1 Sekk aɣrum nnek tiwa i waman, maɣar awarni i aṭṭas n wussan ad t tafed ɛawed. 2 Bḍa t di sebɛa, niɣ ɛad di tmenya, maɣar cek war tessined man řɣar i ɣa yiřin di temmurt. ^■  

3 Mařa ccuren iseynuten, ttzeǧaɛen anẓar x temmurt. Ma tacejjart tewḍa ɣar ljanub niɣ ɣar ccamal, deg wemcan mani tewḍa, tᵉttɣima din tezzeř. ^□  

4 Wenni ixezzaren řebda ɣar usemmiḍ, war ggur ad izarɛ, wenni iḥeṭṭan řebda iseynuten, war ggur ad imjar.

5 Am mammec cek war tessined abrid n uṣemmiḍ, ammu i war tessined uřa mammec ttwaggen iysan deg uɛeddis n temɣart s ddeyset: ammu i war tessined tmegga n AREBBI wenni itteggen marra min iǧan. ^■   6 Zarɛ zzariɛet nnek ɣar tuffut u war ttekkes afus nnek ɣar tmeddit, maɣar cek war tessined min igguren ad ifřeḥ, ta niɣ ta, niɣ ɛad s tnayen idsent ggurent ad iřint ṣebḥent.

7 Tafawt d tmiẓidt u mliḥ i tiṭṭawin ad ẓarent tfuct. 8 Wah, mařa aryaz iddar aṭṭas n iseggʷusa, ejj i-t ad ifarḥ di marra tina, u ejj i-t ad ixarreṣ deg ussan ibarcanen, uřa d nitni ggur ad iřin deg waṭṭas. Marra min i d i ɣa yasen, aqa-t di řbaṭeř.

9 Farḥ, a cek aḥudri, di temẓi nnek, sfarḥ uř nnek deg wussan n temẓi nnek. Uyur deg ibriden n wuř nnek u di min ttwařant tiṭṭawin nnek, maca ssen aqa SIDI ad cek issekk x marra aya i ccreɛ.

10 Siggʷej řhemm x wuř nnek u sḥeyyed řɣar x arrimet nnek, maɣar temẓi d řweqt s ucewwaf abarcan aqa aten di řbaṭeř.