1 Tameẓriwt n Icaɛya, mmis n Amuṣ, tenni iẓra x Yahuda d Urcalim, deg wussan n Ɛuzziya, Yutam, Aḥaz d Ḥizqiya, ijeǧiden n Yahuda.

2 Sřem, a ijenwan, uca sseɣd, a tammurt, minzi SIDI issawař: “Necc sseymeɣ iḥenjiren u ssemɣareɣ ten, maca nitni ɣewwɣen xafi. ^■   3 Afunas issen bab nnes d usnus řmedwed n sidi nnes, Israil maca war issin, řgens inu war dayes teǧi řefhamet.”

4 “Uct x řgens i ixḍan, řgens i x iǧa ddqeř n řmuɛṣiyyet, zzariɛet n iɛeffanen, tarwa n usnexřiɛ. Nitni jjin SIDI, sseḥqaren Amqeddas n Israil, arrin as-dd s weɛrur. ^■   5 Mayemmi tᵉttexsem ad tᵉttwawtem ɛad, umi kenniw teqqimem tᵉttɣewwaɣem. Azeǧif marra issḥuss, uř marra yuḥeř. ^■   6 Zi třeqqa n uḍar ař azeǧif war dayes tᵉttifed min iṣebḥen! Mɣir iyezzimen, ṭṭeɛbayar d uyezzim yarezmen, war ten hennḍen, war ten ssyarḍen, war ten ssareḍben s zzect. 7 Tammurt nwem texřa, tineddam nwem sscemḍen tent s tmessi, tammurt nwem ṣṣarden tt ibarraniyyen zzat i tiṭṭawin nwem, aqa-tt d řxirbet axmi ssenqeřben tt ibarraniyyen. ^■   8 Yeǧis n Ṣihyun teqqim ɣar ḍeffar am ict n tɛiccut deg umarjuɛ n uḍiř, am texxant n uɛessas deg iyyar n řexyar, am tendint ittwaḥṣaren. 9 Mři SIDI n řɛeskarat war d aneɣ ijji drus min iqqimen, iři nedweř amecnaw Sadum, iři negga am Ɛamurra.” ^■  

10 “Sřem i wawař n SIDI, a řḥukkam n Sadum! Wcem amezzuɣ i Ccariɛa n AREBBI, a řgens n Ɛamurra!

11 Min i ɣa ggeɣ s tɣarṣi nwem, iqqar SIDI. Necc jjiwneɣ zi tɣarṣa n wecmaḍ n icarriyyen u zi tadunt n řmař iṣeḥḥen. Idammen n iyenduzen d yezmaren d iɣayḍen war d ayi tteɛjiben.^■  

12 Xmi dd-tᵉttasem ḥima ad tbanem zzat i wudem inu, wi kenniw iɛarḍen i uya, maḥend ad tɛefsem x řemraḥat inu?

13 War d ayi dd-tawyem ɛad tawhibt ibeḍřen. Řebxur ɣari d nnɛi. Ussan n iyuren n jdid d wussan n ssebt d uřaɣi i tmesmunin iqeddsen war zemmareɣ ad ḥemřeɣ marra aya, aqa-t d řmuɛṣiyyet, ɛad uřa d amuni ifarzen.

14 Řeɛmar inu icarreh ussan n uyur n jdid nwem d řeɛyud nwem ittwaggen. Aqa aten dewřen ɣari d řeḥmeř, Necc uḥřeɣ arbuɣ ten.

15 Xmi tᵉttsarraḥem ifassen nwem, ttřeḥḥfeɣ i tiṭṭawin inu zzaywem. Ɛad mařa kenniw tarnim di tẓaǧit, Necc war tt ttesřiɣ, maɣar ifassen nwem ɛemmaren s idammen.^■  

16 Sirdem, sizdegem ixef nwem, ssiggʷejem tuɛeffna n tmegga nwem zi zzat n tiṭṭawin inu. Sbeddem zi řɣar i tᵉtteggem. ^■  

17 Řemdem ad teggem min iṣebḥen, arzum x řḥeqq, wcem afus i wenni iḥsaren, ggem tasɣart i uyujiř, wtem x tajjač.”

18 “Asettiw-dd u ejj aneɣ ad nettemḥakem ak-d wayawya!, iqqar SIDI. Waxxa ddnub nnek d izeggʷaɣen am uzeggʷaɣ iḥedqen, ad dewřen d icemřaren am wedfeř, waxxa d izeggʷaɣen am uzeggʷaɣ yuǧɣen, ad dewřen d icemřařen am tduft. ^■  

19 Mařa kenniw tɛewwřem, u ad tesřem, xenni ad teccem min iṣebḥen n temmurt, 20 maca mařa kenniw tugim uca ad tɣewwɣem, ad kenniw yecc ssif, maɣar aqemmum n SIDI aqa issiweř!’ ”

21 “Mammec tedweř tendint nni dayes řaman d tamɣart n farq-ccɣeř!

Nettat tuɣa teccur s řḥeqq,

tasegda tuɣa tᵉttnusa dayes,

maca řexxu iqettařen.

22 Nnuqart nnem tedweř d kuffu,

binu nnem ṣṣuren t ak-d waman. ^■  

23 Řḥukkam nnem ttɣewwɣen,

aqa ggin ixewwanen d imeddukkař nsen,

marra ttexsen tirzifin uca arezzun x arrecwet.

Nitni war ttiɣen i uyujiř tasɣart nnes,

ddeɛwet n tijjař war ten tᵉttikkwiḍ.” ^■  

24 S uyenni iqqar Sidi, SIDI n řɛeskarat, Amzemmar n Israil: “Uct! Necc ad ssfewwjeɣ ixef inu s iɣrimen inu, Necc ad xeřfeɣ ixef inu zi řɛedyan inu. 25 Necc ggur ad wteɣ afus inu xawem u Necc ggur ad kenniw ṣeffiɣ ak-d llixiyya uca marra řexfif nnem ad t weddareɣ. ^■   26 Necc ad am wceɣ ɛawed řquḍat nnem am ɣar umezwaru, d ayt n ccwar nnem am ɣar umezwaru. Awarni aya ad am řaɣan: ‘Tandint n tsegda!’ d ‘Tendint dayes řaman!’.

27 Ṣihyun ad tᵉttwasenjem s řḥeqq d yenni ɣares ittdakkwařen s tsegda, 28 maca imɣewwɣen d imednab ad ttwarẓen jmiɛ uca inni i ɣa iḥeyyden x SIDI, ad ttwaqḍan. ^■   29 Nitni ad sseḍḥan zi ssibbet n tcejjura n yigg nni di temmeẓrem uca kenniw ad tseḍḥam zi ssibbet n iḥwicen nni tixḍarem kenniw. 30 Maɣar kenniw ad tiřim am tcejjart n yigg i zi afar nnes isřaw, u am weḥwic i war ɣar ǧin waman. 31 Ad idweř wenni ijehden d ijj n ufiřu n tiffest u řxedmet nnes d ict n tfeṭṭut, ad arɣen s tnayen idsen munen uca war din iǧi uřa d ijj wi i ɣa issxesyen.”