1 War tqeǧiq s uqemmum nnek u ḥḍa aqa uř nnek war ittemḥizwar ad inṭeq awař zzat i AREBBI. Maɣar AREBBI deg ujenna, maca cek di temmurt. Iwa, ejj ad iřin wawařen nnek udrusen. 2 Maɣar am tirja tᵉttas-dd s waṭṭas n řehhu, ammu uřa d řhard n ubuhaři s waṭṭas n wawařen.

3 Mařa cek teggid i AREBBI ict n tjaǧit, war ttraja ca xenni maḥend ad tt tkemmřed, maɣar war d as tteɛjiben ibuhařiyyen. Min twaɛded, ittxeṣṣa ad t ttkemmřed. ^■   4 Ihřa mařa war twaɛded, x mařa cek twaɛded maca war tkemmřed. ^■   5 War ttejji aqa aqemmum nnek ad yarr arrimet nnek ad texḍa u war teqqar zzat i wudem n lmalak, aqa man aya d aweddar waha. Mayemmi i ɣa iffugem AREBBI x min teqqared u ad yareddeǧ řxedmet n ifassen nnek? 6 Maɣar deg waṭṭas n tirja, aqa daysent min iǧan di řbaṭeř, ammu uřa deg waṭṭas n wawařen. S uya: Ggʷed AREBBI!^■  

7 Mařa cek tḥekkared řeḥṣaret n imezřaḍ uřa d amnaɛ n řḥeqq d tsegda di lɛamala, war ttarjif ca x tmesřact, maɣar x yijj n umeqqran aqa din wenni d ameqqran xas uca xasen bedden inni d imeqqranen ɛad. 8 Ijj n ujeǧid ittceṭṭaren i temmurt n tfeǧaḥt, aqa netta d řefḍeř i temmurt di marra iɣezdisen.

9 Wenni ittexsen ttmenyat, war ittjiwin ɛemmarṣ ttmenyat, u wenni ittexsen agřa, ɛemmarṣ war ittjiwin řmunet nnes. Uřa d man aya aqa-t di řbaṭeř.

10 Mani ittmarni wagřa, ammu ttmarnin uřa d inni t i ɣa iccen. Man řefḍeř i ɣa iqqimen i aytbab nnes mɣir tiṭṭawin nsen zemmarent ad xzarent aya?

11 D miẓid iḍes n uxeddam, ma netta ɣares drus niɣ aṭṭas n macca, maca i bab n wagřa afeyyeḍ nsen war ten ittejji ad ṭṭṣen.

12 Aqa din ijj n řɣar igga am řehřac i ẓriɣ sadu tfuct: agřa ittɛess xas bab nnes i druct i ixef nnes.

13 Ifna zeɛma wagřa nnes s ict n temsart d taɛeffant uca netta tuɣa yejj-dd mmis, xenni war ɣares iqqim walu ɛad deg ufus nnes.

14 Am mammec dd-iffeɣ netta zeg uɛeddis n yemmas, ammu i ɣa iɛqeb d aɛaryan. Ad yuyur am mammec i dd-yusa, war izemmar ad iksi uřa d ict n řḥajjet zeg umarret nnes zi marra min izemmar ad kides iksi deg ufus nnes. ^■  

15 uřa d ta d ict n tmesřact d taɛeffant: nican mammec i dd-yusa netta, ad yuyur. Man řefḍeř nnes xenni i wenni imarrten i uṣemmiḍ waha?

16 Ɛawed ittɣima ittett di taǧest ussan nnes am kemřen. Ittwamarret s řeḥřac nnes d uduqqez nnes n weɣḍab.

17 Xzar, min ttwařiɣ, aqa d lemliḥ u icna aqa ijj ad icc ad isu u ad iẓar marra řxar i marra amarret nnes i wenni umi ittmarrat bnadem sadu tafuct di řqedd n wussan n tudart i d as dd-yarzef AREBBI, maɣar ta d tasɣart nnes. ^■  

18 Ɛawed kuř bnadem i umi iwca AREBBI agřa d txubay u i umi iwca tizemmar maḥend ad zzayes icc u ad zzayes yarbu tasɣart u ad zzayes ifarḥ ɣar warber nnes, aqa-tt d tarzeft n AREBBI.

19 Maɣar netta war ittidar ɛad aṭṭas deg wussan n tudart nnes, minzi AREBBI iwehha as-dd s min issfarraḥen uř nnes.