1 Yusa-dd ɣari wawař n SIDI, inna:

2 “A mmis n bnadem, arr udem nnek ɣar idurar n Israil uca nabb xasen ^■   3 uca ini: ‘A idurar n Israil, sřem i wawař n Sidi inu, SIDI! Ammu i iqqar Sidi inu, SIDI, i idurar u i tewririn, i tɣezratin u i teɣzurtin: Xzar, Necc ad xawem ssekkeɣ ssif uca řegɛudi nwem mani tᵉttwehhabem ddbayeḥ nwen ad tent areddǧeɣ. 4 Ad ttwaredǧen iɛalṭaren nwem u ipilaren n arebbi n tfuct nwem ad ttwarẓen u Necc ad nḍareɣ inni ittwasnuqben zzat i wudem n imeyḍa n laṣnam nwem. 5 Ad ggeɣ řxecbat n ayt n Israil zzat i imeyḍa n laṣnam nsen uca ad zuzzareɣ ixsan nwem ɣar min dd-innḍen i iɛalṭaren nwem. 6 Di marra imucan mani tzeddɣem ad ttwareddǧent tneddam, uca řegɛudi ad tent jjen, ařami iɛalṭaren nwem ad iřin d řxarbet d ttwajjen, uca imeyḍa n laṣnam nwem ad ttwarẓen u ipilaren nwem n arebbi n tfuct ad ttwaqessen u timegga nwem ad ttwamḥant. 7 Inni ittwanɣen ad din iřin di řwest nwem ḥima ad tessnem belli Necc d SIDI.’ ”

8 “Ad jjeɣ ict n tesɣart ad teqqim teddar, minzi ad din iřin inni ittwasnejmen zi ssif xmi kenniw ɣa tᵉttwazuzzarem x temmura. 9 Inni ittwanejmen ad xafi ɛeqřen jar regnus mani ttwaneddhen d imeḥbas, minzi Necc arẓiɣ uř nsen nni xafi ittaggʷejen iccuren s farq-ccɣeř, uca uřa d tiṭṭawin nsen nni iḍfaren awarni i imeyḍa n laṣnam nsen ccurent s farq-ccɣeř. Nitni ad ɛiffen ixef nsen zi ssibbet n tmegga iɛeffnen nni ggin s marra jjaɛayef nsen.

10 Nitni ad ssnen belli Necc d SIDI. Necc war nniɣ amenni waha aqa Necc ad daysen ggeɣ řɣar-a.”

11 “Ammu i iqqar Sidi inu, SIDI: Wwet s ufus nnek uca darrec s uḍar nnek, uca ini: ‘Ay!’ x marra nnɛawat tiɛeffanin n taddart n Israil, maɣar nitni ad wḍan s ssif, s řaẓ u s ṭṭaɛun! ^■  

12 Wi iǧan yiggʷej ad immet s ṭṭaɛun, u wi iǧan yudes ad iwḍa s ssif, u wi iqqimen u aqa ittwaḥṣar, ad immet s řaẓ, ammu ad daysen kemmřeɣ asɛar inu.

13 Ittxeṣṣa ad tessnem belli Necc d SIDI, xmi inni zzaysen ittwanɣen ad din iřin jar imeyḍa n laṣnam nsen deg wenneḍ n iɛalṭaren nsen, x kuř tawrirt tuɛřa, x marra tiqqicatin n idurar, sadu kuř tacejjart tazizawt u sadu kuř tacejjart n yigg s waṭṭas n tefray, amcan mani nnumen ssewjaden ict n řefwaḥet ittfuḥen i marra imeyḍa n laṣnam nsen. ^□  

14 Ad sswiẓẓḍeɣ afus inu ḍidd nsen uca ad ggeɣ tammurt d řxarbet, ict n řxarbet mahu řexřa n Dabla, di marra imucan mani zeddɣen uca ad ssnen belli Necc d SIDI.”