1 X Mu’ab

“Ammu i iqqar SIDI n řɛeskarat, AREBBI n Israil: ‘Uct x Nabu, maɣar aqa tandint tᵉttwaxarreb, tendint n Qaryatayim tᵉṭṭef i-tt řeḥya, aqa tᵉttwaṭṭef. Tandint s lburj yuɛřan tᵉṭṭef i-tt řehya u tᵉttenhezza. ^■   2 Řɛezz n temmurt n Mu’ab war iǧi ɛad. Di Ḥacbun xarrṣen di řɣar ḍidd nnes, nnan: Ejj aneɣ ad tt nekkes zi jar řegnus. Uřa d cek, Madmin, ad cek ssbekmen, ssif ggur ad cek iḍfar. 3 Teffeɣ ict n tɣuyyit n řeḥriq zi Ḥurunayim: Axarreb d lmuṣiba d tameqqrant! 4 Tammurt n Mu’ab tᵉttwarẓ, iḥenjiren nnes imeẓyanen ggin ad tᵉttwaseř tɣuyyit tejhed. 5 Wah, am ittru ittgeɛɛad tsawent n Luḥit, maɣar ɣar uhekkʷu n Ḥurunayim sřin aduqqez n iɣuyyan n txessart. ^■   6 Arewřem, snejmem tudart nwem uca dewřem am ijj n uxeccab di tnezruft. ^■   7 Minzi cem tᵉttecřed x tmegga nnem d řeknuz nnem, uřa d cem ad tᵉttwaṭṭfed. Kamuc ad iffeɣ ɣar lmenfa, ikehhanen nnes jmiɛ ak-d řḥukkam nnes. ^■   8 Amteḥḥay ad dd-yas ɣar kuř tandint uca uřa d ict n tendint war tzemmar ad tenjem. Ad tᵉttwabḍeř řewḍa n teɣzurt uca řwaṭa ad tᵉttwaxarreb, am mammec t inna SIDI.’ ”

9 “Wcem afriwen i Mu’ab, maɣar nitni ad ffɣen s tazřa uca tineddam nnes ad dewřent d řxarbet mani war ittɣimi izeddeɣ ɛad uřa d ijj.

10 Ittwanɛeř wenni yarxun di tsexxart n SIDI, ittwanɛeř wenni issbedden ssif nnes x usizzeř n idammen.

11 Tuɣa Mu’ab di řaman zi temẓi nnes, yarsa am binu x řexmira nnes u war ittwafarreɣ zeg uqdiḥ ɣar uqdiḥ nneɣni u ɛemmarṣ war iffiɣ ɣar lmenfa. S uyenni iqqim as uředdi nnes d řefwaḥ nnes war ibeddeř.” ^■  

12 “S uyenni, xzar, ad dd-asen wussan, iqqar SIDI, ad dd-ssekkeɣ ayt n bu-tarebbut ɣares. Nitni ad t arbun, ad ssexwan iqdiḥen nnes u ad arẓen iɣarrafen nnes.

13 Mu’ab ad innefḍeḥ zi ssibbet n Kamuc, am mammec tennefḍeḥ taddart n Israil zi ssibbet n Bayt-Il, i xef tuɣa ttᵉtcřen nitni. ^■  

14 Mammec tzemmarem ad tinim: ‘Neccin d ayt n bu-teɣruḍt, iryazen imeḥḍen, iwejden i umenɣi?’

15 Mu’ab ittwaxarreb uca igeɛɛed řeɛdu ɣar tneddam nnes. Acewwar n iḥudriyyen nnes hwan-dd ɣar tɣarṣt, ammu i iqqar Ujeǧid, Isem nnes SIDI n řɛeskarat.”

16 “Aḍeyyeɛ n Mu’ab yudes-dd aṭṭas u řɣar nnes yiweḍ-dd deɣya.

17 Cetcam xas, marra kenniw i d as dd-innḍen u marra inni issnen isem nnes. Inim: ‘Mammec igga yarreẓ uzeǧaḍ n ṣṣulṭa ijehden, taseṭṭa nni iṣebḥen aṭṭas?’

18 Hwa-dd zeg wemcan nnem yuɛřan, qqim deg ict n jjihet n ufadi, cem tenni din izeddɣen, yeǧis n Dibun, maɣar amteḥḥay n Mu’ab ihejjem-dd xam, aqa yareddeǧ lqelɛat nnem.

19 Beddet ɣar webrid uca xzaret, cem tenni izeddɣen di Ɛaruɛir! Seqsat aryaz nni yarewřen, tamɣart nni inejmen, ini: ‘Min imsaren?’ 20 Innefḍeḥ Mu’ab, minzi ittwařbez. Cetca, sɣuyy, ejj ad ssnen di Arnun aqa Mu’ab ittwaxarreb. ^■   21 Yiweḍ-dd řḥukm x řwaṭa, x Ḥulun, x Yaḥṣa, x Mayfaɛat, 22 x Dibun, x Nabu, x Bayt-Dablatayim, 23 x Qaryatayim, x Bayt-Jamul, x Bayt-Maɛun, 24 x Qaryut u x Buṣra, u x marra tineddam n temmurt n Mu’ab, inni iggʷejen d yenni yudsen. 25 Ittwaqḍeɛ yicc n Mu’ab, yarẓ uɣiř nnes, iqqar SIDI.”

