X Babil
50
1 Awař nni issiweř SIDI x Babil, x temmurt n Ikaldaniyyen, s ufus n unabi Irmiya. 2 “Barrḥem jar řegnus, jjem ad as sřen, sgeɛɛdem taɛeǧant, jjem ad as sřem, war tt snuffaram. Inim: ‘Tandint n Babil tᵉttwaṭṭef, Bil isseḍḥa, Marudax aqa yarẓa, řexyařat nnes n ṣṣanam ttwabarqen, imeyḍa n laṣnam nnes ttwařebzen!’ ■ 3 Maɣar ihjem-dd xas ijj n řgens zi ccamal, ad yarr tammurt nnes d řxirbet, war dayes izeddeɣ ɛad uřa d ijj, zi bnadem ař řmař arewřen, ffɣen.’ ” 4 “Deg wussan nni u di řweqt nni, ammu i iqqar SIDI, ad dd-asen ayt n Israil munen ak-d ayt n Yahuda. Ad uyuren am ttrun, ad arzun x SIDI, AREBBI nsen. 5 X Ṣihyun ad sseqsan, aqa dinni i nḍaren tiṭṭawin nsen. Nitni ad dd-asen uca ad dd-mmarenyen ɣar SIDI s ijj n Řɛahd ittduman nni war ittwattun.”
6 “Tuɣa řgens inu d uǧi iweddaren, imeksawen nsen ssufɣen ten x webrid x idurar ikfaren. Niti uyuren zeg wedrar ař tewrirt, ttun amcan n arraḥet nsen. 7 Marra wi tent yufin, ccin tent uca iɣrimen nsent nnan: ‘Neccin war d aneɣ ittars ḥed, maɣar nitenti xḍant ak-d SIDI, ak-d tzeddiɣt n tsegda, ak-d řayas n ibabaten nsent ḍidd i SIDI.’ ” ■
8 “Arwřem zi Babil, ffɣem zi temmurt n Ikaldaniyyen, iřim am iɣayḍen ittizwaren i wuǧi!” ■
9 “Maɣar xzar, Necc simant inu ad dd-ssḥarrceɣ x Babil ijj n ubarru n řegnus imeqqranen zi Temmurt n Ccamal. Nitni ad ssbedden ixef nsen ḍidd nnes. Ssenni ad tᵉttwaṭṭef. Fřitcat nsen am ayt n bu-teɣřuḍt imeḥḍen, uřa d ict zzaysent ɛemmarṣ war dd-tɛiqqib texwa.
10 Tammurt n Ikaldaniyyen ad tedweř d takeccaḍt, marra inni tt i ɣa ikeccḍen, ad jjiwnen, ammu i iqqar SIDI.
11 Minzi kenniw tfarḥem, aqa tneggzem s řefraḥet, a kenniw inni ikeccḍen tasɣart inu. Kenniw tnedwem am tyenduzin di ddemnet u tessneḥniḥem am yeysan.
12 Tesseḍḥa yemmatwem, tenni kenniw i dd-yurwen, aqa iřqef i-tt useḥcem. Xzar, nettat d taneggarut n řegnus: mɣir d řexřa d řekḥeḍ d tanezruft.
13 Zi ssibbet n uduqqez n weɣḍab n SIDI ad teqqim tendint n Babil war tᵉttwazeddeɣ ɛad, ad tedweř d ict n temmurt ittwaxarrben. Marra wi dd ɣa iɛdun x Babil ad innexřeɛ, ad iṣeffar s uɛeyyeb x marra jjɛayef nnes.” ■
14 “Seddem ixef nwem i umenɣi ak-d Babil ɣar marra iɣezdisen nnes, marra inni imeḥḍen řqews, maɣar nettat texḍa ak-d SIDI.
15 Sɣuyyem xas zi marra iɣezdisen. Aqa nettat tsellem ixef nnes. Wḍan lbarajat nnes, hedmen řeḥyuḍ nnes, maɣar wa d nneqmet n SIDI. Xeřfem zzayes, ggem zzayes am mammec i tegga nettat.
