem icarrhen, ɣar yessis n Ifilisṭiniyyen, tinni ttseḍḥant zeg webrid nnem ifeḍḥen.’ ^■  

28 ‘Tessfesded ixef nnem ak-d ayt n Accur, umi war tejjiwned. Tessfesded ixef nnem akidsen, maca war tufid ajiwen. 29 Tarnid aṭṭas di ffarq-ccɣeř nnem ař di temmurt n isebbaben, tammurt n Ikaldaniyyen, uca uřa s uya war tejjiwned. 30 Mecḥař ihřec wuř nnem, ammu i iqqar Sidi inu, SIDI, mařa teggid marra aya, řxedmet n ict n temɣart n farq-ccɣeř iɣewwɣen, 31 umi tebnid ict n řgeɛɛdet ɣar uzeǧif n kuř abrid, teggid ict n řgeɛɛdet i tewhibt n tɣarṣa di kuř azzay, břa ma teǧid d tidett d tamɣart n farq-ccɣeř umi tesseḥqared řexřaṣ nnem n farq-ccɣeř. 32 A cem, tamɣart izennan, tenni itteṭṭfen ibarraniyyen deg wemcan n weryaz nnes. 33 I marra timɣarin n farq-ccɣeř wcin asent řmunet, maca cem tewcid timewca i marra inni cem ittexsen uca ammu i ten tesseɣwid s farq-ccɣeř nnem maḥend ad ɣarem dd-asen zi marra iɣezdisen. 34 Ammu, s farq-ccɣeř nnem, ad kidem imsar řɛeks n min imsaren i temɣarin nneɣni, minzi war cem ḍeffaren ca maḥend ad zzayem ggen s farq-ccɣeř nsen. Mařa cem tewcid asen řexřaṣ n temɣart n ffarq-ccɣeř, war tᵉṭṭfed ca řexřaṣ n temɣart n ffarq-ccɣeř, xenni aqa cem tdewřed d řɛeks zzaysen.’

35 ‘S uya, a tamɣart n farq-ccɣeř, seř i wawař n SIDI. 36 Ammu i iqqar Sidi inu, SIDI: Minzi tessfarrɣed nnḥas nnem ittwařeḥḥfen s ddra u tessɛarrid řeḥya nnem s farq-ccɣeř nnem ak-d yenni i cem ittexsen u ak-d marra imeyḍa nnem n l’aṣnam n jjɛayef nnem, u umi d asen tewcid idammen n iḥenjiren nnem, 37 xzar, s uya ad ssmuneɣ marra inni tuɣa cem ittexsen nni tuɣa i d am itteɛjben u marra inni texsed cem jmiɛ ak-d marra inni cem icarhen. Necc ad ten dd-ssmuneɣ xam zi marra iɣezdisen uca ad ssɛarriɣ řeḥya nnem, ař i ɣa ẓaren marra řeḥya nnem. 38 Necc ad xam carrɛeɣ ɛlaḥsab lfarayiḍ i tinni izennan d tinni issizzřen idammen uca ad cem sellmeɣ ɣar ijj n usizzeř n idammen i dd-iffɣen zeg wesɛar d tusmi. 39 Necc ad wceɣ cem deg ufus nsen uca nitni ad arẓen řgeɛɛdet nnem uca ad areddǧen řegɛudi nnem uca ad am kksen arruḍ nnem, ad awyen řehzuṭ nnem uca ad cem jjen d taɛaryant d taqeddidt. 40 Awarni aya ad xam ssiwḍen ijj n wegraw d ameqqran uca ad cem arejmen uca ad cem qessen s řesyuf nsen. 41 Nitni ad sscemḍen tudrin nnem s tmessi uca ad xam dd-ssehwan řeḥkamat zzat i tiṭṭawin n waṭṭas n temɣarin. Necc ad ggeɣ ad tessbedded zi farq-ccɣeř nnem, war tbeṭṭid ɛad řexřaṣ n farq-ccɣeř. ^■   42 Ammu i ɣa ssarseɣ asɛar inu xam uca tusmi inu ad xam tbeɛɛed u Necc ad dewřeɣ areyyḥeɣ, war ttɛessibeɣ ɛad. 43 Minzi war tidared deg wussan n temẓi nnem, umi d ayi tesɛared s marra aya, aqa da Necc ɛawed ad awyeɣ abrid nnem x yixef nnem, ammu i iqqar Sidi inu, SIDI. Ɛemmarṣ war ggur ad ggeɣ řefḍiḥet-a sennej i marra jjɛayef nnem.’ ^□  ■  

