1 Usin-dd ɣari yeryazen zeg imɣaren n Israil uca qqimen zzati. ^■   2 Xenni yusa-dd ɣari wawař n SIDI, inna:

3 “A mmis n bnadem, iryazen-a ssgeɛɛden imeyḍa n l’aṣnam nsen deg wuř nsen uca ggin ssibbet n uneqraḍ i dd-yiwyen řmuɛṣiyyet nsen nican zzat i yixef nsen. Ma Necc mcawareɣ ɛad akidsen? 4 S uya, cek siweř akidsen uca ini asen: ‘Ammu i iqqar Sidi inu, SIDI: Kuř aryaz zi taddart n Israil nni issgeɛɛden imeyḍa n l’aṣnam deg wuř nnes uca igga ssibbet n uneqraḍ i dd-yiwyen řmuɛṣiyyet nnes nican zzat i wudem nnes uca ad dd-yas ɣar unabi, Necc, SIDI, ad xas dd-yarr, mařa ittas-dd, anect řqedd n ubarru n imeyḍa nnes n l’aṣnam, 5 ḥima ad ṭṭfeɣ taddart n Israil s wuř nsen, maɣar aggʷejen xafi marra zi ssibbet n imeyḍa nsen n l’aṣnam.’ ”

6 “S uya, ini i taddart n Israil: ‘Ammu i iqqar Sidi inu, SIDI: Dewřem-dd uca qeřbem x imeyḍa nwem n l’aṣnam uca arrem iɣembab nwem x marra jjɛayef nwem.’ 7 Minzi i kuř aryaz zi taddart n Israil u zi ibarraniyyen nni izeddɣen di Israil, - wenni i ɣa yaggʷejen zi ḍeffar inu u ittejja ad dd-adfen imeyḍa n l’aṣnam ɣar wuř nnes, uca igga ssibbet n uneqraḍ i dd-yiwyen řmuɛṣiyyet nnes nican zzat i wudem nnes uca xenni ad dd-yas ɣar unabi, maḥend ad yarzu zzayi ccwar i yixef nnes - , aqa Necc d SIDI, wah ad xas dd-arreɣ. 8 Necc ad arreɣ udem inu ḍidd i weryaz nni uca ad t ssjɛareɣ ařami i ɣa idweř d řeɛřamet uřa d ssibbet i wawařen iweznen. Necc ad t qeḍɛeɣ zi řwest n řgens inu u kenniw ad tessnem aqa Necc d SIDI.’ ” ^■  

9 “Xmi ijj n unabi ijja ixef nnes ad as ɣarren uca issiweř ijj n wawař, xenni Necc, SIDI, ad ɣarreɣ anabi nni uca ad sswiẓẓḍeɣ afus inu ḍidd nnes uca ad t teḥḥiɣ zi řwest n řgens inu n Israil. ^■  

10 Nitni ad arbun řmuɛṣiyyet nsen. Anect n řmuɛṣiyyet n yinni yarezzun ccwar, ammu i ɣa tiři řmuɛṣiyyet n unabi nni,

11 ḥima taddart n Israil war tᵉttweddar ɛad zi ḍeffar inu u nitni war ssxemmajen ɛad ixef nsen s marra ixeṭṭan nsen. Xenni ad ayi iřin d řgens u Necc ad iřiɣ d AREBBI nsen, ammu i iqqar Sidi inu, SIDI.”

12 Yusa-dd ɣari wawař n SIDI, inna:

13 “A mmis n bnadem, mařa texḍa ict n temmurt akidi am tᵉttegg s řɣedran ameqqran, xenni Necc ad sswiẓẓḍeɣ afus inu ḍidd nnes. Ad arẓeɣ řeɛweč n weɣrum nnes u ad ssekkeɣ dayes řaẓ u ammu i ɣa teḥḥiɣ am bnadem uřa d řmař. ^■  

14 Mařa tuɣa aten di řwest nnes třata n yeryazen-a, Nuḥ d Daniyil d Ayub, waxxa amenni ad fekken nitni mɣir řeɛmar n yixef nsen s tsegda nsen, ammu i iqqar Sidi inu, SIDI.”

15 “Mařa ggiɣ ad ẓwan imuddaren n řexřa x temmurt uca ad zzayes keccḍen iḥenjiren, ařami tedweř d ddemnet, ařami war yeǧi wi ssenni i ɣa yeɛdun zi ssibbet n imuddaren n řexřa,

16 waxxa tuɣa třata n yeryazen nni di řwest nnes, s tidett am ddareɣ Necc, issawař Sidi inu, SIDI, war zemmaren ad fekken iḥenjiren niɣ tiḥenjirin, ad fekken mɣir ixef nsen, uca tammurt ad tedweř d ddemnet.”

17 “Niɣ ad ssiwḍeɣ ssif x temmurt nni, ad iniɣ: ‘Ssif, ekk x temmurt!’, ařami zzayes i ɣa qeḍɛeɣ bnadem d řmař,

18 s tidett am ddareɣ Necc, iqqar Sidi inu, SIDI, ɛad waxxa tuɣa třata n yeryazen nni di řwest nnes, waxxa amenni war zemmaren ad fekken iḥenjiren niɣ tiḥenjirin, ad fekken mɣir ixef nsen.”

19 “Niɣ ad ssekkeɣ ṭṭaɛun ɣar temmurt nni uca ad ssfarɣeɣ asɛar inu ixeǧḍen s idammen ařami zzayes i ɣa qeḍɛeɣ bnadem d řmař, 20 s tidett am ddareɣ Necc, iqqar Sidi inu, SIDI, ɛad waxxa tuɣa Nuḥ d Daniyal d Ayub di řwest nnes, war zemmaren ad fekken iḥenjiren niɣ tiḥenjirin, ad fekken mɣir ixef nsen s tsegda nsen.”

21 “Minzi ammu i iqqar Sidi inu, SIDI: Mahu xmi i ɣa ssekkeɣ ḍidd i Urcalim arebɛa n řeḥkamat inu iqesḥen: ssif d řaẓ d řmař n řexřa d ṭṭaɛun maḥend ad zzayes qeḍɛeɣ bnadem d řmař! 22 Uca xzar, ad dayes qqimen ɛad inni innejmen u nitni ad ttwanedhen barra, am iḥenjiren am tḥenjirin. Xzar, ad ɣarwem dd-ffɣen uca kenniw ad tẓarem abrid nsen d řexdayem nsen uca kenniw ad ttwasfewwjem x řɣar nni ssiwḍeɣ x Urcalim, wah x marra min xas ssiwḍeɣ. 23 Nitni ad kenniw ssfewwjen xmi i ɣa tẓarem abrid nsen d řexdayem nsen uca kenniw ad tessnem belli marra min dayes ggiɣ, war t ggiɣ břa ssibbet, ammu i iqqar Sidi inu, SIDI.”