Tiɣit di tudart n kuř ass
3
1 Mmi inu, war ttᵉttu taɣuri inu n Ccariɛa, ejj uř nnek ad iḥḍa tiweṣṣa inu.
2 maɣar nitenti ad ac dd-awyen aṭṭas n wussan,
uřa d iseggʷusa n tudart d řehna. ■
3 Tamexsiwt icewwaren d řaman war ten tejjid ad zzayek ffɣen.
Qqen i-ten ɣar yiri nnek, ari ten x teřwiḥt n wuř nnek ■
4 u af ařḍa u scen řefhamet iṣebḥen,
di tiṭṭawin n AREBBI u n bnadem.
5 Tiqq di SIDI s wuř nnek kuřci,
war ttcařa x řefhamet n yixef nnek.
6 Ssen i-t di marra ibriden nnek,
xenni Netta ad iseggem imesraq nnek. ■
7 War ttegg ixef nnek d amiɣis.
Ggʷed SIDI u beɛɛed x min iǧan d aɛeffan. ■
8 Aya ad yiři d agenfu i iẓewran n tudart nnek,
d tissi i ixsan nnek.
9 Weqqar SIDI s wagřa nnek,
s tmezwarut n marra ṣṣabet nnek. ■
10 Xenni ad ttwaccuren řehrit nnek s ufeyyeḍ,
tisirin n uḍiř ad ssefyent s binu n jdid. ■
11 Mmi inu, war neṭṭar ttarbiyyet n SIDI,
war ttarra aɛrur x uwebbex nnes, ■
12 maɣar wenni issɛizza SIDI ad t iɛaqeb ɛawed,
am ittegg babas ak-d mmis wenni x yarḍa. ■
13 Sseɛd n bnadem nni ittafen timessna,
uřa d bnadem nni ittkessaben řefhamet,
14 maɣar tasebbabt nnes teḥřa x tsebbabt di nnuqart,
u řɣiǧet nnes teḥřa x wureɣ ittissiqen, ■
15 nettat tiɣřa x řmarjan,
u marra min di tzemmared ad temmeẓred,
war izemmar akides immqudda. ■
16 Tuzzeggart n wussan ɣares deg ufus nnes,
agřa d ccan aqa aten x uzeřmaḍ nnes,
17 Ibriden nnes d ibriden n řeḍrafet,
u marra imesraq nnes aqa aten d řehna.
18 Nettat d tacejjart n tudart i yenni ɣares iřesqen,
kuř ijjen wenni dayes itteṭṭfen, ad yiři d amesɛud. □
19 SIDI igga dsas n temmurt s tiɣit nnes,
s řefhamet nnes igga ijenwan.
20 Zi tussna nnes dduqqzen-dd aman yuǧɣen,
ttnecnicen-dd iseynuten nnda. ■
21 Mmi inu, war tent tejjid ad ffɣent zi tiṭṭawin nnek,
ḥḍa aftan d uḥaḍur, □
22 maɣar ad iřin d tudart i řeɛmar nnek,
uřa d arḍa i yiri nnek.
23 Xenni ad tuyured abrid nnek di řaman,
u war tᵉttneqriḍed deg uḍar nnek. ■
24 Mařa truḥed ad tezzřed, war ggur ad tenxeřɛed,
u xmi i ɣa tezzřed, ggur ad yiẓid yiḍes nnek. ■
25 War tteggʷed zeg unexřiɛ n deɣya,
uřa zeg wareyyeb s ufus n iɛeffanen xmi dd ɣa yas. ■
26 Maɣar SIDI ad ac yiři d asenned nnek,
Netta ad iḥḍa afus nnek zi tsarrift.
27 War qeṭṭeɛ řxar x bab nnes,
mařa aqa-t deg ufus nnek maḥend ad t tegged.
28 War qqar i umqarreb nnek:
‘Ruḥ uca ɛqeb-dd, tiwecca ad ac-tt wceɣ!’,
mařa tamesřact aqa-tt akidek.
29 War nekkwi řɣar ak-d umqarreb nnek,
umi akidek izeddeɣ di řaman.
30 War temcubbuc ak-d ijj n bnadem břa ssibbet,
mařa netta war d ac iggi řɣar.
31 War ttasem zeg ijj n bu-řexcunet,
ḥḍa maḥend war tᵉttixḍared uřa d ijj zi marra ibriden nnes. ■
32 maɣar wenni itteffɣen zeg webrid, aqa-t d nnɛi i SIDI,
maca Netta ittegg řaman nnes deg inni igguren nican. ■
33 Nneɛřet n SIDI aqa-tt x taddart n uɛeffan,
maca tazeddiɣt n imseggaden ad tt ibarek. ■
34 Mařa d imestehzayen, ad zzaysen isstehza Netta,
maca mařa d inni ittwaḥṣaren, ad asen iscen arḍa nnes. ■
35 Imiɣisen ad warten ccan,
maca ibuhařiyyen ad ssarbun řefḍiḥet x yixef nsen.