44 ‘Xzar, marra wenni issawařen s wawařen iweznen, ad xam issawař awař-a, ad yini: ‘Am yemmas, am yeǧis!’ 45 Aqa cem d yeǧis n yemmam nni iɛiffen aryaz nnes d iḥenjiren nnes, u cem d učmas n učmam nni iɛiffen zeg yeryazen nsent d iḥenjiren nsent. Tuɣa yemmam d Taḥittit u babam d Amuri. 46 Učmam tameqqrant aqa-tt Samarya, nettat d yessis nnes zeddɣen ɣar uẓermaḍ nnem, u učmam tenni d tameẓyant zzayem, tzeddeɣ ɣar yeffus nnem, aqa-tt d Sadum d yessis. 47 Cem war teggured deg ibriden nsent u war teggid amecnaw jjɛayef nsent. Maca axmi mammec ddegga tuɣa drust waha, tfesded marra ibriden nnem ktar zzaysent. 48 S tidett am ddareɣ Necc, ammu i iqqar Sidi inu, SIDI, aqa Sadum, učmam ak-d yessis, ɛemmarṣ war teggi amecnaw teggid cem d yessim. 49 Xzar, ta d řmuɛṣiyyet n učmam Sadum: nnfaxet, tyawant n weɣrum d ict n tudart di řhudnet břa amnus, ammu i iǧa umeddur nnes u n yessis, maca afus n wenni ittwaḥṣaren u n umezřuḍ war d as tessejhed. 50 Nitenti nnefxent uca ggint jjɛifect zzat i wudem inu. Umi ẓriɣ aya, nḍareɣ tent. ^■   51 Samarya war txeṭṭi uřa deg wezyen n ddnub nnem uca cem teggid jjɛayef ktar zzayes. S marra jjɛayef i teggid, tarred yessmam banent seggdent. 52 Xenni cem ɛawed, ksi řefḍiḥet nnem, minzi tewtid x yessmam. Umi teggid ddnub d jjɛifect ktar zzaysent, banent nitenti seggdent xam. Seḍḥa u ksi řefḍiḥet nnem, minzi tarrid yessmam banent seggdent. 53 Xmi i ɣa beṭṭřeɣ tameḥbast nsent, tameḥbast n Sadum d yessis, uřa d tameḥbast n Samarya d yessis, xenni ad beṭṭřeɣ ɛawed tameḥbast nnem, di řwest nsent, 54 ḥima ad teksid řefḍiḥet nnem uca ad tᵉsseḍḥid zi marra min teggid, řami cem ad tent tessfewwjed. 55 Mařa yessitmam, Sadum d yessis, ad dd-dewřent ɣar umeddur nsent amezwaru, uca uřa d Samarya d yessis ad dd-dewřent ɣar umeddur nsent amezwaru, xenni ad dd-tdewřed uřa d cem d yessitmam ɣar umeddur nkent amezwaru. 56 Deg wass n nnfaxet nnem war ittwaseř ca zeg uqemmum nnem x min imsaren i učmam Sadum, 57 qbeř ma iɛarra tuɛeffna nnem, am mammec i imsar aya di řweqt n řḥegra s ufus n yessis n Aram d marra inni d as dd-innḍen, u s ufus n yessis n Ifilisṭiniyyen nni cem isseḥqaren ɣar marra iɣezdisen nnem. 58 Řefḍayeḥ nnem d jjɛayef nnem ad tent teksid, ammu i iqqar SIDI.’

59 ‘Minzi ammu i iqqar Sidi inu, SIDI: Necc ad zzayem ggeɣ am mammec teggid cem umi tesseḥqared tajaǧit s treẓẓit n Řɛahd. 60 Ɛad ad ɛeqřeɣ x Řɛahd inu akidem deg wussan n temẓi nnem uca ad akidem ggeɣ ijj n Řɛahd i řebda. 61 Xenni ad tidared deg ibriden nnem uca ad tesseḍḥid xmi i ɣa tawyed yessmam nni mɣarent zzayem, jmiɛ ak-d tinni timaẓuẓin xam. Necc ad am tent wciɣ d yessim, maca war iǧi s webrid n řɛahd nnem. 62 Ad ggeɣ Řɛahd inu akidem uca ad tessned, aqa Necc d SIDI, 63 ḥima ad tidared dayes uca ad tesseḍḥid uca war tarezzmed ɛemmarṣ ɛad aqemmum nnem zi ssibbet n řefḍiḥet nnem, xmi i ɣa ssesřaḥeɣ di ṭṭweɛ nnem x marra min teggid!’, ammu i iqqar Sidi inu, SIDI.”