Tiɣit ad iḥḍa tamemmit
2
1 Mmi inu, mařa tqebřed awařen inu u teḥḍid tiweṣṣa inu ɣarek,
2 maḥend amezzuɣ nnek ad iwc taynit i tiɣit,
uř nnek ad imeyyeř ɣar řefhamet,
3 wah mařa tᵉttřaɣid-dd x řeɛqeř,
ad tessxedmed tmijja nnek maḥend ad tafed řefhamet,
4 mařa tarezzud xas am tarezzud x nnuqart,
mařa xas tarezzud am x txubay innuffaren, □ ■
5 xenni ad tfehmed i tiggʷudi n SIDI,
u ad tafed tussna n AREBBI.
6 Maɣar SIDI ittic tiɣit,
zeg uqemmum nnes tᵉtteffeɣ-dd tussna d řefhamet. ■
7 I yenni igguren nican issewjed asen twiza,
i yenni igguren di řekmaret issewjed asen adurri,
8 ḥima ad qqimen ttᵉṭṭfen deg imesraq n řḥeqq,
u Netta ad issar abrid n imeddukkař nnes imtiqqan.
9 Xenni ad tfehmed tasegda d řḥeqq,
uřa d řeṣfayet,
kuř řatar iṣebḥen.
10 Maɣar tiɣit ad tadef ɣar wuř nnek,
u tussna ad tarḍa x řeɛmar nnek.
11 Aḥadur ad xak iḥḍa,
řefhamet ad xak tessar,
12 ... maḥend ad cek tfekk zeg webrid n uɛeffan,
zeg weryaz nni iqeǧben awař nnes.
13 zeg inni isemḥen deg imesraq iseggmen,
maḥend ad uyuren ibriden n taǧest,
14 inni ifarrḥen maḥend ad ggen řɣar,
u ssřiwřiwen x řexdaɛat n řɣar,
15 n yinni iǧan imesraq nsen farɣen,
d yinni imeyyřen ssa d ssa di řatarat n yixef nsen.
16 ... maḥend ad cek tfekk zi temɣart tbarranect,
zi temɣart zi barra i ittɣarran s wawařen nnes, ■
17 tenni isemḥen deg umeddukkeř n temẓi nnes,
u tᵉttu řɛahd n AREBBI nnes.
18 Minzi thekkwa ɣar řmewt jmiɛ ak-d taddart nnes,
u řatarat nnes hekkwant ɣar řexyařat n imettan.
19 Marra inni ɣares ɣa yadfen, war dd-ittɛiqqiben ɛemmarṣ,
war ttakkwaḍen ɛemmarṣ ɣar imesraq n tudart.
20 ... ḥima ad tuyured abrid n iṣebḥanen,
u ad tᵉṭṭfed deg imesraq n imseggaden,
21 maɣar inni igguren nican ad zedɣen di temmurt,
u inni igguren s řekmaret ad dayes qqimen. ■
22 Iɛeffanen ad ttwaqeḍɛen zi temmurt,
iɣeddaren ad zzayes ttwaqeřɛen. ■