1 Netta inna ayi: “A mmis n bnadem, min tᵉttwařid danita, ecc i-t! Ecc adlis-a ittwannḍen uca uyur, siweř ak-d taddart n Israil.” ^■   2 Necc arzmeɣ aqemmum inu u Netta issecc ayi adlis nni ittwannḍen. 3 Inna ayi: “A mmis n bnadem, ɛřef aɛeddis nnek, ccur takrict nnek s wedlis ittwannḍen nni d ac i ɣa wceɣ.” Xenni cciɣ u tuɣa-t d amiẓid deg uqemmum inu am tamment. ^■  

4 Xenni inna ayi: “A mmis n bnadem, uyur, adef ɣar taddart n Israil uca siweř awařen inu akidsen. ^■   5 Minzi war dd-tᵉttwassekked ca ɣar ijj n řgens s ijj n yiřes iwɛar u s ijj n wawař iqseḥ, maca ɣar taddart n Israil. 6 War iǧi ɣar řegnus aṭṭas, s ijj n yiřes iwɛar niɣ s ijj n wawař iqseḥ, i zi war tzemmared ad tfehmed awařen nsen. Mařa sekkeɣ cek ɣarsen nitni, s tidett ad ac sřen. 7 Maca taddart n Israil war ixs ad ɣarek iseř, minzi war xsen ad dd-sřen ɣari, minzi marra taddart n Israil, aqa nitni ɣarsen azeǧif iqseḥ u ɣarsen uř yezleg. 8 Xzar, Necc ggiɣ udem nnek iqseḥ amecnaw udmawen nsen uca tanyart nnek ggiɣ tt teqseḥ am tenyarin nsen. ^■   9 Necc ggiɣ tanyart nnek amecnaw ijj n diamanti, ggiɣ tt teqseḥ x weẓru. War zzaysen tteggʷed ca u war ttnexřiɛ ca zeg wudmawen nsen, minzi nitni d ict n taddart iɣewwɣen.” ^■  

10 Netta inna ayi: “A mmis n bnadem, ḥḍa marra awařen inu nni i ɣa ssiwřeɣ akidek deg wuř nnek uca seř ɣarsen s imezzuɣen nnek.

11 Uyur, adef ɣar imenfiyyen, ɣar tarwa n řgens nnek uca siweř akidsen, ini asen: ‘Ammu i iqqar SIDI inu, SIDI!’, ma ad sřen niɣ ad semḥen di man aya.” ^■  

12 Xenni issgeɛɛed ayi Arruḥ uca sřiɣ awarni ayi ict n tmijja teddardiḥ aṭṭas, teqqar: “Ad ittwabarek uɛuǧi n SIDI zeg wemcan n tzeddiɣt nnes!” ^■  

13 Sřiɣ i řḥess n wafriwen n imuddaren nni iřeqqfen ijj i wenneɣni uřa i řḥess n tjarrarin zzat nsen u i řḥess n ijj n udardiḥ imɣar.

14 Xenni issgeɛɛed ayi Arruḥ uca iksi ayi. Necc uyureɣ, d amarzag n řeɛmar, itteḥduduq buḥbeř inu dayi u afus n SIDI tuɣa idqeř xafi.

15 Ammu i dd-usiɣ ɣar imenfiyyen di Tal-Abib, inni izeddɣen zzat i yeɣzar n Xabur. Necc qqimeɣ din mani tuɣa zeddɣen, wah qqimeɣ din sebɛa n wussan ttbehteɣ řami d ayi tuɣa jar asen. ^■  

16 Imsar awarni řami ɛdun sebɛa n wussan, aqa yusa-dd ɣari wawař n SIDI. Inna:

17 “A mmis n bnadem, Necc ggiɣ cek d aɛessas x taddart n Israil. Xmi i ɣa tesřed i yijj n wawař zeg uqemmum inu, ittxeṣṣa cek ad asen tɛeřmed zzayi. ^■  

18 Xmi i ɣa iniɣ i uɛeffan ‘S tidett ad temmted!’ uca cek war d as teɛřimed ca u war tessiwřed ḥima ad tɛeřmed aɛeffan di ssibbet n webrid nnes aɛeffan maḥend ad t teḥḍid ḥima ad iqqim ad iddar, xenni ad immet uɛeffan nni di řɣecc nnes, maca idammen nnes ad ten ttareɣ zeg ufus nnek. ^■  

19 Maca mařa tɛeřmed i uɛeffan u netta war ibeɛɛed ca zi tuɛeffna nnes u zeg webrid nnes iɛeffnen, xenni netta ad immet di řmuɛṣiyyet nnes, maca řeɛmar nnek ad injem.

20 Mařa amsegged ibeɛɛed x tsegda nnes uca igga řmuɛṣiyyet xmi i ɣa ssarseɣ ict n texceft zzates ařami i ɣa ixḍa, xenni ad immet. Minzi cek war d as teɛřimed, ad immet di ddenb nnes uca timegga iseggden i yegga war daysent idaren ɛad. Maca idammen nnes ad ten ttareɣ zeg ifassen nnek. ^■   21 Maca mařa tɛeřmed i umsegged, ḥima war ixeṭṭi umsegged u netta war ixḍi, xenni ad iqqim iddar s tidett, minzi tuɣa ittwaɛřem u cek tfekked řeɛmar nnek.”

22 Yusa-dd din ufus n SIDI xafi uca inna ayi: “Kkar, ffeɣ ɣar řewḍa n teɣzurt, ad kidek ssiwřeɣ dinni.” 23 Kkareɣ uca ffɣeɣ ɣar řewḍa n teɣzurt, xzar, aɛuǧi n SIDI tuɣa ittbedda dinni amecnaw aɛuǧi i ẓriɣ ɣar yeɣzar n Xabur uca wḍiɣ x uɣembub inu ɣar temmurt. ^■  

24 Xenni yudef dayi Arruḥ uca issekkar ayi x iḍaren inu uca issiweř akidi. Netta inna ayi: “Uyur, belleɛ ixef nnek daxeř di taddart nnek. ^□  ■   25 U cek, a mmis n bnadem, xzar, nitni xsen ad ac ggen iseɣwan u ad cek carfen zzaysen. War tteffeɣ ca ḥima ad tadfed jar asen. 26 Ad ssřesqeɣ iřes nnek ɣar waneɣ nnek. Ad tdewřed d azinun uca war tᵉttiřid d aryaz jar asen wenni ten i ɣa iwebbxen, minzi nitni d ict n taddart tɣewweɣ. ^■   27 Maca Necc, xmi kik i ɣa ssiwřeɣ, ad arzmeɣ aqemmum nnek uca ad asen tinid: ‘Ammu i iqqar Sidi inu, SIDI! Wi ittesřan, ad iseř, uca wi isemmḥen di man aya, waxxa ad dayes ismeḥ!’, minzi nitni d ict n taddart tɣewweɣ.” ^■