16 Kksem azarraɛ zi Babil d wenni iṭṭfen amjar di řweqt n tmejra! Zi ssibbet n ssif iqesḥen ad ɛeqben nitni, kuř ijj ɣar řgens nnes, uca ad arewřen, kuř ijj ɣar temmurt nnes.”
17 “Israyil am ijjen zeg wuǧi i xef uẓẓřen, tenni x ɛerfen wayraden. Ɣar umezwar iṣarḍ i-tt ujeǧid n Accur, ɣar uneggar iddez as Nabuxadraṣṣar, ajeǧid n Babil, ixsan nnes.
18 S uyenni, ammu i iqqar SIDI n řɛeskarat, AREBBI n Israil: ‘Xzar, Necc ad xeřfeɣ zeg ujeǧid n Babil d temmurt nnes, am mammec xeřfeɣ zeg ujeǧid n Accur. ■
19 Israil maca ad t-i-dd arreɣ ɣar tzeddiɣt nnes u netta ad yarwes x Karmal d Bacan, ad tejjawen řeɛmar nnes di temmurt n idurar n Ifrayim d Jilɛad.’ ”
20 “Deg wussan nni u di řweqt nni, iqqar SIDI, ad arzun x řɛib n Israil, maca war ittiři, u x ddnub n Yahuda, maca war ten ttifen, minzi inni i ɣa arreɣ ad qqimen, Necc ad asen ɣfareɣ.
21 Gaɛɛed ḍidd i temmurt n Maratayim, ‘tammurt n Uɣewweɣ Tnayen n Tseqqar’ , u ḍidd i imezdaɣ n Faqud, ‘tandint n Wexřef’. Areddeǧ u ḥarrem awarni asen marra i uteḥḥi, ammu i iqqar SIDI, u egg ɛlaḥsab marra minzi cek umureɣ.”
22 “Aqa da, ittwaseř lharaj n umenɣi di temmurt, ict n lmuṣiba tameqqrant. 23 Mammec ittwaqess u ittwarẓ wefḍis n marra amaḍal! Mammec idweř Babil d ict n řqecɛet n usnexřiɛ jar řegnus!”
24 “Necc ggiɣ am, a, tandint n Babil, ict n texceft uca tejjid ixef nnem ad cem ggen di řeḥbes, waxxa war tucid. Cem tᵉttwafed u tᵉttwaṭṭfed ɛawed, maɣar cem tuɣa tᵉttemɛarrid ak-d SIDI. 25 SIDI yarzem axxam nnes n txubay uca issuffeɣ-dd dduzan n wesxeḍ nnes, maɣar ta d ict n řxedmet i Sidi inu, SIDI n řɛeskarat, di temmurt n Ikaldaniyyen. 26 Azzřem ɣares zi ṭṭarf n temmurt, arzmem řexzayen nnes n imendi, nḍarem marra x iɛurricen yuɛřan uca ḥarrmem ten i uteḥḥi, ḥḍam mliḥ maḥend war zzayes ittɣimi walu. 27 Nɣem marra iyenduzen nnes s ssif, sehwam ten-dd ɣar tɣarṣt. Uct xasen, maɣar ass nsen yiweḍ-dd, akud n uɛaqeb nsen! 28 Aqa da ijj n řḥess n imarwařen u n yinni inejmen zi temmurt n Babil maḥend ad barrḥen axřaf n SIDI, AREBBI nneɣ, di Ṣihyun, axřaf di ṭṭweɛ n Zzawect nnes Tameqqrant.”
29 “Řaɣam i ayt n řqews ɣar Babil, marra inni ijebbden řqews! Ḥṣarem tandint zi marra iɣezdisen, ḥḍam maḥend uřa d ijjen ad injem. Xeřfem tt ɛlaḥsab timegga nnes, ggem zzayes ɛlaḥsab marra min tegga, maɣar nettat tuɣa teffucceḥ ak-d SIDI, ak-d Umqeddes n Israil. 30 S uyenni ad wḍan iḥudriyyen nnes deg wazzayen d marra iɛeskariyyen nnes ad ttwasusmen deg wass nni, ammu i iqqar SIDI n řɛeskarat. ■ 31 Xzar, Necc ad ɣarem kkareɣ, a cem tenni iffuccḥen, ammu i iqqar Sidi inu, SIDI n řɛeskarat, minzi ass nnem yiweḍ-dd, akud nni meřmi cem i ɣa xeǧṣeɣ. 32 Xenni wenni iffuccḥen ad inqarḍ, ad iwḍa, uca uřa d ijj war t issbeddi. Necc ad qqdeɣ timessi di tneddam nnes nni i ɣa iccen marra min d asent-i-dd innḍen.”
