1 Idar Wenni cek dd-ixeřqen deg wussan n temẓi nnek, qbeř ma ad dd-awḍen wussan n řɣar i zi ɣa tinid: “War daysen ufiɣ řefraḥet!”, 2 qbeř ma ad tᵉttwabarcen tfuct d tfawt d tziri d itran uca ad dd-ɛeqben iseynuten awarni i wenẓar, 3 ɣar wass min di iɛessasen n taddart ad arjijen, iryazen ijehden ad qewsen, tinni iḥarryen tasirt ad ssbeddent tawwuri nsent minzi nitenti drus idsent, uca timɣarin nni dd-issajjan zi řkwazi ad xasen dd-tewḍa taǧest 4 u tiwwura ɣar zzenqqet ad ttwabellɛent, xmi ddriz n tsirt ad isseɣd uca řḥess n ujḍiḍ ad dd-igeɛɛed u marra yessis n uɣennij ad dewřent qewsent, 5 u bnadem ad iggʷed zi marra min iǧan yuɛřan uca ad din iřint ɛřam kuř řeḥwayej inexřiɛen deg webrid u tacejjart n ǧewz ad tnewwar u aburxes ad idweř d tamara u tanewwact n ‘ukebbas’ war d as dd-yusi ɛad ɣar řbař, - maɣar bnadem iggur ɣar taddart nnes n řebda u inni iceṭṭnen ad raḥen ad dd-tasen deg ibriden - , ^□  

6 qbeř ma ad tᵉttwarxu tesɣunt n nnuqart, ad tᵉttwarẓ ṭṭawyyet n wureɣ, ad innefrar weqbuc ɣar tařa uca ad teqḍu tjarrat deg wanu, 7 ucař ad dd-iɛqeb ɣar temmurt, am mammec t-tuɣa, u buḥbeř ad dd-iɛqeb ɣar AREBBI wenni t iwcin. ^■  

8 D ibeṭṭařen qaɛ, iqqar Umbarreḥ, aqa kuřci di řbaṭeř. ^■  

9 Sennej i uya, minzi Ambarreḥ tuɣa-t d amiɣis, isseřmed ɛawed tussna i řgens, tuɣa ittbařu ittbeqqac mliḥ. Iɛdeř aṭṭas n wawařen iweznen. ^■  

10 Yarzu Umbarreḥ maḥend ad yaf awařen iɛedřen u min yura, aqa-t nican, awařen n tidett.

11 Awařen n imiɣisen amecnaw isennanen u amecnaw imesmiren ittwasidfen, tiseqqar n ismuniten, immewcen zeg ijj n Umeksaw. ^□  

12 Sennej i marra aya, a mmi, ḥḍa ixef nnek: war din aqeṭṭu n tira n waṭṭas n idlisen u aṭṭas n tɣuri tessaḥař arrimet.

13 Awař aneggaru n marra min tesřid aqa t d wa: “Ggʷed AREBBI u ḥḍa tiweṣṣa nnes!”, maɣar man aya i yurin i kuř ijj n bnadem. ^■  

14 Maɣar SIDI ad yawi kuř tameggit zzat i taddart n ccreɛ x marra min innuffaren, ma tuɣa iṣbeḥ niɣ tuɣa war iḥři.^■