1 Yusa-dd ɣari wawař n SIDI, inna:

2 “A mmis n bnadem, cek tzeddɣed deg ict n taddart iɣewwɣen, maɣar nitni ɣarsen tiṭṭawin maḥend ad ttwařan, maca war ttwiřin, uřa d imejjanen maḥend ad sřen, maca war ttesřin, minzi nitni d ict n taddart iɣewwɣen. ^■   3 Cek, a mmis n bnadem, sewjed zzad i lmenfa uca uyur di tmeḥbast zzat i tiṭṭawin nsen. Ad tuyured di lmenfa zzat i tiṭṭawin nsen zeg wemcan nnek ɣar ijj n wemcan nneɣni. Ad taɣ ad neɛmen aqa aten d ict n taddart iɣewwɣen. 4 Ad tessuffɣed zzad nnek deg uziř zzat i tiṭṭawin nsen, amecnaw zzad i lmenfa, ad teffɣed di tmeddit zzat i tiṭṭawin nsen, amecnaw iwdan inni igguren di lmenfa. 5 Egg anuqqib di řḥiḍ zzat i tiṭṭawin nsen uca suffeɣ marra aya zzayes. 6 Zzat i tiṭṭawin nsen ad t tawyed x tɣarḍin nnek, di tbambast ad tessuffɣed aya. Ad teffared udem nnek, ařami war tẓarred tammurt, minzi ggiɣ cek d řeɛřamet n řeɛjeb i taddart n Israil.” 7 Necc ggiɣ am mammec i d ayi iweṣṣa. S uziř ssuffɣeɣ zzad inu am zzad i lmenfa. Ɣar tmeddit ɣziɣ s ufus inu x řḥiḍ u di ǧiřet ssuffɣeɣ marra ɣar barra uca iwyeɣ t x tɣarḍin inu zzat i tiṭṭawin nsen.

8 Yusa-dd ɣari wawař n SIDI x tuffut, inna:

9 “A mmis n bnadem, ma war d ac tenna taddart n Israil, taddart iɣewwɣen nni: ‘Min tegged?’

10 Ini asen: ‘Ammu i iqqar Sidi inu, SIDI! Řḥukm issaggʷaden wanita ad yiři x řḥakem di Urcalim u x marra taddart n Israil umi zeddɣen nitni jar asen.’

11 Ini: ‘Necc d řeɛřamet n řeɛjeb i kenniw. Am mammec ggiɣ necc, ammu i ɣa ggen daysen, ad ttwanedhen d imeḥbas ɣar lmenfa.

12 Řḥakem nni iǧan di řwest nsen, ad yarbu zzad x teɣruḍt nnes di ǧiřet uca ad iffeɣ. Nitni ad ɣzan x řḥiḍ maḥend ad zzayes t ssuffɣen. Netta ad ideř aɣembub nnes ařami i ɣa iqqim war izemmar ad iẓar ɛad tammurt s tiṭṭawin nnes. ^■  

13 Necc ad xasen bezzɛeɣ tracca inu ařami i ɣa idweř d ameḥbus di texceft inu uca ad t awyeɣ ɣar Babil, ɣar temmurt n Ikaldaniyyen. Netta maca war tt iẓarr, maca waxxa amenni ad din immet. ^■  

14 Marra inni d as dd-innḍen maḥend ad t ɛawnen d marra bandiyyat n řɛeskar nnes, ad ten bezzɛeɣ i marra isemmaḍ uca ad jebdeɣ ssif awarni asen. ^■  

15 Ammu i ɣa ssnen belli Necc d SIDI, xmi ten ɣa bezzɛeɣ jar řegnus uca ad ten zuzzareɣ di temmura.

16 Maca ad zzaysen jjeɣ ca n yeryazen inni inejmen zi ssif, zi řaẓ u zi ṭṭaɛun, ḥima ad ɛawden i řegnus mani i ɣa yawḍen x marra jjɛayef nsen nni ggin. Xenni ad ssnen belli Necc d SIDI.’ ”

17 Yusa-dd ɣari wawař n SIDI, inna:

18 “A mmis n bnadem, ad tecced aɣrum nnek s tarjiji uca ad teswed aman nnek s warjef d wecḍan.

19 Ad tinid i řgens n temmurt: ‘Ammu i iqqar Sidi inu, SIDI, x imezdaɣ n Urcalim i yeǧan x wudem n temmurt n Israil: Nitni ad ccen aɣrum nsen s wecḍan u ad swen aman nsen s wejɛar, minzi marra aɛemmar nnes ad ittwakkes zi temmurt zi ssibbet n lɛunf n marra inni dayes izeddɣen. ^■   20 Tineddam izeddɣen ad dewřent d řxarbet uca tammurt ad tedweř d areddeǧ. Ad tessnem belli Necc d SIDI.’ ”

21 Yusa-dd ɣari wawař n SIDI, inna:

22 “A mmis n bnadem, man amedya nni ɣarwem din di temmurt n Israil, umi teqqarem: ‘Ɛeddun wussan uca uřa d ict n tmeẓriwt teffeɣ-dd!’? 23 S uya ini asen: ‘Ammu i iqqar Sidi inu, SIDI: Necc ad ssbeddeɣ amedya-ya, ařami i ɣa qqimen war qqaren ɛad man aya am umedya di Israil. S uyenni siweř akidsen ammu: Aqa iwḍen-dd ussan nni, uca uřa d aseqfeř n kuř tameẓriwt! 24 Minzi war tᵉttiři ɛad tmeẓriwt war iǧin uřa d tagezzant s wawařen imiziḍen di taddart n Israil. 25 Minzi Necc, SIDI, ad ssiwřeɣ. Awař i ɣa ssiwřeɣ, ad yiři, war ittɛeṭṭař ɛad, minzi deg wussan nwem, a taddart iɣewwɣen, ad ssiwřeɣ ijj n wawař uca ad t kemmřeɣ, iqqar Sidi inu, SIDI.’ ”

26 Yusa-dd ɣari wawař n SIDI, inna:

27 “A mmis n bnadem, xzar, inni n taddart n Israil qqaren: ‘Tameẓriwt nni ittwařa aqa-tt i yijj n řweqt awarni i waṭṭas n wussan. Ittnabb x ikuden iggʷejen aṭṭas.’ 28 S uya ini asen: ‘Ammu i iqqar Sidi inu, SIDI: War ittɛeṭṭař ɛad uřa d ijj zeg wawařen inu. Awař i nniɣ, ad yiři, ammu i iqqar Sidi inu, SIDI.’ ”