Marra ɣares tsaɛɛet nnes
3
1 Marra ɣares řmijař nnes u aqa din tasaɛɛet ittwaggen i kuř tamesřact sadu ajenna. 2 Aqa din ict n tsaɛɛet n tarwa d ict n tsaɛɛet n řmewt,
ict n tsaɛɛet n taẓẓut u d ict n tsaɛɛet n weqřaɛ n min itwaẓẓun,
3 ict n tsaɛɛet n tmenɣiwt d ict n tsaɛɛet n usgenfi,
ict n tsaɛɛet n wehdam d ict n tsaɛɛet n řebni,
4 ict n tsaɛɛet n imeṭṭawen d ict n tsaɛɛet n tḍeḥḥact,
ict n tsaɛɛet n wecḍan d ict n tsaɛɛet n ccḍiḥ,
5 ict n tsaɛɛet n uḥejjar n weẓru d ict n tsaɛɛet n wejraw n weẓru,
ict n tsaɛɛet n udarreɛ d ict n tsaɛɛet n řaggʷaj x udarreɛ, ■
6 ict n tsaɛɛet n tarezzut d ict n tsaɛɛet n uweddar,
ict n tsaɛɛet n uxemmer d ict n tsaɛɛet n useyyeb,
7 ict n tsaɛɛet n ucarreg d ict n tsaɛɛet n uxeyyeḍ,
ict n tsaɛɛet n useɣdi d ict n tsaɛɛet n řharḍ,
8 ict n tsaɛɛet n tayri d ict n tsaɛɛet n wecrah,
ict n tsaɛɛet n garra d ict n tsaɛɛet n řehna.
9 Man tizi ɣar wenni ixeddmen x min xef yarebbeř? ■
10 Necc ẓriɣ ccɣeř nni iwca AREBBI i tarwa n bnadem maḥend ad zzayes ssiḥřen ixef nsen.
11 Netta igga marra d aṣebḥan di řweqt nnes. Igga uřa d akud i řebda deg wuř nsen, břa ma izemmar bnadem ad iḥaka di tmegga nni igga AREBBI zeg umezwaru ɣares ař aneggaru.
12 Necc ufiɣ war ɣarsen iǧi min iḥřan x minni farrḥen iwdan niɣ ad arren meẓri meřmi nitni ɛad di tudart nsen.
13 U ɛawed aqa kuř bnadem ad icc u ad isu uca ad yarr meẓri di min iṣebḥen di marra amarret nnes. Aya d ict n tarzeft n AREBBI.
14 Necc ssneɣ aqa marra min ittegg AREBBI, ad yiři i řebda. War ɣares ittmarni walu u war zzayes ittwasenqis walu. AREBBI igga i-t maḥend ad ggʷeden zzat i wudem nnes.
15 Min iǧan, tuɣa iǧa qbeř, uca min ɣa yiřin, tuɣa iǧa ɛad. AREBBI yarezzu x min iɛdun.
Actab n umsegged d inni war iseggden
16 Aqa ẓriɣ sadu tfuct ɛawed amcan n řḥeqq, aqa iselleṭ din řɣecc, uřa d amcan n tsegda, aqa din řɣar.
17 Necc nniɣ deg wuř inu: “AREBBI ad iḥkem amsegged d uɛeffan, maɣar dinni ict n tsaɛɛet i kuř tamesřact u i qaɛ řxedmet.”
18 Necc nniɣ deg wuř inu: “Aqa di ṭṭweɛ n tarwa n bnadem, aqa AREBBI ad ten issifef u nitni ggur ad twařan aqa nitni amecnaw řmař, nitni deg ixef nsen.”
19 Maɣar x tira n tarwa n bnadem u x tira n řmař: nitni ɣarsen tira d ict. Am mammec immut wa, immut uřa d wenneɣni, marra idsen ɣarsen d twarrit n nnefs d ijj. War din iǧi řefḍeř i bnadem x řmař, maɣar marra aqa-t di řbaṭeř. 20 Marra idsen gguren ɣar ijj n wemcan, marra nitni zeg ucař uca ad dd-dewřen ɣar ucař. ■ 21 Wi issnen ma buḥbeř n tarwa n bnadem ad igeɛɛed ɣar sennej u buḥbeř n řmař ad dd-ihwa ɣar temmurt? 22 Ammu i twařiɣ war iǧi min iḥřan x minni ifarreḥ bnadem di tmegga nnes, maɣar man aya d tasɣart nnes, minzi man wen izemmaren ad t yarr ař ɣa iẓar min ɣa yiřin awarni as?