1 Deg useggʷas wiss setta, deg uyur wiss setta, deg wass wiss xemsa n uyur, umi tuɣa qqimeɣ di tudart inu uca imɣaren n Yahuda tuɣa qqimen zzat i wudem inu, xenni imsar aqa iwḍa-dd xafi din ufus n Sidi inu, SIDI. 2 Necc ẓriɣ, uca xzar, tuɣa din min yarwesen deg wudem n tmessi: zi tejɛinnatin nnes ɣar wadday aqa iban-dd am tmessi u zi tejɛinnatin nnes ař sennej tuɣa axmi teẓrid tissiqt, tban-dd am wuzzař ittwessgen. 3 Isswiẓẓeḍ-dd min yarwesen deg ijj n ufus uca Netta iṭṭef ayi-dd ɣar ict n tzarezt n uzeǧif inu uca Arruḥ issgeɛɛed ayi jar ujenna d temmurt, indeh ayi di tmeẓriwin n AREBBI ɣar Urcalim, ɣar wadaf n tewwart n řemraḥ n daxeř nni ixezzaren ɣar ccamal, mani iǧa řkursi n řexyař n ṣṣanam n tusmi, inni issekkaren tusmi. ^■   4 U xzar, din i iǧa uɛuǧi n AREBBI n Israil, ittban-dd amecnaw mammec t ẓriɣ di řewḍa n teɣzurt. ^■   5 Netta inna ayi: “A mmis n bnadem, sgeɛɛed řexxu tamuɣři nnek ɣar ccamal!” Uca ssgeɛɛdeɣ tamuɣři inu ɣar ccamal, u xzar, ibedd din řexyař n ṣṣanam n tusmi ɣar ccamal n Tewwart n Uɛalṭar, deg wadaf. 6 Xas uca inna ayi: “A mmis n bnadem, ma tᵉttwařid min tteggen nitni, jjɛayef timeqqranin nni tᵉttegg taddart n Israil danita, ařami ittxeṣṣa ad aggʷejeɣ x Zzawect inu Iqeddsen. Ad tẓared ɛad jjɛayef timeqqranin x tina.”

7 Netta yiwyi ayi ɣar wadaf n řemraḥ. Umi ẓriɣ, xzar, aqa din ijj n weḥfur di řḥiḍ. 8 Netta inna ayi: “A mmis n bnadem, ɣaz xenni řḥiḍ.” Necc ɣziɣ řḥiḍ uca xzar, aqa din ijj n wadaf. 9 Xenni inna ayi: “Adef, uca xzar jjɛayef timeqqranin nni tteggen danita.”

10 Udfeɣ uca ẓriɣ, xzar, aqa din ɛřam kuř ineqqacen n imuddar ittbuɛen, n řmař amengus u n marra imeyḍa n l’aṣnam n taddart n Israil ttwaneqcen di řḥid deg wenneḍ.

11 Aqa sebɛin n yeryazen zeg imɣaren n taddart n Israil, ak-d Yazanya, mmis n Cafan, di řwest nsen, bedden zzatsen u kuř ijj s řmejmar nnes n jjawi deg ufus nnes uca tuři tejnewt teccur s arriḥet n řebxur.

12 Xenni inna ayi: “A mmis n bnadem, ma teẓrid min tteggen imɣaren n Israil di taǧest, kuř ijj deg ixxamen n řexyařat nnes ineqcen, maɣar qqaren: SIDI war d aneɣ iẓri, SIDI yejja tammurt.” ^■  

13 Netta inna ayi: “Ad tẓared ɛad jjɛayef timeqqranin x tina nni tteggen nitni.”

14 Xenni indeh ayi ɣar wadaf n tewwart n Taddart n SIDI, wenni iǧan ɣar ccamal, u xzar, qqiment din temɣarin ttrunt di Tammuz.

15 Netta inna ayi: “A mmis n bnadem, ma teẓrid aya! Ad tẓared ɛad jjɛayef mɣarent x tina.”

16 Uca yiwyi ayi ɣar řemraḥ n daxeř n Taddart n SIDI, uca xzar, ɣar tewwart n Zzawect n SIDI, jar wesqif d uɛalṭar, aqa din ɛřaḥař xemsa u-ɛicrin n yeryazen. Iɛurar nsen dewřen ɣar Zzawect n SIDI u udmawen nsen ɣar ccarq, uca nitni arrin azeǧif ɣar ccarq, i tfuct.

17 Xenni inna ayi: “A mmis n bnadem, ma teẓrid aya? Ma aqa drust i taddart n Yahuda maḥend ad ggen jjɛayef-a timeqqranin nni tteggen danita? Maɣar nitni ccuren tammurt s lɛunf uca qqimen dewřen-dd ɣari ḥima ad ayi sɛaren. Xzar, tteggen ɛad taseṭṭa ittwaqeḍɛen ɣar wenzaren nsen!

18 Xenni uřa d Necc ad ggeɣ s wesɛar. War dayi izziǧiz ḥed u war areḥḥmeɣ. Waxxa nitni sɣuyyun s tmijja ijehden deg imezzuɣen inu, Necc war dd ɣarsen ttesřiɣ.” ^■