1 Necc nniɣ deg wuř inu: “As-dd xenni, ad cek qeǧbeɣ s řefraḥet. Xzar ɣar min icnan!” Xzar, uřa d man aya aqa-t di řbaṭeř. ^■   2 I tadeḥḥact nniɣ necc: “D tabuhařit cem!”, u i řefraḥet: “Min dd ɣa tawi amenni?” 3 Necc arzuɣ deg wuř inu umi ssarecqeɣ arrimet inu s binu - di řweqt mani uř inu s tiɣit iṭṭef sřayem - u umi řesqeɣ di tubbuheřyaya, ařami ad ẓareɣ min iǧan ḥsen qaɛ i tarwa n bnadem maḥend ad t ggen sadu ujenna am ḥessben s řmeqřub řqedd n wussan n tudart nsen.

4 Necc arniɣ di řemɣaret n min ggiɣ. Necc ssbeddeɣ i yixef inu tudrin, ẓẓuɣ tizayarin deg imarjaɛen i yixef inu. 5 Necc ggiɣ iḥwicen d iftisen am yenni n jjennet uca ẓẓuɣ daysen ɛřam kuř ticejjura n fruta. 6 Necc ggiɣ iyeřmamen ccuren s waman ḥima ad zzaysen ssesweɣ azɣar maḥend ad ssuffyent tcejjura. ^□   7 Necc sɣiɣ isemɣan d tsemɣin uca dewřen ɣari d imsexxaren ittwarwen di taddart inu. Tuɣa ɣari uřa d ict n tḥimart d tameqqrant n ifunasen d wuǧi, aṭṭas x marra inni tuɣa iǧan di Urcalim qbeř xafi. ^□   8 Necc ssmuneɣ i yixef inu uřa d nnuqart d wureɣ d řeknuz n ijeǧiden u zi lɛamalat. Necc debbareɣ-dd i yixef inu imeɣnujen d tmeɣnujin uřa d min di meẓren tarwa n bnadem: tamɣart d temɣarin. 9 Necc arniɣ di řemɣaret inu uca arniɣ-dd aṭṭas, mahu marra inni iǧan qbeř i necc di Urcalim, waxxa amenni teqqim tiɣit tbedd akidi.

10 Marra min iǧan d meẓri di tiṭṭawin inu, war d asent qḍiɛeɣ. War menɛeɣ i wuř inu uřa d ict n řḥajjet, maɣar uř inu ifarḥ zi ssibbet n marra arber inu: ta d tasɣart n marra amarret inu.

11 Xas uca ggiɣ udem inu ɣar marra timegga inu, min ggin ifassen inu, u ɣar arber nni ggiɣ am d ayi tuɣa ttmarrateɣ. Xzar, ufiɣ man aya marra aqa-t di řbaṭeř d weḍfar n usemmiḍ uca war din iǧi bu řefḍeř sadu tafuct.

12 Necc ggiɣ udem inu maḥend ad ẓareɣ tiɣit, uřa d tubbuheřya d taɣyuři, maɣar min iɛna bnadem nni dd ɣa iḍfaren ajeǧid nni yareccḥen aṭṭas zeg wami? ^■  

13 Necc ẓriɣ aqa tiɣit teɛdu x tubbuheřya s waṭṭas, am teɛdu tfawt x taǧest.

14 Amiɣis ɣares tiṭṭawin deg uzeǧif nnes, maca abuhaři iggur di taǧest. Xenni ufiɣ aqa třeqqef i-ten marra tira d ict.

15 Xenni nniɣ deg wuř inu: “Mařa teřqef abuhaři, ad teřqef uřa d necc. Mayemmi i ɣa meyyzeɣ s tiɣit?” Xenni nniɣ deg wuř inu: “Uřa d man aya aqa-t di řbaṭeř.”

16 Maɣar war ittiři řɛeqřan x umiɣis uřa x ubuhaři ɛawed. Deg wussan i dd ɣa yasen ad ittwattu marra. Ma war immut umiɣis am ubuhaři?

17 Uca bdiɣ ad carheɣ tudart, maɣar min ittwaggen sadu tafuct, tewḍa-dd xafi mɣir d tamara, maɣar man aya marra aqa-t di řbaṭeř d weḍfar n usemmiḍ.

18 Bdiɣ ɛawed ad carheɣ amarret inu i zi marrteɣ sadu tafuct, maḥend ad t jjeɣ i yijj n bnadem nni i ɣa yiřin awarni ayi.

19 Wi issnen ma netta ad yiři d amiɣis niɣ d abuhaři? Aqa ggur ad iṣelleṭ x marra amarret inu i zi marrteɣ u i zi tuɣa ǧiɣ d amiɣis sadu tfuct. Aqa uřa d man aya aqa-t di řbaṭeř.

20 Řexdenni nnqeřbeɣ ḥima ad ggeɣ uř inu ad iqneḍ x marra amarret inu i x tuɣa marrteɣ sadu tfuct. 21 Maɣar waxxa aqa din ijj n bnadem i umi dd-yusa arber nnes ak-d tiɣit d tussna d tzemmar, ɛad ittxeṣṣa ac ad t iwc i yijj n bnadem i war imarrten i man aya. Uřa d man aya aqa-t di řbaṭeř d ict n tuɛeffna d tameqqrant. 22 Maɣar man řefḍeř ɣar bnadem zi marra areber nnes u zi tarezzut n wuř nnes i zi ittmarrat sadu tfuct? ^■   23 Maɣar marra ussan nnes mɣir d amnus u ccɣeř nnes mɣir řhemm. Ɛad di ǧiřet war yareyyeḥ wuř nnes. Uřa d man aya aqa-t di řbaṭeř.

24 War din iǧi d lemliḥ i bnadem x macca d tseswit uřa x umi iɣebba řeɛmar nnes ɣar marra amarret nnes. Necc ẓriɣ aqa uřa d man aya yusa-dd zeg ufus n AREBBI. ^■   25 Maɣar man wen izemmaren ad yecc niɣ man wen izemmaren ad yawi ařiqqi, barra i Necc? 26 Maɣar Netta ittic tiɣit d tussna d řefraḥet i bnadem nni icnan zzat i wudem nnes. Maca i umednub ittic as ccɣeř maḥend ad iyarw u ad issmun, ḥima ad t iwc xenni i wenni iǧan icnan zzat i wudem n AREBBI. Uřa d man aya aqa-t di řbaṭeř d weḍfar n usemmiḍ. ^■