33 “Ammu i iqqar SIDI n řɛeskarat: ‘Ttwaḥṣaren ayt n Israil jmiɛ ak-d ayt n Yahuda. Marra inni ten iḥebbsen, ṭṭfen ten, ugin ad jjen ad asen arxun. 34 Maca Amefdi nsen ijhed, SIDI n řɛeskarat d Isem nnes. Netta ggur ad iwwet x ddeɛwet nsen ḥima ad igg řhudnet i temmurt u ḥima ad issarjij imezdaɣ n Babil.’ ”
35 “Ssif x Ikaldaniyyen, iqqar SIDI, u x imezdaɣ n Babil, x řḥukkam nnes u x imiɣisen nnes. 36 Ssif x ayt n bu-ixarriqen maḥend ad dewřen d ibuhařiyyen, ssif x ayt n bu-teɣruḍt nnes maḥend ad ttwarẓen. 37 Ssif x yeysan nnes u x ikarruten nnes u x ubarru n ɛřam kuř ibarraniyyen nni iǧan di řwest nnes, maḥend ad dewřen am temɣarin. Ssif x řeknuz nnes maḥend ad ttwacaren. 38 Řekḥeḍ x waman nnes maḥend ad aẓɣen, maɣar d ict n temmurt teccur s řexyařat ineqcen uca nitni dewřen d ibuhařiyyen zi nnɛawat n ṣṣanam. 39 S uyenni ad din zedɣen řewḥuc n řexřa ak-d yifisen uca uřa d yessis n nnɛamet ad zedɣent din. I řebda war ittɣimi din uřa d ijj u war dayes zeddɣen ɛad zi jjiř ař jjiř. 40 Am mammec tuɣa issneqřeb AREBBI Sadum d Ɛamurra d dcurat nnes yudsen, ammu war dinni izeddeɣ ɛad uřa d ijj u war dayes ittɣimi ɛad uřa d ijj n mmis n bnadem d abarrani, ammu i iqqar SIDI.” ■
41 “Xzar, ijj n řgens ad dd-yas zi ccamal, ijj n řgens d ameqqran, uca aṭṭas n ijeǧiden ad dewřen ttenhezzan zi tɣemmura n temmurt. ■ 42 Nitni mennɛen di řqews d fřitca. Nitni ttewɛaren, war arreḥemen. Tmijja nsen am zzhir n řebḥar, nitni nnayen x yeysan. Aqa ttḥezzamen ɣar umenɣi akidem, a yeǧis n Babil! 43 Isřa ujeǧid n Babil řexbar xasen uca dewřen as ifassen ṭṭsen. Teṭṭef i-t i-dd tiggʷudi, uřa d řeḥriq am n ict n temɣart ittarwen. ■ 44 Xzar, am ijj n wayrad ad dd-igeɛɛed zi cbarq iqqnen n L'Urdun, ammu i ɣa igeɛɛed ḍidd i tzeddiɣt ijehden, maɣar deg wermac n wabřiwen ad ten arreɣ ad aẓẓřen ssenni, u wenni umi farzeɣ, ad xas t areccḥeɣ. Maɣar man wen iǧan am Necc, man wen xafi i dd ɣa iřaɣan i ddeɛwet? Man wen d ameksaw wenni i ɣa iqqimen zzati ibedd? ■ 45 S uyenni sřem i ucawar n SIDI nni iqḍeɛ x Babil u sřem i inwayen nnes nni ixarreṣ x temmurt n Ikaldaniyyen: ‘S tidett, inni imeẓyanen aṭṭas zeg wuǧi ad ten jarren, s tidett, tazeddiɣt nsen ad tᵉttwassnexřeɛ!’ ■ 46 Tammurt tᵉttenhezza zi řḥess n uṭeffu n Babil uca aɣuyyi nnes ittwaseř ɣar řegnus.” ■