1 Yusa-dd ɣari wawař n SIDI, inna:

2 “A mmis n bnadem, nabb ḍidd i inabiyyen n Israil inni ittnebban, uca ini i yenni ittnebban ɣar meẓri n wuř nsen: ‘Srem i wawař n SIDI! 3 Ammu i iqqar Sidi inu, SIDI: Uct x inabiyyen ibuḥařiyyen nni igguren awarni i buḥbeř n yixef nsen u awarni min war ẓrin! 4 A Israil, inabiyyen nwem dewřen amecnaw iceɛban jar řxirbat. 5 War tuřyem ɣar tizzeyyin di řeḥyuḍ n tendint niɣ tebnam řḥiḍ i taddart n Israil ḥima ad teqqimem tᵉttbeddam deg umenɣi deg wass n SIDI. 6 Nitni ttwařin timeẓriwin war iǧin d uɛezzem issxarriqen, aqa inni iqqaren: SIDI issiweř!, waxxa SIDI war ten issekk ca, ɛad sittimen belli awař ad iffeɣ. 7 Ma kenniw war teẓrim xenni tameẓriwt war iǧin niɣ tessawařem tagezzant issxarriqen umi teqqarem: SIDI issiweř!, waxxa Necc war ssiwiřeɣ ca?’ ”

8 “S uya, ammu i iqqar Sidi inu, SIDI: ‘Minzi tessawařem řbaṭeř u tᵉttwařam axarriq, s uya, xzar, Necc aqa ayi xawem, iqqar Sidi inu, SIDI. 9 Ad yiři ufus inu ḍidd i inabiyyen nni ittwařan řbaṭeř u ttgezzanen s ixarriqen. Nitni war ttɣimin ca deg wegraw n řgens inu, u war ttwazemmimen ca di lista n taddart n Israil u war dd-ttasen x wudem n temmurt n Israil. Kenniw ad tessnem belli Necc, Sidi, d SIDI.’ ”

10 “S uya, minzi nitni ttɣarran řgens inu uca qqaren: ‘Řehna!’, am war iǧi řehna, uca ammu i ɣa ibna wanita ijj n řḥiḍ ittenhezzan, uca xzarem, ttřeḥḥafen as ɛawed s jjar.

11 Ini i yenni ittřeḥḥafen s jjar, belli ad iwḍa řḥiḍ. Ad dd-yas wenẓar ijehden uca kenniw, a ibquqen imeqqranen n tebruri, ad tewḍam, uca isemmiḍen n tḥaryaḍt ad dd-ffɣen s jjehd.

12 Uca xzar, xmi iwḍa řḥiḍ, ma war d awem qqaren: ‘Mani iǧa jjar i zi d as třeḥḥfem?’

13 S uya, ammu i iqqar Sidi inu, SIDI: ‘Deg wesɛar inu ad t arẓeɣ s isemmiḍen n tḥaryaḍt, u s weɣḍab inu ad yiři wenẓar ijehden aṭṭas, u s wesɛar inu ad wḍan ibquqen imeqqranen n tebruri ařami i ɣa iqḍa. ^□  

14 Ammu i ɣa ɣeḍřeɣ řḥiḍ nni třeḥḥfem s jjar ifesyen, u Necc ad t mmenḍareɣ ɣar temmurt ařami i ɣa ittwaɛarra dsas nnes. Ad tewḍa tendint u kenniw ad tᵉttwahellkem di řwest nnes uca ad tessnem belli Necc d SIDI.

15 Ad nḍareɣ asɛar inu x řḥiḍ u x yenni t idřin s jjar uca ad awem iniɣ: War din iǧi ɛad řḥiḍ uřa d yenni d as iřeḥḥfen,

16 inabiyyen n Israil nni inebban x Urcalim uca twařin tameẓriwt n řehna i nettat am war iǧi řehna!’, ammu i iqqar Sidi inu, SIDI.”

17 “Cek, a mmis n bnadem, arr udem nnek ɣar yessis n řgens nnek, tinni ittnebban zeg wuř n yixef nsent, u nebba xasent,

18 uca ini: ‘Ammu i iqqar Sidi inu, SIDI: Uct x temɣarin nni ittxeyyaḍen řecfen x marra řemfaṣeř n ifassen inu uca tteggent iřeḥḥaf x uzeǧif n umeqqran d umeẓyan maḥend ad gmarent řeɛmur! Ma texsent ad tegmarent řeɛmur n řgens inu u ad teḥḍant tudart n yixef nkent?

19 Ma texsent ad ayi tessfesdent ɣar řgens inu di ṭṭweɛ n ca n wuřawen n imendi d ca n iřeqqwaz n weɣrum, maḥend ad tenɣent řeɛmur nni war iɛeddeř ad mmten u maḥend ad teḥḍant tudart n řeɛmur nni war iɛeddeř ad qqimen ddaren, s ixarriqen nkent ɣar řgens inu nni issḥessan ɣar uxarriq?’ ” ^■  

20 “S uya, ammu i iqqar Sidi inu, SIDI: ‘Xzar, ad arreɣ řecfen nkent i zi tyemmarent din, ad ḍwen ak-d řeɛmur. Ad ten qeřɛeɣ zeg iɣaǧen nkent uca ad deřqeɣ i řeɛmur i tyemmarent, ad ggeɣ řeɛmur ad ḍwen. 21 Ad carrgeɣ iřeḥḥafen nkent uca ad ssnejmeɣ řgens inu zeg ifassen nkent ařami nitni war ttiřin ɛad d takeccaḍt deg ifassen nkent. Xenni kennint ad tessnent belli Necc d SIDI, 22 minzi kennint tessxeyyqent uř n umsegged s ixarriqen, umi Necc simant inu war dayes ggiɣ řeḥriq, u minzi kennint tessjehdent ifassen n iɛeffanen ařami aɛeffan war dd-idwiř zeg webrid nnes aɛeffan maḥend ad iqqim iddar. 23 S uya war tẓarrem ɛad timeẓriwin war iǧin u war tᵉtteggem ɛad s uɛezzem. Necc ad ssnejmeɣ řgens inu zeg ufus nwem u kenniw ad tessnem belli Necc d SIDI.’ ”