Awařen iweznen n yemmas n Lamuyil
31
1 Awařen n Lamuyil, ajeǧid. Awařen iqesḥen i zi t tɛeřmed yemmas.
2 Min din, a mmi inu, min din, a mmi n weḥsin inu?
Min i ɣa tegged, a mmi n lwuɛud inu?
3 War ttic tizemmar nnek i temɣarin,
uřa ibriden nnek i tinni itthellaken ijeǧiden. ■
4 War dd-tusi i ijeǧiden, a Lamuyil, war dd-tusi i ijeǧiden maḥend ad swen binu,
uřa i ayt n jjehd maḥend ad meẓren di ccrab.
5 Niɣ ad isuw u ad ittu lfariḍa
u xenni ad issfarɣ tanfuč n marra imxeyyben.
6 Ewc ccrab i yenni i ɣa ittwahellken,
uřa d binu i yenni di iǧa wecḍan amerzag di řeɛmar nsen.
7 Ejj i-t ad isuw u ad ittu zzeřḍ nnes,
u ejj i-t war ttxarraṣ di tamara nnes ɛad.
8 Arzem aqemmum nnek i iziynan,
i ddeɛwet n marra inni ittwajjen.
9 Arzem aqemmum nnek, ḥkem s řḥukm nican,
uca aɣ tasɣart i umezřuḍ. ■
10 Alif. Man wen i ɣa yafen ict n temɣart imeḥḍen?
Ttaman nnes iɛdu marra řmarjan. ■
11 Bit. Xas i ittcařa wuř n sidi nnes,
war d as ittxeṣṣi řefḍeř.
12 Gimel. Nettat tᵉttegg as min iṣebḥen u maci řɣar,
marra ussan n tudart nnes.
13 Dalit. Nettat tarezzu taḍuft d tiffest,
u txeddem s ifassen nnes imeḥḍen.
14 Hi. Nettat tegga am tɣarruba n usebbab,
zi řaggʷaj tᵉttawi-dd macca nnes.
15 Waw. Netta tᵉttnakkar umi ɛad teǧa ǧiřet,
tᵉttic macca i taddart nnes,
u tasɣart nsent i temsexxarin tibřiɣin nnes.
16 Zayin. Nettat tᵉttxarraṣ deg iyyar u tᵉtteṭṭef i-t,
zi řɣiǧet n ifassen nnes teẓẓu tizayarin deg umarjuɛ.
17 Xit. Nettat tbekkes tijɛinnatin nnes s jjehd,
u tessemḥaḍ iɣaǧen nnes.
18 Tit. Nettat tḥekkar i řefḍeř n tsebbabt nnes,
řefnar nnes war ixessi di ǧiřet.
19 Yud. Nettat tesswiẓẓeḍ ifassen nnes ɣar trukka,
u ifassen nnes ṭṭfen tazḍa.
20 Kaf. Nettat tarezzem afus nnes i umeḥdaj,
u tesswaẓẓaḍ ifassen nnes i umezřuḍ.
21 Lamid. Nettat war tᵉtteggʷed zi taddart nnes di ssibbet n wedfeř,
maɣar marra taddart nnes ɣares arruḍ arjuwani.
22 Mim. Nettat tegga tisuntawin n zwaq i yixef nnes,
arruḍ nnes s řeqṭen azdad u s ufiřu arjuwani.
23 Nun. Aryaz nnes ittwassen di tewwura,
xmi ittɣima netta ak-d imɣaren n temmurt.
24 Samix. Nettat tᵉttegg arruḍ n řeqṭen uca tezznuza i-t,
nettat tezznuza ibuyas i usebbab zi Kenɛan.
25 Ɛayin. Tizemmar d řɛezz d arruḍ nnes,
nettat tḍeḥḥec tesfarnin x wass i dd ɣa yasen.
26 Pi. Nettat tarezzem aqemmum nnes s tiɣit,
aqa din taɣuri s tmexsiwt icewwaren x yiřes nnes.
27 Tsadi. Nettat tḥeṭṭa x min ittemmsaran di taddart,
aɣrum n řeɛgez war tᵉttett .
28 Quf. Iḥenjiren nnes ttekkaren, ssemɣaran tt s řefraḥet,
uřa d aryaz nnes ittmeddeḥ i-tt.
29 Rix. Aṭṭas n tyessit ggint timegga jehdent,
maca cem teɛdud-dd ten marra.
30 Cin. Řebhut tcemmet u aẓri ifenna,
maca tamɣart nni itteggʷden SIDI, ittxeṣṣa ad tt ssemɣaren.
31 Taw. Wcem as zi řɣiǧet n ifassen nnes,
jjem timegga nnes ad as ṣebbḥent ɣar tewwura.