1 X ayt n Ɛammun

“Ammu i iqqar SIDI: ‘Ma Israil war ɣares bu iḥenjiren? Ma war ɣares bu awrit? Mayemmi xenni iǧa ujeǧid nwem d awrit n Jad u mayemmi izeddeɣ řgens nnes di tneddam n Jad? ^■   2 S uyenni xzar, ussan ad dd-asen, ammu i iqqar SIDI, ad jjeɣ ad ttwasřen x tendint n Rabba n ayt n Ɛammun iɣuyyan n umenɣi. Ad tedweř tendint d ict n řgeɛɛdet n řxarbet u tineddam i ɣares dd-iqqnen ad tent qqden s tmessi. Israil ad iwart ɛawed min zzayes kksen d řwart, ammu i iqqar SIDI.^■   3 Ru, a Ḥacbun, maɣar tandint n Ɛay tᵉttwareddeǧ, sɣuyyent, a kennint yessis n Rabba, ḥezzment s txuncay n wecḍan, ceḍnent uca uyurent ɣar da d diha ɣar uɣezdis n icbaren, maɣar ajeǧid nwem, Milkum, ad ittwandeh ɣar lmenfa, ikehhanen nnes ak-d řḥukkam nnes.’ ”^■  

4 “Mecḥař tᵉttfeyyced s řewḍat n teɣzurin nnem, s ufeyyeḍ n řewḍa nnem n teɣzurt, a cem yeǧis ikfaren, tenni ittcařan x wagřa nnes, teqqar: ‘Wi dd ɣari i ɣa iqarrben?’ ^■   5 Xzar, ad xam dd-ɣeḍreɣ tiggʷudi zi marra iɣezdisen nnem, ammu i iqqar Sidi inu, SIDI n řɛeskarat. Kenniw ad tᵉttwaɛarrnem, kuř ijj nican ɣar zzat, uca war din uřa d ijjen wenni i ɣa issmunen inni yarewřen. 6 Maca awarni as ad ssenqeřbeɣ tameḥbast n ayt n Ɛammun, ammu i iqqar SIDI.”

7 X Idum

“Ammu i iqqar SIDI n řɛeskarat: ‘Ma war teǧi ɛad tiɣit di Tiyman? Ma ibḍeř ccwar n imiɣisen? Ma tḍeyyeɛ tiɣit nsen? ^■   8 Arewřem, dewřem, ffarem deg imucan yuǧɣen, kenniw imezdaɣ n Dadan, maɣar Necc ad xas awyeɣ aḍeyyeɛ n Ɛisu, akud nni di ad t ɛaqbeɣ. ^■   9 Mařa usin-dd ɣarek imeřqaḍ n uḍiř, ma xenni war ttejjin ca awarni asen? Mařa usin-dd ixewwanen s ǧiřet, ma xenni war ttḍeyyiɛen ař ɣa jjiwnen? ^■  

10 Necc maca qeccareɣ tammurt n Ɛisu, ɛarriɣ x imucan nnes innuffaren ařami war izemmar ɛad ad innuffar. Tarwa nnes ttwareddǧen, uřa d aytmas d jjiran nnes, aqa netta war iǧi ɛad.

11 Ejj iyujiřen nnek, Necc ad ten ḥḍiɣ ad qqimen ddaren, tijjař nnek ejj i-tent ad xafi ttecřent.

12 Maɣar ammu i iqqar SIDI: Xzar, inni war t issdiheǧen ad swen zi řkas, ad zzayes swen. U cek wenni t issdaheǧen, ma ad tᵉttwabarrid? War tᵉttwabarrid ca ɛemmarṣ, ad zzayes teswed s uɣiř!

13 Maɣar Necc jjuǧeɣ ɣar ixef inu, ammu i iqqar SIDI, aqa Buṣra ad idweř d ijj n umedya n usnexřiɛ, d řɛar, d ict n jjihet ittwaxarrben uřa d ict n nneɛřet, uca marra tineddam nnes ad dewřent d řxirbat i řebda.”

14 “Necc sřiɣ ijj n řexbar zi SIDI, aqa ittwassekk-dd ijj n ureqqas jar řegnus ḥima ad yini: ‘Smunem, sgeɛɛdem xas, kkarem ɣar umenɣi!’ ^■  

15 Minzi xẓar, Necc ssemẓiyeɣ nnek jar řegnus, tᵉttwaseḥqared jar iwdan.

16 Řeḥkamet nnek issaggʷaden tɣarr i cek uřa d nnfaxet n wuř nnek, a cek wenni izeddɣen deg ifran n řejruf, wenni ittcebbaren di tqiccet n tewririn! Waxxa teggid řɛucc nnek sennej qaɛ am ugider, Necc ad cek dd-ɣeḍřeɣ ssenni, iqqar SIDI. ^■  

17 Idum ad idweř d ijj n umedya n usnexřiɛ. Kuř ijj wenni dd as i ɣa ikken, ad innexřeɛ u ad iṣeffar s wesrubi x marra jjɛayef nnes. ^■  

18 Amecnaw ɣar uneqřeb n Sadum d Ɛamurra d dcurat nnes yudsen, iqqar SIDI, war dinni izeddeɣ ɛad uřa d ijj u war dayes ittɣimi ɛad uřa d ijj n mmis n bnadem d abarrani. ^■  