26 “Scarem t maɣar netta tuɣa ittɛeffar ḍidd i SIDI s wawařen n ukebbar. Ad iwḍa Mu’ab deg iɛuqqan n yixef nnes uca ad idweř simant nnes i tseḍḥact. 27 Niɣ ma war tuɣi iǧi Israil i tseḍḥact i cek? Ma ittwaṭṭef zeɛma jar iceffaren aqa cek tᵉttɛeyyabed t am tessenhezzid azeǧif meřmi ma iwḍa ac-dd x yiřes? 28 Ffɣem zi tneddam, zedɣem di řejruf, kenniw imezdaɣ n Mu’ab! Ggem am tedbirt i iggin řɛucc x ujemmaḍ n uqemmum n yefri ittfan. 29 Neccin nesřa x nnfaxet n Mu’ab, dayes nnfaxet aṭṭas: nnfaxet nnes, aɛeffar nnes d wuř nnes ittuɛřan.” ^■  

30 “Necc ssneɣ zzɛamet nnes, iqqar SIDI, uřa d řɣecc n řhard nnes, timegga nsen war ǧint ca nican. 31 S uyenni i ɣa wteɣ agejdur x Mu’ab, x marra Mu’ab ad sɣuyyeɣ, ad zharen x iryazen n Qir-Ḥaris. 32 S imeṭṭawen aṭṭas x imeṭṭawen n Yaɛzir ad xam ruɣ, a cem tzayart n Sibma. Řefruɛ nnem ɛdun řebḥar, iwḍen-dd ɣares ař řebḥar n Jaɛzir. Yusa-dd maca umteḥḥay ihjem x tini nnem n unebdu uřa x řɣiǧet nnem n uḍiř. 33 Truḥ řefraḥet d wercaq zeg imarjaɛen n uḍiř, zi temmurt n Mu’ab, minzi ssbeddeɣ binu zi teysirin n uḍiř. War ttɣimin ad ddzen ɛad aḍiř s usřiwřew. Asřiwřew? Cfa usřiwřew. ^■   34 Zi ssibbet n tɣuyyit n Ḥacbun ař Aliɛala, ɣares ař Yahaṣ, tteggen ad sřen tmijja nsen zi Ṣuɛar ař Ḥurunayim, tayenduzt nni n třata n iseggʷusa. Maɣar ɛad aman n Nimrim ad dewřen d iyermamen ittwaxarrben. ^■   35 Wenni iqeddmen taɣarṣt di řegɛudi d wenni ittawyen tiwhibin n řebxur i irebbiten nnes, ad t arreɣ ad ibedd zi man aya di Mu’ab, ammu i iqqar SIDI.”

36 “S uyenni ittɛeffar wuř inu x Mu’ab am temja, uř inu ittɛeffar x yeryazen n Qir-Ḥaris am ict n temja, minzi afeyyeḍ nni ikseb, aqa iweddar. 37 Qaɛ izeǧifen d iqeccura u qaɛ timira ttwaqeḍɛent, di marra ifassen nsen aqa iqessiten n wecḍan u i tejɛinna nsen aqa taxancet n wecḍan. ^■   38 X marra tizeɣwin n Mu’ab u x marra ibriden nnes, mani ma aqa din tɣuyyit, maɣar Necc arẓiɣ Mu’ab am ict n řqecɛet war dayes bu arḍa ɛad, ammu i iqqar SIDI. 39 Mammec ittwawwet Mu’ab. Nitni ccaten agejdur: Mammec i d asen dd-yarra Mu’ab s weɛrur s useḍḥi! Mu’ab idweř d ict n řqecɛet n ustehzi d ijj n umedya n usnexřiɛ i marra inni d as dd-innḍen.”

40 “Maɣar ammu i iqqar SIDI: ‘Xzar, amecnaw ijj n ugider ad iḥewwem uca ad ibezzeɛ afriwen nnes tiwa n Mu’ab.^■   41 Qaryut ittwaṭṭef uca ɣeřben x lqelɛat deg idurar. Deg wass nni ad yiři wuř n ayt n bu-teɣruḍt n Mu’ab am wuř n ict n temɣart ittarun. 42 Mu’ab ad ittwareddeǧ ařami war ittiři ɛad d řgens maɣar issemɣar ixef nnes x SIDI. 43 Tiggʷudi d wenday d řfex ad xak iřin, a cek wenni izeddɣen di Mu’ab, ammu i iqqar SIDI. 44 Wenni i ɣa yarewřen zi tiggʷudi, ad iwḍa di tesraft, u wenni dd ɣa igeɛɛden zi tesraft, ad innaɣ di řfex, maɣar Necc ad awyeɣ x Mu’ab aseggʷas n wexřaf nnes, iqqar SIDI. 45 Di tiři n Ḥacbun qqimen imarwař ttbeddan břa jjehd, maɣar timessi teffeɣ-dd zi Ḥacbun, ijj n uhaduq zi Siḥun, uca wanita icca iɣezdisen n Mu’ab d aceqquf n marra ayt n bu-řexcunet. ^■  

46 Uct xak, Mu’ab, aqa ixṣar řgens n Kamuc, maɣar iḥenjiren nnek ttwanedhen di tmeḥbast uca uřa d yessic aqa atent di tmeḥbast. 47 Deg uneggar n wussan maca ad ssenqeřbeɣ tameḥbast n Mu’ab, ammu i iqqar SIDI.” Ɣares ař danita iɣfer řḥukm x Mu’ab.