1 Izan ineqqen ttarran zzect n wedhan n uɛeṭṭar ad tarṣuḍ u ad tesmem. Drus n tubbuheřya twezzen aṭṭas x tiɣit d ccan. 2 Uř n umiɣis aqa-t i netta afus nnes afusi, maca uř n ubuhaři i wanita afus nnes azeřmaḍ. 3 Uřa deg webrid min xef iggur ubuhaři, ittxeṣṣa as wuř nnes, iqqar i marra aqa netta d abuhaři. 4 Mařa xak ixeyyeq buḥbeř n bu-jjehd, war tteggʷij x wemcan nnek, maɣar man aya d ddwa, yaressa ddnub imeqqranen.

5 Aqa din ijj n řɣar nneɣni nni ẓriɣ sadu tfuct, aqa-t d ijj n uweddar i dd-iffɣen zeg ayt n ṣṣulṭa. 6 Tettwassgeɛɛad tubbuheřya aṭṭas, am ttɣiman ayt n bu-wagřa swadday. 7 Necc ẓriɣ imsexxaren nyin x yeysan uřa d řḥukkam nni igguren am imsexxaren x iḍaren nsen x temmurt.

8 Wenni itteqqazen aḥfur, ad dayes iwḍa s yixef nnes, wenni iheddmen řḥiḍ, izemmar ad as iqqes ufiɣar. ^■  

9 Wenni yarebbun iẓra, ad zzaysen iyzem ixef nnes, wenni ittqeddaren akeccuḍ, ad yiři di lxaṭar.

10 Mařa uzzař n ccaqur idweř iḥfa u bab nnes war t isseqḍeɛ, xenni ittxeṣṣa as jjhed ktar, maca tiɣit d tenni n yemmatsen ḥima ad ifřeḥ bnadem.

11 Mařa izɛef ufiɣar qbeř aɛezzem, war din řefḍeř i uɛezzam.

12 Awařen zeg uqemmum n umiɣis xsen ssar, maca iyencicen n ubuhaři ṣarḍen t simant nnes.

13 Beddu n wawařen zeg uqemmum nnes d tubbuheřya u aneggaru n min dd-iffɣen zeg uqemmum nnes d aṭemmes aɛeffan.

14 Abuhaři ittkettar řharḍ aṭṭas, maca bnadem war issin min ɣa imsaren. U min ɣa imsaren awarni as, wi d as t i ɣa iɛawden?

15 Arber n ibuhařiyyen ittarra-ten uḥřen, maɣar nitni war ssinen mammec i ɣa yuyuren ɣar tendint.

16 Uct xam, a tammurt, ajeǧid nnes d aḥenjir ɛad u řḥukkam nnes ɣar teffut ttᵉtten! ^■  

17 Sseɛd nnem, a tammurt, ajeǧid nnes d mmis n tarwa n taṣiřet nnes u řḥukkam nnes ttᵉtten ɣar řweqt ittwaggen, maḥend ad ttwameḥden, war iǧi maḥend ad skaren.

18 S řeɛgez i dd-thekkwa řxedmet n tzeqqa u s ifassen yarehfen ggur ad tudum taddart.

19 Bnadem ittegg aɣrum maḥend ad iḍhec, u binu issfarraḥ inni iddaren u ttmenyat neffɛent i marra min iǧan.

20 War neɛɛeř ajeǧid waxxa ɣar di řbař nnec, deg wexxam n yiḍes war neɛɛeř bu-wagřa, maɣar ijḍaḍ n ujenna zemmaren ad ssuyuren řḥess n wawařen nnek u ammu marra wi ɣar ǧan wafriwen izemmar ad isseɛdu awař. ^■