Izři x izřan
Mmeẓri n tesřit i yesři
1
1 Izři x izřan nni iǧan n Suliman. 2 “Ejj i-t ad ayi issudem s isudimen n uqemmum nnes,
minzi tayri nnek ḥsen zi binu.
3 Řefwaḥet n zzect nnek tecna,
isem nnek am zzect izeǧɛen,
s uya ttexsent cek teɛzariyyin.
4 Jbed ayi awarni ac, neccin ad nazzeř awarni ac!
Ajeǧid indeh ayi deg ixxamen nnes.
Ejj aneɣ ad narceq u ad zzayek nfarḥ,
ad neɛqeř x tayri nnek
ktar x min ɣa neɛqeř x binu.
Nican ttexsent cek.”
5 “D tabarcant necc, u ṣebḥeɣ,
a yessis n Urcalim,
am tqiḍunin n Qidar,
am řizarat n Suliman.
6 War d ayi xezzarent ammu,
minzi necc bbarcneɣ,
minzi tessecmeḍ ayi tfuct,
iḥenjiren n yemma tuɣa xeyyqen xafi,
jjin ayi ad ḥḍiɣ imarjaɛen n uḍiř.
Amarjeɛ n yixef inu war t ḥḍiɣ ca.”
7 “Cek, wenni ittexs buḥbeř inu, ini ayi,
mani tarekkwesed,
mani tessareyyaḥed taḥimart ɣar ṭḥa n uziř,
minzi i umi ɣa iřiɣ am tenni iḥejben
ɣar tḥimriwin n imɛacaren nnek?”
8 “Mařa cem war t tessined,
cem tenni icnan qaɛ jar temɣarin,
xenni ffeɣ, ḍfar řatar n wuǧi
u arwes tiɣaḍtin nnem mani zeddɣen imeksawen.” □
Řeɣnuj n yesři d tesřit s nnubtat
9 “Ssemquddiɣ cem ak-d uyis zzat ikarruten n Firɛun,
a tameddukkeč inu.
10 Mecḥař ṣebḥen imeggizen nnem jar tseddyin,
iri nnem jar ifiřan s tyaqutin.
11 Ad am negg tiseddyin n wureɣ,
ak-d tneqqiḍin n nnuqart.”
12 “Min ɣa yekk ujeǧid iqqim ɣar ṭṭabřa nnes taqurarit,
itticc ṣṣenbel inu řefwaḥet nnes.
13 Llif inu ittegg ayi am tecyart n mirru,
tenni issensen jar idmaren inu.
14 Llif inu i necc am tqebbiḍt n newwac n řḥenni,
deg imarjaɛen n uḍiř n Ɛayn-Jadi.”
15 “Xzar, tecnid cem, tameddukkeč inu!
Xzar, cem tecnid, tiṭṭawin nnem d idbiren.”
16 “Aqa dayek aẓri, a llif inu, wah, tḍarfed,
tuzzizewt d tassut nneɣ,
17 Tiḥenya n tudrin nneɣ d tineglin,
tiḥenya n tzeqqa aqa atent d ticejjura n umerzi.”