1 Awařen n Umbarreḥ, mmis n Dawud, ajeǧid di Urcalim.

2 D ibeṭṭařen qaɛ, iqqar Umbarreḥ, d ibeṭṭařen qaɛ, aqa kuřci di řbaṭeř. ^■   3 Man řefḍeř i iǧan ɣar bnadem di marra arber i zi ittmarret sadu tfuct? ^■   4 Jjiř iggur, ijj n jjiř nneɣni ittas-dd, maca tammurt ad teqqim tbedd i řebda. ^■   5 Tneqqar-dd tfuct u tɣeǧi tfuct ɛawed, u ad dd-tedweř deɣya ɣar manis i dd-tneqqar. 6 Netta iggur ɣar ljanub u ittenneḍ ɛawed ɣar ccamal. Am iggur ittenneḍ u ittenneḍ usemmiḍ, u ittɣima uṣemmiḍ iddakkwař-dd ɣar uduwwar nnes. 7 Marra iɣezran ttkebban di řebḥar, waxxa amenni war ittccuri řebḥar. Ɣar manis dd-ttazzřen iɣezran, dinni ttɣimen ttazzřen ɛawed. ^■   8 Marra timesřayin ggurent břa qeṭṭu, uřa d ijjen war izemmar ad xas yini ca. Ɛemmarṣ tiṭṭ ad tejjawen zeg weẓri uca amezzuɣ ɛemmarṣ ad ijjawen zeg utesři. 9 Min tuɣa iǧan ad yiři, min ittwaggen ad ittwagg ɛawed. War din iǧi jdid sadu tfuct. ^■  

10 Ma aqa din ca n řḥajjet qqaren xas: “Xzar, man aya n jdid!”? Aqa-tt din deg ikuden nni tuɣa iǧan qbeř i neccin.

11 War ǧin d ixarriṣen x yenni tuɣa din imezwura uřa x yenni i ɣa yiřin d ineggura nni dd ɣa yasen ɛad, uřa x yina war ttiřin ixarriṣen ɣar yenni dd ɣa yasen awarni asen ɛad.

12 Necc, Ambarreḥ, tuɣa ayi d ajeǧid x Israil, di Urcalim.

13 Necc tuɣa kkseɣ deg wuř inu ad arzuɣ u ad beqqceɣ s tiɣit di marra min imsaren sadu ujenna. Man aya d ijj n ccɣeř iwɛar, iwca i-t AREBBI i tarwa n bnadem ḥima ad dayes řhan.

14 Necc ẓriɣ marra timegga i ittwaggen sadu tfuct, u xzar, marra aya tuɣa-t di řbaṭeř d weḍfar n usemmiḍ.

15 Min ifarɣen war izemmar ad ittwaseggem, u min ittxeṣṣan war izemmar ad ittwaḥseb.

16 Necc ssiwřeɣ ak-d wuř inu, nniɣ: “Xzar, necc ssemɣareɣ tiɣit inu uca arniɣ dayes, mahu marra inni tuɣa izeddɣen di Urcalim qbeř inu. Uř inu iẓra aṭṭas n tiɣit d tussna.

17 Necc ggiɣ uř inu maḥend ad dd-awyeɣ tiɣit, maḥend ad ssneɣ tubbuheřya d ufucceḥ. Necc ufiɣ uřa d man aya aqa d aḍfar n usemmiḍ.

18 Maɣar deg waṭṭas n tiɣit din aṭṭas n řhemm u wenni yarennin di tussna, yarenni deg wemnus.