1 Xenni issgeɛɛed ayi Arruḥ ɛawed uca indeh ayi ɣar Tewwart n Ccarq n Taddart n SIDI nni iǧan ɣar ccarq, u xzar, ɣar wadaf n tewwart aqa din xemsa u-ɛicrin n yeryazen u di řwest nsen ẓriɣ Yazanya, mmis n Ɛazur, u Falaṭya, mmis n Banaya, řḥukkam n řgens. 2 Netta inna ayi: “A mmis n bnadem, ina d iryazen nni ittxarriṣen di ddeǧ, tticen ccwar aɛeffan di tendint-a, 3 qqaren: ‘War bennam ɛad tudrin deg wussan-a! Tanita d marmita uca neccin d aysum!’ ^□   4 S uya nabb xasen, nabb, cek, a mmis n bnadem!”

5 Xenni iwḍa-dd Arruḥ n SIDI xafi uca Netta inna ayi: “Ini: ‘Ammu i iqqar SIDI! Ammu i tessiwřem kenniw, a taddart n Israil, maɣar Necc ssneɣ řeḥwayej nni ittgeɛɛaden ɣar buḥbeř nwem. 6 Tarnim řxecbat n yenni ittwanɣen nwem di tendint-a uca teccurem ibriden nnes s řxecbat n yenni ittwanɣen!’ 7 S uya, ammu i iqqar Sidi inu, SIDI: ‘Inni zzaywem ittwanɣen, inni tessarsem di řwest nnes, aqa aten d aysum u nettat d marmita, maca Necc ad kenniw ssuffɣeɣ zi řwest nnes. ^□   8 Ssif teggʷdem, d ssif ad xawem dd-ssekkeɣ, iqqar Sidi inu, SIDI. 9 Necc ad kenniw nedheɣ zi řwest nnes u ad wceɣ kenniw deg ufus n ibarraniyyen uca ad ggeɣ řeḥkamat jar awem.

10 S ssif ad tewḍam. Di temmurt n Israil ad xawem ḥekmeɣ uca ad tessnem belli Necc d SIDI.

11 Tandint-a war d awem tᵉttiři d marmita u kenniw war dayes tᵉttiřim d aysum. Necc ad xawem ḥekmeɣ di temmurt n Israil,

12 u kenniw ad tessnem belli Necc d SIDI, minzi war tuyurem di tewṣiyyat inu u war teggim ɛlaḥsab lfarayiḍ inu, maca teggim am mammec lfarayiḍ n řegnus i d awem dd-ittennḍen.’ ”

13 Řami tuɣa ttnabbiɣ, imsar aqa Falaṭya, mmis n Banaya, immut. Xenni wḍiɣ ɣar temmurt s uɣembub inu uca řaɣiɣ s tmijja ijehden, nniɣ: “A, Sidi inu, SIDI, ma ad teqḍid min iqqimen zi Israil?”

14 Xenni yusa-dd ɣari wawař n SIDI, inna:

15 “A mmis n bnadem, aqa d aytmac, aytmac, iryazen nni iǧan d imefdiyyen nwem d marra taddart n Israil i d asen marra nnan imezdaɣ n Urcalim: ‘Aggʷejem x SIDI, tammurt-a temmewc aneɣ d tasɣart!’

16 S uya ini: ‘Ammu i iqqar Sidi inu, SIDI: Waxxa Necc ssiggʷejeɣ ten jar řegnus, waxxa Necc bezzɛeɣ ten x temmura, s marra aya ad asen iřiɣ ɛad cwayt d Zzawect Iqeddsen di temmura mani i ɣa yawḍen.’

17 S uya ini: ‘Ammu i iqqar Sidi inu, SIDI: Necc ggur ad kenniw dd-ssmuneɣ zi řegnus, ad kenniw ssmuneɣ zi temmura mani i ɣa tᵉttwabezzɛem u Necc ad awem wceɣ tammurt n Israil.

18 Nitni ad din awḍen u ad zzayes kksen marra nnɛawat nnes n ṣṣanam d marra jjɛayef nnes

19 u Necc ad awem wceɣ ijj n wuř d ijj n buḥbeř n jdid di daxeř nwem uca ad kkseɣ uř nwem n weẓru zi arrimet nsen u ad asen wceɣ uř n weysum, ^■   20 ḥima ad uyuren di tewṣiyyat inu u ad ḥḍan lfarayiḍ inu u ad zzaysent ggen. Ad iřin d řgens inu u Necc ad iřiɣ d AREBBI nsen. ^■   21 Maca inni uř nsen ad iḍfar uř n nnɛawat nsen n ṣṣanam d jjɛayef nsen, Necc ad ggeɣ ibriden nsen x uzeǧif nsen, ammu i iqqar Sidi inu, SIDI.’ ” ^■  

22 Xenni ssgeɛɛden ikiruben afriwen nsen u tijarrarin tuɣa zzatsen uca aɛuǧi n AREBBI n Israil tuɣa-t xasen sennej nsen. ^□   23 Xas uca igeɛɛed uɛuǧi n SIDI zi řwest n tendint uca iqqim ittbedda x wedrar nni iǧan ɣar ccarq n tendint. 24 Xenni issgeɛɛed ayi-dd Arruḥ uca yiwi ayi di tmeẓriwt s Arruḥ n AREBBI ɣar temmurt n Ikaldaniyyen ɣar imenfiyyen. Awarni man aya tgeɛɛed zzayi tmeẓriwt i ẓriɣ, 25 u ssiwřeɣ ɣar imenfiyen marra min tuɣa d ayi isscen SIDI.