Awařen Iweznen
1
1 Awařen iweznen n Suliman, mmis n Dawud, ajeǧid n Israil, 2 ḥima ad issen bnadem tiɣit d ttarbiyyet,
ḥima ad ifhem awařen ccuren s řefhamet,
3 ḥima ad iqbeř ttarbiyyet d řeɛqeř,
tasegda d řḥeqq d řeṣfayet,
4 ḥima ad iwc asfarz i iḥafiyyen,
tussna d uḥadur i uḥudri.
5 Ejj amiɣis ad iseř u ad yarni di řefhamet nnes,
ejj wenni ifehhmen ad ikseb řeqnaɛet,
6 ḥima ad ifhem awař iweznen d lmatal,
awařen n imiɣisen d řemɛani innufaren nsen.
7 Tiggʷudi n SIDI d beddu n tussna,
maca ibuhařiyyen sseḥqaran tiɣit d ttarbiyyet. ■
8 Seř, a mmi, ɣar ttarbiyyet n babac,
war ttagi ca taɣuri n yemmac,
9 maɣar nitenti ad iřint d ttaj icna x uzeǧif nnek,
d tseddyin izewwqen i yiri nnek.
10 A mmi inu, mařa xsen imednab ad cek ɣwan,
war d asen ttegg ca array.
11 Mařa nitni qqaren:
“Uyur akidneɣ, ejj ad nḥama i usizzeř n idammen,
ejj aneɣ ad negg ict n texceft i umezdag, břa ssibbet.
12 Ejj aneɣ ad ten nṣarḍ am ddaren, am mammec tṣareḍ řaxart,
am kemřem, amecnaw yenni ihekkwan deg weḥfur n wenḍeř.
13 Ad naf marra řeḥwayej yiɣřan aṭṭas,
tudrin nneɣ ad tent neccur s tkeccaḍt.
14 Cek ad tenḍared taqedduḥt nnek jar aneɣ,
ad ɣarneɣ tiři marra ict n tecyart.”
15 A mmi inu, war kidsen ggur deg webrid,
siggʷej aḍar nnek x umesruq nsen,
16 maɣar iḍaren nsen ttazzřen ɣar řɣar,
u nitni ttqeǧiqen maḥend ad ssizzřen idammen. ■
17 Maɣar s řbaṭeř ad tᵉttwabezzeɛ tracca,
zzat i tiṭṭawin n marra min ɣar iǧa wafriwen,
18 maɣar nitni ttḥaman idammen n yixef nsen,
u tteggen taxceft i řeɛmur n yixef nsen.
19 Ammu i iǧan ibriden n kuř ijj wenni ittazzřen ɣar arbeḥ,
aqa aya itteṭṭef řeɛmar n sidis. ■
20 Tiɣit tbarreḥ s jjhed diha barra,
tessgeɛɛed tmijja nnes deg wazzayen.
21 Mani ibda řharaj, tᵉttbarraḥ nettat,
ɣar wadafen n tewwura n tendint tessawař awařen nnes.
22 “Ař meřmi i ɣa qqimen iḥafiyyen ttexsen taqubbanect,
ař meřmi i d asen i ɣa iɛjeb uḥecci i imestehzayen,
u ař meřmi i ɣa carhen ibuhařiyyen tussna?
23 Dewřem ɣar uwebbex inu!
Xzarem, Necc ad xawem ssfarrɣeɣ Arruḥ inu,
awařen inu ad awem ten ɛeřmeɣ.”
24 “Aqa zeɛma řaɣiɣ u kenniw war texsem,
sswiẓẓḍeɣ Necc afus inu, maca uřa d ijj war d as iḥekkar. ■
25 Tenḍarem ccwar inu,
awebbex inu war t teqbiřem.
26 S uyenni uřa d Necc ad ḍeḥceɣ x uḍeyyeɛ nwem,
Necc ad zzaywem stehzeɣ xmi dd ɣa yas unexřiɛ nwem,
27 xmi dd ɣa yas unexřiɛ nwem am yijj n ureddeǧ,
aḍeyyeɛ nwem am ict n tḥaryaḍt,
xmi xawem dd ɣa tewḍa řeḥṣaret d teggʷudi. ■
28 Xenni ad xafi dd-řaɣan, maca Necc war dd-ttarriɣ,
ad xafi arzun, maca war d ayi ttifen,
29 minzi nitni carhen tussna,
u war ixḍaren ad ṭṭfen di tiggʷudi n SIDI.
30 Nitni war xsen ca řecwar inu,
marra awebbex inu nḍaren t.
31 Nitni ad ccen zi řɣiǧet n webrid nsen,
u ad jjiwnen s ixarriṣen n yixef nsen,
32 minzi ufuɣ n iḥafeyyen x webrid ad ten ineɣ,
u afřaḥ n ibuhařiyyen ad ten isshellek.
33 Wi ɣari i ɣa isřen, ad izdeɣ di řaman,
ad yareyyeḥ zeg unexřiɛ n tuɛeffna.”