1 “Uca cek, a mmis n bnadem, ksi ijj n řmus iqdeɛ, ksi ijj řmus n uḥeffaf uca sekk i-t x uzeǧif nnek u x tmart nnek. Xenni ad teksid ijj n řmizan uca acewwaf ad ten tebḍid. 2 Ict n ttuřut ad tt tesscemḍed di řwest n tendint awarni řami i ɣa kemmřen wussan n řeḥṣaret, uca ad teksid ict n ttuřut nneɣni, ad tewted s ssif nnek deg wenneḍ nnes, uca ict n ttuřut nneɣni ad tt tzuzzared deg usemmiḍ u Necc ad jebdeɣ ssif awarni as. 3 Ad zzayes teksid cwayt n iẓeṭṭan uca ad ten tcedded deg ibeḥruren n upartessu nnek. 4 Ad zzayes teksid ɛad cwayt n iẓeṭṭan uca ad ten tenḍared di řwest n tmessi uca ad ten tesscemḍed s tmessi. Ssenni ad teffeɣ ict n tmessi ɣar marra taddart n Israil.”

5 “Ammu i iqqar Sidi inu, SIDI: Ta d Urcalim i ẓẓuɣ di řwest n řegnus, ak-d temmura i d as dd-innḍen. 6 Maca nettat tɣewweɣ x lfarayiḍ inu mahu řegnus, uřa x tweṣṣa inu mahu timmura i d as dd-innḍen, minzi nitni nḍaren lfarayiḍ inu u tiweṣṣa inu war tent ḍfaren.

7 S uya, ammu i iqqar Sidi inu, SIDI: Minzi kenniw teggim mahu řegnus i d awem dd-innḍen, war tuyurem di tweṣṣa inu u war teggim lfarayiḍ inu, ɛad war teggim ɛlaḥsab lfarayiḍ n řegnus i d awem dd-innḍen, ^■   8 s uya, ammu i iqqar Sidi inu, SIDI: Xzar, uřa d Necc ad xam qeřbeɣ u ad ggeɣ řeḥkamat di řwest nnem zzat i tiṭṭawin n řegnus. 9 Ad zzayem ggeɣ am mammec ɛemmarṣ war ggiɣ u war tteggeɣ ɛemmarṣ ɛad zi ssa d tsawent, zi ssibbet n marra jjɛayef nnem.

10 S uya ibabaten ad ccen arraw di řwest nnem uca arraw ad ccen ibabaten nsen. Necc ad am ggeɣ řeḥkamat u marra min zzayem iqqimen ad t zuzzareɣ ɣar marra tiɣemmura n usemmiḍ.” ^■  

11 “S uya, s tidett am ddareɣ Necc, ammu i iqqar Sidi inu, SIDI: Uřa d Necc ad qeḍɛeɣ, war zziǧizeɣ, war areḥḥmeɣ, umi tessxemjed Zzawect inu Iqeddsen s marra nnɛawat nnem n ṣṣanam u s marra jjɛayef nnem! ^■  

12 Ict n ttuřut n imezdaɣ nnem ad temmet s ṭṭaɛun u s řaẓ di řwest nnem, uca ict n ttuřut nneɣni ad tewḍa s ssif deg wenneḍ nnem, u ɛad ict n ttuřut ad tt zuzzareɣ ɣar marra tiɣemmura n usemmiḍ u awarni asen ad dd-jebdeɣ ssif. ^■  

13 Aɣḍab inu ad ijjiwen ař uneggar uca ad xasen ssarseɣ asɛar inu. Ammu i ɣa ssfewwjeɣ ixef inu u nitni ad ssnen, aqa Necc, SIDI, ssiwřeɣ di tusmi inu, xmi i ɣa kemmřeɣ asɛar inu xasen.

14 Ad cem arreɣ d řxarbet d ict n řqecɛet n ustehzi jar řegnus i d am dd-innḍen, zzat i tiṭṭawin n kuř ijj nni i ɣa iɛdun.

15 Ad tedweř Urcalim i ustehzi d řḥegra, i umedya n useqseḥ d usiggʷed i řegnus i d as dd-innḍen, xmi d as i ɣa qḍeɣ řeḥkamat s weɣḍab u s wesɛar u s tiyitta iḥman. Necc, SIDI, aqa ssiwřeɣ! ^■  

16 Xmi ten i ɣa wteɣ s fřitcat n řaẓ nni dd ɣa yawyen areddeǧ, inni i ɣa wteɣ ḥima ad kenniw sshellkeɣ, xenni ad xawem arniɣ řaẓ u ad arẓeɣ řeɛweč n weɣrum nwem. ^■  

17 Ad xawem sekkeɣ řaẓ d řewḥuc iwɛaren nni i ɣa iymaren tarwa nnem. Ṭṭaɛun d usizzeř n idammen ad cem řeqfen u Necc ad xam ssekkeɣ ssif. Necc, SIDI, aqa ssiwřeɣ!” ^■