19 Xzar, am ijj n wayrad ad dd-igeɛɛed zi cbarq iqqnen n L'Urdun ḍidd i tzeddiɣt ijehden, xenni deg wermac n wabřiwen ad ten arreɣ ad aẓẓřen ssenni, u wenni umi farzeɣ, ad xas t areccḥeɣ. Maɣar man wen iǧan am Necc, man wen xafi i dd ɣa iřaɣan i ddeɛwet? Man wen d ameksaw wenni i ɣa iqqimen zzati ibedd? ^■   20 S uyenni sřem i ucawar n SIDI nni iqḍeɛ x Idum, u sřem i inwayen nni ixarreṣ x imezdaɣ n Tayman: ‘S tidett, inni imeẓyanen aṭṭas zeg wuǧi ad ten jarren, s tidett, tazeddiɣt nsen ad tᵉttwassnexřeɛ!’ 21 Tammurt tᵉttenhezza s řḥess n uweṭṭu nsen, s tɣuyyit i zi ɣa ittwaseř řḥess nnes ɣares ař Řebḥar n Telga. 22 Xzar, ittgeɛɛad am ijj n ugider ɣar ujenna, itteḥrara, ittbezzaɛ afriwen nnes tiwa n Buṣra. Deg wass nni ad yiři wuř n ayt n bu-teɣruḍt n Idum am wuř n ict n temɣart s řeḥriq n tarwa.” ^■  

23 X Dimacq

“Ḥamat d Arfad sseḍḥan, maɣar nitni sřin i wareqqas d aɛeffan, fecřen. Ɣar řebḥar tᵉttwaf řeḥṣaret, bnadem war izemmar ad yarsa din.^■   24 Tarxu tendint n Dimacq, tenneqřeb maḥend ad tᵉṭṭef di tarewřa. Imneɛ i-tt uqdiddes. Řeḥṣaret d řewjeɛ ṭṭfen tt amecnaw tenni ittarwen. ^■   25 ‘Tandint icenɛen, ma war teggi am tenni ittwajjen, tandint n řefraḥet inu!?’ 26 S uyenni ad wḍan iḥudriyyen nnes deg wazzayen u marra iɛeskariyyen ad ttwaseɣden deg wass nni, ammu i iqqar SIDI n řɛeskarat. 27 Necc ad ssarɣeɣ timessi daxeř di řeḥyuḍ n Dimacq, ad tecc řeqṣur n Binhadad.” ^■  

28 X Qidar d tgelditin n Ḥaṣur nni iɣřeb Nabuxadraṣṣar, ajeǧid n Babil.

“Ammu i iqqar SIDI: ‘Kkarem uca hejmem x Qidar uca areddǧem ayt n ccarq.

29 Nitni ad asen kksen iqiḍan nsen d wuǧi nsen, tijartiřin n uqiḍan nsen d marra řqecc nsen. Uca uřa d iřeɣman nsen ad ten awyen akidsen. Ad xasen sɣuyyen: ‘Asiggʷed manis mma!’ 30 Arewřem, beɛɛdem, ffarem deg imucan yuǧɣen, kenniw imezdaɣ n Ḥaṣur, ammu i iqqar SIDI, maɣar Nabuxadraṣṣar, ajeǧid n Babil, iqḍeɛ xawem acawar uca ixarreṣ deg ijj n wenway xawem. 31 Kkarem, geɛɛdem x ijj n řgens nni izeddɣen di řhudnet u di řaman, ammu i iqqar SIDI, ijj n řgens war ɣares bu tewwura uřa d zzenkrun, wenni izeddɣen weḥḥdes. 32 Iřeɣman nsen ad ttwaḥewwsen uca abarru n tḥimriwin nsen n řmař ad ttwacarent u Necc ad ten zuzzareɣ ɣar marra isemmiḍen, marra inni ittḥeffan acewwaf x ṭṭrufa n tenyart d tmart. Necc ad xasen dd-awyeɣ aḍeyyeɛ zi marra iɣezdisen, ammu i iqqar SIDI. ^■   33 Haṣur ad idweř d tazeddiɣt i wuccanen n řexřa, ict n řxarbet i řebda. War dayes izeddeɣ ɛad uřa d ijjen uca uřa d ijj n mmis n bnadem ad din iqqim ɛad am ubarrani.’ ” ^■  

34 Awař n SIDI i unabi Irmiya i tuɣa x Ɛilam, deg umezwaru n tgelda n Ṣidqiya, ajeǧid n Yahuda, inna:

35 “Ammu i iqqar SIDI n řɛeskarat: ‘Xzar, Necc ad arẓeɣ řqews n Ɛilam, amezwaru n tzemmar nsen n ayt n bu-teɣruḍt. 36 Necc ad dd-ssehwiɣ x Ɛilam arebɛa n isemmiḍen zi arebɛa n tɣemmura n ujenna u ɣar marra jjwayeh n isemmiḍen ad ten zuzzareɣ. War ittiři bu řgens mani war dd-ttisen inni x uẓẓřen zi Ɛilam. 37 Necc ad ssnexřɛeɣ ayt n Ɛilam zzat i řɛedyan nsen u zzat i yenni yarezzun tudart nsen. Necc ad dd-ɣeḍřeɣ řɣar xasen, řḥaduq n weɣḍab inu, ammu i iqqar SIDI. Necc ad asen sseḍfareɣ ssif ɣares ař ten teḥḥiɣ. 38 Necc ad ssbeddeɣ řɛarc inu di Ɛilam uca ggur ad teḥḥiɣ ajeǧid d řḥukkam ssenni, ammu i iqqar SIDI. 39 Deg uneggar n wussan ad ssenqeřbeɣ tameḥbast n Ɛilam ammu i iqqar SIDI.’ ” ^■