1 Aqa din ijj n řɣar nni ẓriɣ sadu tfuct nni imsaren aṭṭas jar yewdan: 2 ijjen yarzef as AREBBI agřa d txubay d ccan. Aqa war ittxeṣṣi walu i řeɛmar nnes zi marra min dayes d meẓri, maca AREBBI war t ijji ad zzayes icc, maɣar ijj n ubarrani ad t icc. Aqa uřa d man aya di řbaṭeř d ijj n řɣar d aɛeffan.

3 Mařa ijj n weryaz yejj-dd mya n iḥenjiren u iddar aṭṭas n iseggʷusa, ařami dewřen wussan n tudart nnes deg waṭṭas, maca řeɛmar nnes war ijjiwen ca s řxar u war ittwiff wenḍeř i netta, necc ad iniɣ: ijj n weɣray tecna as x netta. 4 Maɣar yusa-dd di řbaṭeř uca iffeɣ di taǧest u s taǧest ittwařeḥḥef isem nnes. 5 Netta ɛawed war iẓri tafuct u war tt issin. Ammu ɣar wa řhudnet ktar x weryaz nni,^■   6 wah, waxxa mařa netta iddar ařfayen n iseggʷusa, maca břa ma ad iẓar řxar! Ma war gguren marra ɣar wemcan d ijj?

7 Marra arber n bnadem i uqemmum nnes, waxxa amenni ɛemmarṣ war ittccuri řeɛmar nnes. 8 Maɣar man řefḍeř i umiɣis x ubuhaři? Man řefḍeř i umezřuḍ nni issnen ad yuyur zzat i yenni iddaren? 9 Iḥřa min iǧan zzat i tiṭṭawin x wetlaɛ n řeɛmar. Uřa d man aya di řbaṭeř d weḍfar n usemmiḍ.

10 Min ma tuɣa iǧan, aqa isem nnes ittwařaɣa qbeř, u tuɣa ittwassen min ɣa yiři weryaz. Netta war izemmar ad imcubbec ak-d wenni xas ijehden.

11 Maɣar aqa din aṭṭas n wawařen nni yarennyen di řbaṭeř. Man řefḍeř n uya i bnadem?

12 Maɣar wi izemmaren ad issen min iḥřan i bnadem di tudart nnes di řweqt n řqedd n wussan n tudart nnes ifennan nni isseɛddu am tiři? Maɣar wi izemmaren ad isscen i bnadem min ɣa imsaren awarni as sadu tfuct? ^■