1 Isem iṣbeḥ iḥřa x zzect iṣebḥen, ass n řmewt iḥřa x wass n tarwa. ^■   2 Teḥřa twaḥit ɣar taddart n wecḍan, x twaḥit ɣar taddart mani ttqeddamen macca., minzi dayes i iǧa qeṭṭu n bnadem marra u wenni iddaren ittegg i-tt deg wuř nnes. 3 Iḥřa wecḍan x tdeḥḥact, maɣar s ijj n uɣembub iceḍnen ittdakkʷař wuř ḥsen. 4 Uř n imiɣisen aqa-t di taddart n wecḍan, maca uř n ibuhařiyyen aqa-t di taddart n řefraḥet.

5 Iḥřa ad tesřed ɣar uwebbex zeg imiɣisen x wesḥessi i yezři n ibuhařiyyen. ^■   6 Maɣar am utartek n isennanen sadu umeqraj, ammu i tegga tḍeḥḥact n ubuhaři. Uřa d man aya aqa-t di řbaṭeř. ^■  

7 Maɣar řeḥṣaret ggur ad tessbuhři amiɣis, u tarzeft i arrecwet tessexsara uř.

8 Aneggaru n tmesřact teḥřa x umezwaru nnes. Wenni ɣar iǧa ttasiɛ n řxaḍar aṭṭas iḥřa x umɛeffar.

9 War sexxeḍ deɣya di buḥbeř nnek, maɣar deg weḥsin n ibuhařiyyen izeddeɣ uxeyyeq. ^□  

10 War teqqar: “Min tuɣa din iḥřan deg wussan n zic x mammec ǧan wussan-a?” Maɣar aseqsi aya war izemmar ad iffeɣ zi tiɣit.

11 Tiɣit ak-d tesɣart tecna u aqa-tt d řefḍeř i yenni ittwařan tafuct.

12 Maɣar tiɣit aqa-tt i tiři uřa d ttmenyat aqa atent i tiři. Řefḍeř n tussna aqa tiɣit tᵉttic tudart i aytbab nnes.

13 Xzar min igga AREBBI, maɣar wi izemmaren ad iseggem min issfarɣ Netta?

14 Arr meẓri s řxar deg wass n řefraḥet uca ḥḍa deg wass n arẓiyyet, maɣar uřa d wa igga i-t AREBBI nican am wenneɣni ḥima bnadem war ittif uřa d walu awarni as. ^□  

15 Marra aya i ẓriɣ deg wussan n tudart inu ifennan. Aqa din amsegged nni ittwahellken di tsegda nnes uca aqa din aɛeffan nni iszuggarten ussan nnes di marra tuɛeffna nnes.

16 War tegg ixef nnek d amsegged aṭṭas, u war tegg ixef nnek d amiɣis aṭṭas.

Mayemmi i ɣa tḍeyyɛed ixef nnek?

17 War ttiři d aɛeffan aṭṭas u war ttiři ɛawed d abuhaři aṭṭas.

Mayemmi i ɣa temmted mařa war dd-yiwiḍ ɛad řmijař nnek?

18 Mliḥ mařa cek tcebbared di man aya uca war d as tarexxud ɛad, maɣar wenni itteggʷeden AREBBI, ad ittwafekk zi marra aya.

19 Tiɣit tessejhed amiɣis x ɛecra n ayt n jjehd nni iǧan deg ict n tendint.

20 Wah nican, war iǧi uřa d ijj n bnadem d amsegged x temmurt, uřa d ijj ittegg řxar u war ixeṭṭi ca. ^■  

21 War ttic taynit nnek i marra awařen nni qqaren iwdan, ḥima ɛemmarṣ war tᵉttesřid aqa amsexxar nnek ad cek inɛeř. 22 Maɣar uř nnek yuca aṭṭas n twařawin, aqa uřa d cek tneɛřed inneɣni.

23 Marra aya beqqceɣ t s tiɣit. Necc nniɣ: “Xseɣ ad kesbeɣ tiɣit!”, maca tiɣit teqqim ayi ɣar řaggʷaj. 24 Maɣar min iggʷejen d min yuǧɣen, wah yuǧɣen, man wen izemmaren ad t yaf? 25 Nnqeřbeɣ, uřa d uř inu akidi, maḥend ad afeɣ tussna, maḥend ad beqqceɣ, ad arzuɣ tiɣit d wenway i dayes, maḥend ad ssneɣ s tidett aqa řɣar d taɣyuři u taɣyuři d tubbuheřya. ^■  

26 Ufiɣ min iǧan d amerzag x řmewt: tamɣart tenni iǧan am traccawin u uř nnes amecnaw tixecfin ineqqen u ifassen nnes amecnaw iceddiyyen. Wenni yarḍan zzat i wudem n AREBBI, izemmar ad zzayes infekk, maca amednub ad daysen imxumber. ^■  

27 Xzar, aya i ufiɣ, iqqar Umbarreḥ, umi arenyeɣ ict n řḥajjet i yicten nneɣni maḥend ammu i ɣa yafeɣ řḥasuř nnes: 28 min tuɣa yarezzu řeɛmar inu ɛad, maca war t ufiɣ: wah ufiɣ ijj n weryaz deg wařef, maca ict n temɣart war tt ufiɣ jar marra yina. 29 Xzar, ict waha i ufiɣ: aqa AREBBI igga bnadem nican, maca nitni arzun deg waṭṭas n yebriden iḥraymeyyen.