10
1 Awarni aya ẓriɣ, xzar, sennej i řqubbet, sennej i uzeǧif n ikiruben, tuɣa din min dd-ittbanen amecnaw aẓru n ṣaffir, am wudem n min yarwesen deg ijj n řɛarc, u sennej i nitni iḍhar-dd Netta, 2 uca issiweř ak-d weryaz nni yarḍen arrud n řeqṭen, inna: “Adef-dd ɣar daxeř jar tjarrarin ittennḍen, ař sadu i ikiruben, uca ccur ifassen nnek s řefḥem itteḥduduqen zi jar ikiruben uca zeǧeɛ i-t x tendint!” Uca yudef-dd jar asent zzat i tiṭṭawin inu. □ 3 Ikiruben tuɣa bedden ɣar uɣezdis afusi n Taddart umi dd-yadef weryaz ɣar daxeř, uca ijj n useynu iccur řemraḥ n daxeř. 4 Aɛuǧi n SIDI issgeɛɛed ixef nnes zi sennej n uxirub, iɛdu x tnebdat n tewwart n Taddart uca tᵉttwaccur Taddart s useynu u řemraḥ n zzat tuɣa iccur s tessiqt n uɛuǧi n SIDI. 5 Drizz n wafriwen ittwaseř-dd ař daxeř di řemraḥ n barra, amecnaw tmijja n AREBBI, Amzemmar x kuřci, xmi issawař.
6 Imsar awarni řami yumur Netta i weryaz nni yarḍen řeqṭen, inna: “Ksi timessi zi jar tjarrarin ittenḍen, zi jar ikiruben!”, aqa wanita yudef-dd uca ibedd zzat i tjarrart ittenḍen. 7 Xenni isswiẓẓeḍ ijj n ukirub afus nnes zi jar ikiruben ɣar tmessi nni tuɣa jar asen, iksi zzayes uca issars i-tt deg ifassen n wenni yarḍen řeqṭen. Wanita iksi tt uca iffeɣ. 8 Sadu wafriwen n ikiruben ittwaẓar ca amecnaw ṣṣifet n ufus n bnadem.
9 Xenni ẓriɣ, xzar, aqa din arebɛa n tjarrarin ɣar uɣezdis n ikiruben, ict n tjarrart ɣar uɣezdis n ijj n ukirub. Udem n tjarrarin amecnaw udem n weẓru n ‘texrisulit’. ■
10 X mammec dd-ḍharent, aqa arebɛa n tjarrarin nni ɣarsent ṣṣifet d icten, axmi ict n tjarrart tᵉttřiq nican deg ict n tjarrart nneɣni.
11 Xmi gguren, gguren ɣar arebɛa n iɣezdisen nsen. Nitni war ttneqřiben ca xmi gguren, minzi amcan mani tarra tjarrart n zzat azeǧif nnes, aqa ḍfaren tt-i-dd. Nitni war nnqeřben ca xmi gguren.
12 Marra arrimet nsen, iɛurar nsen, ifassen nsen d wafriwen nsen d tijarrarin nsen ccuren s tiṭṭawin deg wenneḍ nsen ɣar marra arebɛa imuddaren nni, wah ɛad tijarrarin nsen.
13 Sřiɣ aqa ittřaɣa asent i tjarrarin: ‘Tajarrart n ddewran!’
14 Kuř ijj ɣares arebɛa n wudmawen: udem amezwaru tuɣa d udem n ukirub, u udem wiss tnayen d udem n bnadem, u udem wiss třata d udem n weyrad, u udem wiss arebɛa d udem n ugider.
15 Ssgeɛɛden ikiruben ixef nsen. Wa d simant n umuddar i ẓriɣ ɣar yeɣzar n Xabur.
16 Umi uyuren ikiruben, uyurent uřa d tijarrarin ɣar uɣezdis nsen, umi ssgeɛɛden ikiruben afriwen nsen maḥend ad ssgeɛɛden ixef nsen zi temmurt, war qnunnyent tjarrarin ařami aggʷejent x uɣezdis nsen. ■
17 Umi bedden nitni, beddent uřa d nitenti, umi ssgeɛɛden nitni ixef nsen, ssgeɛɛdent uřa d nitenti ixef nsent, minzi buḥbeř n imuddaren tuɣa-t daysent. ■
18 Xenni iffeɣ uɛuǧi n SIDI zi sennej n tnebdat n Taddart uca ibedd sennej i ikiruben.
19 Ikiruben ssgeɛɛden afriwen nsen uca, umi dd-ffɣen, ssgeɛɛden ixef nsen zi temmurt zzat i tiṭṭawin inu, uřa d tijarrarin ɣar uɣezdis nsen uca qqimen bedden ɣar wadaf n Tewwart n Ccarq n Taddart n SIDI uca aɛuǧi n AREBBI tuɣa-t xasen sennej nsen. 20 Wa d amuddar i ẓriɣ sadu AREBBI n Israil ɣar yeɣzar n Xabur. Xenni ssneɣ belli tuɣa aten d ikiruben. ■ 21 Kuř ijj ɣares arebɛa n wudmawen u kuř ijj ɣares arebɛa n wafriwen u sadu afriwen nsen aqa din min yarwesen deg ifassen n iwdan. ■ 22 Udmawen nsen amecnaw udmawen nni ẓriɣ ɣar yeɣzar n Xabur, am wudem nsen uřa d nitni s yixef nsen. Nitni gguren kuř ijj nican ɣar zzat nnes.