1 Maɣar necc ggiɣ marra aya ɣar wuř inu maḥend ad arzuɣ di marra man aya, ufiɣ aqa imseggaden d imiɣisen d tmegga nsen deg ufus n AREBBI. Tayri d wecrah war ten issin bnadem, aqa marra iǧa zzates. 2 Marra iǧa am mammec iǧa ɣar marra: tira d ict třeqqef amsegged d uɛeffan, am uṣebḥan d umezdag am umexmuj, wenni iqeddmen taɣarṣt d wenni war iqeddmen taɣarṣt, aṣebḥan d umednub, wenni ittjjaǧan d wenni ittegʷeden maḥend ad ijjaǧ. ^■   3 Man aya d ijj n řɣar di marra min imsaren sadu tfuct aqa marra iwdan iřqef i-ten tira d ict, uca uřa uř n tarwa n bnadem iccur s řɣar, u aqa din aṭemmes deg wuř nsen di řweqt n tudart nsen, u awarni i uya ad uyuren nitni ɣar imettinen. 4 Maɣar i wenni iqqnen i marra inni iddaren aqa din asitem, minzi aqzin iddaren ḥsen zeg wayrad immuten. 5 Maɣar inni iddaren ssnen, aqa nitni ad mmten, maca imettan war ssinen walu qaɛ. Nitni war ttᵉṭṭfen walu zi řmunet, maɣar řidaret xafsen tᵉttwattu. 6 Aqa tayri nsen d wecrah nsen d wasam nsen fnan. I řebda war ɣarsen bu tesɣart ɛad di marra min ittemsaren sadu tfuct.

7 Uyur xenni, iwa ecc s řefraḥet aɣrum nnek uca su s wuř ifarḥen binu nnek, maɣar iɛjeb as i AREBBI timegga nnek aṭṭas zeg wami. 8 Ejj ad yiři arruḍ nnek d acemřař řebda u ɛemmarṣ war ittxeṣṣi zzect x uzeǧif nnek. 9 Barreɛ x tudart ak-d temɣart nni ak-d tᵉttexsed marra ussan n tudart nnek ifennan nni d as iwca AREBBI sadu tfuct, mařa ussan nnek nni iɛeddun, maɣar ta d tasɣart nnek di tudart-a, u zeg umarret wenni i umi tmarrted sadu tfuct.

10 Marra min ɣa yaf ufus nnek maḥend ad t yegg, egg i-t ɛlaḥsab tizemmar nnek, maɣar war iǧi di řaxart mani i ɣa tuyured min ɣa tegged niɣ anway niɣ tussna uřa d tiɣit.

11 Ɛawed ẓriɣ sadu tfuct aqa ayt n bu-tazřa war ɣeǧben řebda di ḥamat, niɣ ayt n bu-teɣruḍt řebda deg umenɣi, niɣ imiɣisen řebda aɣrum, niɣ inni s řeɛqeř řebda agřa, uřa d inni s řefhamet řebda arḍa, maɣar řḥař d tira řeqqfen uřa d marra nitni.

12 Maɣar bnadem war issin řmijař nnes, amecnaw iseřman inḥeṣren di tracca n arẓiyyet, u am ijḍaḍ innḥeṣren di řfex. Ammu uřa d tarwa n bnadem ttwaṭṭfen di řfex deg ict n řweqt d taɛeffant, xmi xasen dd-tweṭṭa tracca deɣya.

13 Uřa d tiɣit-a ẓriɣ tt sadu tfuct, tusa ayi-dd d tameqqrant aṭṭas.

14 Tuɣa ict n tendint d tameẓyant dayes drus n yewdan waha. Iffeɣ xas ijj n ujeǧid d ameqqran, iḥewwes i-tt, u issbedd xas lbarajat timeqqranin.

15 Ittwaff dayes ijj n weryaz d amezřuḍ d amiɣis wenni ifekken tandint s tiɣit nnes, maca uřa d ijj n bnadem iɛqeř ɛad x weryaz nni.

16 Xenni nniɣ necc: “Tiɣit teḥřa x jjhed!”, waxxa tᵉttwaseḥqar tiɣit n umezřuḍ u awařen nnes war tᵉttwasřen. ^■  

17 Awařen n imiɣisen nni i ɣar tesřan iwdan di řhudnet ḥsen zeg uɣuyyi n řḥakem jar ibuhařiyyen.

18 Tiɣit teḥřa x řesnaḥ n umenɣi, maca ijj n umednub waha iheddem aṭṭas.