Aneggaru ad dd-yas!
7
1 Yusa-dd ɣari wawař n SIDI, inna: 2 “Cek, a mmis n bnadem, ammu i iqqar Sidi inu, SIDI, i temmurt n Israil:
Aneggar,
yusa-dd uneggar
x arebɛa n iɣezdisen n temmurt.
3 Řexxu yusa-dd xam uneggar nnem,
minzi ad ɣarem dd-sekkeɣ aɣḍab inu
u ad xam ḥekmeɣ am ibriden nnem
uca ad xam ggeɣ marra jjɛayef nnem.
4 War d am zziǧizent tiṭṭawin inu u war areḥḥmeɣ,
minzi ad arreɣ ibriden nnem x uzeǧif nnem,
u jjɛayef nnem ad cem řeqfent di řwest nnem.
Ammu i ɣa tessnem belli Necc d SIDI.” ■
5 “Ammu i iqqar Sidi inu, SIDI:
Ijj n řɣar, ijj n řɣar ifarzen,
aqa ad dd-yas.
6 Yusa-dd uneggar,
aneggar yusa-dd,
ifaq-dd ḍidd nnem,
aqa ad dd-yas!
7 Tusa-dd ɣarek tqedduḥt,
a amezduɣ n temmurt,
tasaɛɛet tusa-dd,
ass n uxarweḍ iqarreb-dd
u war din asřiwřew zeg idurar. □
8 Řexxu deɣya ad xam zeǧɛeɣ asɛar inu
uca ad dayem kemmřeɣ aɣḍab inu.
Ad xam ḥekmeɣ anect n ibriden nnem
uca ad xam ssiwḍeɣ marra jjɛayef nnem.
9 War zziǧizeɣ u war areḥḥmeɣ.
Ad ɣarem dd-arreɣ min tessdaheǧed,
u jjɛayef nnem ad iřint di řwest nnem
u kenniw ad tessnem belli aqa Necc d SIDI
wenni kenniw iccaten.”
10 “Xzar, ass, xzar, aqa da yiweḍ-dd,
teqḍa tqedduḥt,
tenewwar taɣɣarct,
tessendi nnfaxet.
11 Igeɛɛed lɛunf am ict n teɣɣarct n řɣar.
War zzaysen iqqim uřa d ijj,
walu n řɣaci nsen inhewřen, walu n ddriz nsen,
u walu n usemɣar ad ɣarsen iqqim ɛad.
12 Tusa-dd tsaɛɛet, ixecced wass.
Ejj wenni isɣin war ifarreḥ
u ejj wenni izznuzan war ittecḍin,
minzi řḥaduq n weɣḍab aqa-t x marra řɣaci nnes inhewřen.
13 Minzi wenni iznuzan war dd-iddikkwiř ɣar min immenzen,
waxxa nitni qqimen ddaren,
minzi tameẓriwt x marra řɣaci inhewřen n temmurt war tbeṭṭiř,
uca uřa d ijj war izemmar s řmuɛṣiyyet nnes ad isurar tudart nnes.
14 Nitni ṣuḍen di řbuq uca sswejden marra řeḥwayej,
maca uřa d ijj war itteffeɣ ɣar umenɣi,
minzi řḥaduq n weɣḍab inu aqa-t x marra řɣaci inhewřen n temmurt.”
15 “Zi barra ssif
u zi daxeř ṭṭaɛun d řaẓ.
Wi iǧan deg iyyar, ad immet s ssif,
wi iǧan di tendint ad t yecc řaẓ d ṭṭaɛun.
16 Wi zzaysen yarewřen, ad nejmen,
uca ad iřin x idurar amecnaw idbiren zi teɣzurin,
ad nnezbaren marra,
kuř ijj x řmuɛṣiyyet nnes.
17 Marra ifassen ad heyyfen,
u marra ifadden ad dewřen d aman.” ■
18 “Ad beysen s txunca n wecḍan,
arjef ad ten issduři
u x marra udmawen ad yiři řeḥya
u x marra izeǧifen nsen tuqeccart. ■
19 Ad nḍaren nnuqart nsen deg ibriden,
u ureɣ nsen ad yiři am ca n řḥajjet texmej.
Nnuqart nsen d wureɣ nsen war zemmaren ad ten fekken
deg wass n uduqqez n weɣḍab n SIDI.
War zemmaren ad zzaysen ssjiwnen řeɛmar nsen
niɣ ad zzaysen ccuren takrict nsen,
minzi aya tuɣa d ssibbet n uneqraḍ i dd-yiwyen řmuɛṣiyyet nsen. ■
20 Aẓri n telwizt igga i-t d lɛaḍama yuɛřan,
maca nitni ggin dayes řexyařat n nnɛawat nsen n ṣṣanam
u řexyařat n jjɛayef nsen.
S uya arriɣ talwizt d taxmuji i nitni.
21 Necc ad tt wceɣ am tucceffra deg ufus n ibarraniyyen
uca ad tt wceɣ d takeccaḍt i iɛeffanen n temmurt,
uca nitni ad tt ssɛiǧten.
22 Necc ad xas ssenqeřbeɣ udem inu
u nitni ad ssɛiǧten amcan inu innufaren,
maɣar iceffaren ad dayes adfen
uca ad t ssɛiǧten.”
23 “Sewjed ssnesřet,
minzi tammurt teccur s usizzeř n idammen
u tandint teccur s lɛunf.
24 Necc ad awyeɣ řegnus iɛeffanen qaɛ,
u nitni ad ṭṭfen tudrin nsen,
u ad ssbedden nnfaxet n ayt n jjehd,
uca ad ttwasɛiǧtent Tzawiyyin nsen Iqeddsen.
25 Ad dd-yas unexřiɛ d ameqqran,
u nitni ad arzun řehna,
maca war ittiři.
26 Aqa ad dd-yas uceřwaw awarni i uceřwaw,
ad yiři řhard awarni i řhard.
Nitni ad arzun tameẓriwt n unabi,
maca Ccariɛa n ukehhan d ccwar n imɣaren
ad qḍan.
27 Ajeǧid ad icḍen
u řḥakem ad yarḍ anexřiɛ
u ifassen n řgens ad qarrmen s tiggʷudi.
Necc ad zzaysen ggeɣ am webrid nsen,
u Necc ad xasen ḥekmeɣ am lfarayiḍ nsen,
u nitni ad ssnen belli Necc d SIDI.”