1 “Cek, a mmis n bnadem, ksi ict n luṣa n třaxt uca sars i-tt zzat i wudem nnek uca arcem xas tandint n Urcalim. 2 Qewwar as uca bna xas ijj n lbaraj uca egg xas acbar, egg xas řemrageḥ n řɛeskar uca wwet xas deg wenneḍ nnes icarriyyen n wedham. ^■   3 Uca cek, ksi ict n marmita n wuzzař uca egg i-tt am ijj n řḥiḍ n wuzzař jar cek d tendint. Arr udem nnek xas maḥend ad tᵉttwaḥṣar u cek ad tt teḥṣared. Aya ad tiři d řeɛřamet i taddart n Israil. 4 Uca cek, ad tezzřed x uɣezdis nnek azeřmaḍ uca ad xas tegged řmuɛṣiyyet n taddart n Israil. Anect n ussan nni di xasen i ɣa tezzřed, ad tarbud řmuɛṣiyyet nsen. 5 Maɣar Necc ad xak ggeɣ iseggʷusa n řmuɛṣiyyet nsen ɛlaḥsab lɛadad n wussan: teřt-mya u-tesɛin n wussan ad tarbud řmuɛṣiyyet n taddart n Israil.” ^■  

6 “Xmi i ɣa tkemmřed ussan nni, ad tezzřed ɛawed x uɣezdis nnek afusi uca ad tarbud řmuɛṣiyyet n taddart n Yahuda, arebɛin n wussan. Ijj n wass i yijj n useggʷas, am mammec i d ac umureɣ. ^□   7 Ad tarred udem nnek ɣar řeḥṣaret n Urcalim uca ad tɛarrid aɣiř nnek, ad tnebbid ḍidd nnes. 8 Xzar, Necc ad xak ggeɣ tisɣunin ařami war tzemmared ad tennqeřbed zeg ijj n uɣezdis ɣar uɣezdis nneɣni ař ɣa tkemmřed ussan n řeḥṣaret nnek.”

9 “Ksi irden, imendi, ibawen, řeɛdes, tafsawt d karṣana uca egg i-ten di tebqect, uca egg zzaysen aɣrum i yixef nnek. Ad tecced aya am mecḥař lɛadad n wussan nni i ɣa tezzřed x uɣezdis nnek, teřt-mya u-tesɛin n wussan. ^□  

10 Macca nni i ɣa tecced ad tᵉttwawzen: ɛicrin n iciqlen i yijj n wass. Ad tt tecced deg ikuden ittwaggen.

11 Ad teswed aman s řeɛbar: ict n tsittut zeg ijj n uhinu. Ad tt teswed zi řweqt ař řweqt nneɣni. ^□  

12 Ad tecced ict n txebbazt n imendi uca ad tt tessnenned zzat i tiṭṭawin nsen x iẓẓan i dd-iffɣen zi bnadem.”

13 Inna SIDI: “Ammu i ɣa ccen ayt n Israil aɣrum nsen ixemjen jar řegnus mani ten ɣar i ɣa ssuffɣeɣ.” ^■  

14 Xenni nniɣ: “A, Sidi inu, SIDI, xzar, řeɛmar inu war ittwasexmej ɛemmarṣ. Zi temẓi inu ař řexxu necc war cciɣ řxecbet niɣ min imezzqen, u ɛemmarṣ war yudif weysum n jjɛifect ɣar uqemmum inu.”

15 Uca Netta inna ayi: “Xzar, ad ac wciɣ řeɣbar n ifunasen deg wemcan n ubarruḍ n bnadem. Sewjed zzayes aɣrum nnek.”

16 Xenni inna ayi: “Cek, a mmis n bnadem, xzar, ad arẓeɣ řeɛweč n weɣrum di Urcalim, - s unexřiɛ ad ccen aɣrum s řewzen, uca s warjef ad swen aman s řeɛbar - ,^□  ■  

17 ḥima ad asen ittxeṣṣa weɣrum d waman, ad xzaren ayawya s arjef uca ad dewřen arṣuḍen di řmuɛṣiyyet nsen.”