1 Ẓriɣ ɛawed marra ddeǧ i ittwaggen sadu tfuct. Xzar, aqa da imeṭṭawen n yinni ittwadeǧen, inni war ɣar iǧi umfewwej. Iffeɣ-dd lɛunf zeg ufus n yinni ten ittedǧan, maca war ɣarsen bu umfewwej. 2 Necc ṣebbḥeɣ imettinen nni immuten ɛad aṭṭas zeg wami, zeg inni iddaren, inni ɛad iddaren. 3 Iḥřan xasen s tnayen idsen d wenni war iǧin ɛad, d wenni war iẓrin timegga tiɛeffanin nni ittwaggent sadu tfuct.

4 Necc ẓriɣ marra amarret d marra tizemmar di řxedmet, aqa-t mɣir d amɛanad n ijj ak-d wenneɣni. Uřa d man aya aqa-t di řbaṭeř d weḍfar n usemmiḍ. 5 Abuhaři iḍfes ifassen nnes uca ittett aysum n ixef nnes. ^■   6 Iḥřa ijj n wuru n ufus iccur s řhudnet uřa tnayen n ifassen ccuren s arber d weḍfar n usemmiḍ.

7 Ɛawed ẓriɣ ca min iǧan di řbaṭeř sadu tfuct. 8 Aqa din ijjen aqa t ḥafi u war din wenni d wiss tnayen i ibedden ɣares. Uřa war ɣares iǧi uḥenjir u war ɣares umas. War iǧi uneggar ɣar marra arber nnes, uřa war tᵉttyiwin tiṭṭ nnes zeg wagřa. “I umi tteggeɣ tamara u ssekkiɣ tt di řeɛmar inu zi tcuni?” Uřa d man aya di řbaṭeř d ijj n ccɣeř iwɛar i yeǧa. 9 Tnayen ḥsen zeg ijjen waha, maɣar nitni ɣarsen řmunet d lemliḥ deg warber nsen.

10 Maɣar mařa nitni wḍan, ad issnekkar ijjen zeg umɛacar nnes ɛawed. Maca axeyyeb i wenni i iǧan weḥḥdes mařa netta iwḍa, minzi war din ittiři ḥed maḥend ad t issnekkar ad ibedd.

11 Ɛawed mařa tnayen ṭṭsen munen, ad ɣarsen yiři řeḥmu, maca mammec i ɣa igg ijjen weḥḥdes ad iḥma?

12 Maca mařa netta, weḥḥdes, yarna ijjen, zemmaren nitni s tnayen idsen ad ɣarsen bedden. Ijj n wesɣun imuden x třata war iqeṭṭu deɣya.

13 Iḥra ijj n uḥudri d amezřuḍ d amiɣis zeg ijj n ujeǧid iwsar d abuhaři i war ifehhmen ɛad i weɛřam.

14 Maɣar ad dd-iffeɣ zi řeḥbes maḥend ad idweř d ajeǧid waxxa netta ittwaxřeq-dd d amezřuḍ di tgeldit nnes.

15 Necc ẓriɣ marra inni iddaren i igguren sadu tfuct, jmiɛ ak-d uḥudri, wenni d wiss tnayen nni ggur ad ibedd deg wemcan nnes.

16 War din aneggar ɣar řgens nni am ikmeř nni zi izwar netta am yixef. Waxxa amenni uřa d inni dd ɣa yasen awarni as, war zzayes farrḥen. Ammu uřa d man aya aqa-t di řbaṭeř d weḍfar n usemmiḍ.

17 Ḥḍa aṣurif nnek mařa cek teggured ɣar Taddart n AREBBI. Aqarreb ḥima ad tesḥessed, ḥsen zeg uwehheb n tɣarṣt s ufus n ibuḥařiyyen, maɣar nitni war ssinen walu u ammu i ɣa ggen min iǧan d aɛeffan.